Një javë nga vendosja e maskave me detyrim/ Me hundën jashtë, simbole apo parulla, ja si u prezantuan sot ministra e deputetë në Kuvend (FOTO)

Gati një javë nga miratimi i Aktit Normativ për vendosjen e maskave me detyrim edhe në ambientet e jashtme, ajo çka tërheq vëmendje, përveç veshjes së deputetëve dhe ministrave tanë, është a e kanë vendosur apo jo barrierën mbrojtëse.

Nëse më herët, veç fjalës së tyre në Parlament, ajo çka përbënte lajm për median rozë ishte se sa fashionistë dhe të kuruar ishin ligjvënësit shqiptarë, tashmë prezenca e tyre “gjykohet” në një këndvështrim tjetër.

Si u prezantuan gjatë seancës së sotme plenare deputetët? Dhe, a i respektuan masat anti-COVID? Parë nga ky këndvështrim, mund të themi se e enjtja e sotme ka qenë e “trazuar”. Kishte nga ata që nuk mbanin fare maska si Fidel Ylli apo Lefter Maliqi, por edhe ata që e mbanin si aksesor zbukurimi si Korab Lita.

E listës së deputetëve nuk mund t’i mungonte Ralf Gjoni me një maskë me parullën “Shqipëria nuk është Bashkimi Sovjetik”, apo edhe Ulsi Manja apo Ditmir Bushati, të cilët e kishin vendosur barrierën mbrojtëse pa i kushtuar shumë rëndësi edhe pse rrinte pak “e ngushtë”.