Flash News

E-TJERA

Numri i punonjësve ka rënë me 60%, si do të ndryshojë tregu i ‘Call Center’ në Shqipëri?

Numri i punonjësve ka rënë me 60%, si do të ndryshojë

Gjatë 2025, tregu i operatorëve call center pritet të zgjerohet me hyrje të reja të kompanive.

Lorenc Goga, njohës i sektorit call center, parashikon se në vend do të vijojnë të vijnë kompani italiane të reja call center, pasi është krijuar një fuqi punëtore profesionale italishtfolëse.

“Pavarësisht se numri i të rinjve që flasin dhe zotërojnë gjuhën italiane është ulur ndjeshëm krahasuar me numrin e lartë të të rinjve të brezit të viteve ’90 që flisnin shumë mirë italisht, në vend është krijuar një klasë e punëtorëve profesionistë të gjuhës italiane.

Duke qenë se shërbimi call center dhe gjuhë italiane është një binom i pandarë, gjetja e këtyre punonjësve në Shqipëri vijon të tërheqë kompanitë italiane për investime.

Pra nuk është më kostoja më e lirë e krahut të punës që tërheq për investime në sektorin call center, por konkurrueshmëria me aftësitë profesionale të punonjësve”.

Por sektori prej vitesh vuan mungesën e fuqisë punëtore, për shkak të emigracionit të të rinjve. Lorenc Goga tha se kjo problematikë do të vijojë edhe gjatë 2025, dhe për këtë është e nevojshme të rriten trajnimet e kompanive për aftësimin e punonjësve me gjuhën italiane.

Në 2024, në treg ka pasur edhe dalje të kompanive të mëdha, siç është operatori italian i shërbimit call center Facile.it.

Drejtues të kompanive kryesore call center në vend kanë parashikuar më herët se tkurrja e numrit të kompanive do të vijojë nëse operatorët nuk diversifikojnë aktivitetin e tyre, përtej qendrës së shërbimeve telefonike, në përputhje me zhvillimet e tregut.

Lorenc Goga, njohës i sektorit, thotë se diversifikimi nuk do të arrinte të zgjidhte çështjen e mungesës së fuqisë punëtore, ndërsa taksat e larta për tatimin mbi të ardhurat e punonjësve kundrejt tatimit zero që kanë profesionistët e lirë, e bëjnë të pamundur shndërrimin e shërbimit call center me teknologjinë e informacionit.

Në sektorin call center, nga viti në vit rezulton se ka pasur rënie të numrit të kompanive dhe të punësuarve. Sipas të dhënave të Drejtorisë së Përgjithshme të Tatimeve (DPT), për muajt janar-nëntor 2023 në call center rezultonin të punësuar 9,837 punonjës.

Krahasuar me totalin e 2022, numri i tyre ra me 14%. Në raport me 2015, që vlerësohet si kulmi i shkëlqimit të epokës së call center (gjithsej në sektor operonin 848 kompani, më i lartë për vitet 2011-2023 me 25,000 të punësuar), numri i të punësuarve u pakësua 60%.

 

Të fundit