Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Organizatat evropiane ‘shuplakë’ qeverisë: Asnjë përparim në gazetarinë e pavarur, nuk zbatohet ligji

Politiko 19 Nëntor 2022, 17:34

Organizatat evropiane ‘shuplakë’ qeverisë: Asnjë

Shtatë organizata për lirinë e medias ngritën shqetësimin në një konferencë shtypi në Tiranë të premten se pavarësisht disa përparimeve, situata për raportim të lirë dhe të pavarur në vend po përkeqësohet.

“Vlerësimi ynë është se në përgjithësi Shqipëria vazhdon të përjetojë një përkeqësim të lirisë së medias. Ndërsa kuadri ligjor në përgjithësi mbetet adekuat, nuk është bërë asnjë përparim në vitet e fundit në përmirësimin e mjedisit për gazetarinë e pavarur dhe mbikëqyrëse ose pluralizmin e medias," thanë ata në një deklaratë.

Ata theksuan se Shqipëria ka ligje të mira për lirinë e medias dhe mbrojtjen e gazetarëve, por nuk po i zbaton siç duhet.

Konferenca për shtyp e së premtes erdhi pas një misioni dy-ditor faktmbledhës në Shqipëri nga Neni 19, Instituti Ndërkombëtar i Shtypit, Federata Evropiane e Gazetarëve, Komiteti për Mbrojtjen e Gazetarëve, Reporterët pa Kufij, Unioni Evropian i Transmetuesve dhe Qendra Evropiane për Shtypin dhe Lirinë e Medias.

Të shtatë organizatat përmendën si progres tërheqjen e legjislacionit të planifikuar të qeverisë kundër shpifjes dhe hetimet policore të sulmeve ndaj gazetarëve.

“Pavarësisht këtyre hapave inkurajues, perceptimi dërrmues i përfaqësuesve të medias me të cilët u takua delegacioni ishte se klima për raportim të lirë dhe të pavarur po përkeqësohej në Shqipëri,” thanë ata.

Ata thanë në konferencën për shtyp se kishin takuar të gjitha figurat e rëndësishme në vend për të folur për lirinë e medias – kryeministrin Edi Rama, deputetë, zyrtarë të policisë dhe prokurorisë, përfaqësues të transmetuesit publik dhe gazetarë të ndryshëm.

Marrëdhënia mes kryeministrit Rama dhe medias shqiptare ka qenë prej kohësh e tensionuar.

Këtë vit Rama urdhëroi dy gazetarë që t'i nënshtroheshin "riedukimit", që do të thotë se ata nuk mund të merrnin pjesë në konferencat e tij për shtyp apo t'i bënin ndonjë pyetje për një periudhë të caktuar.

Në vitin 2022, Shqipëria ra me 20 vende në indeksin e lirisë së shtypit të hartuar nga vëzhguesi ndërkombëtar Reporterët pa Kufij, nga vendi i 83-të në vendin e 103-të.

Reporterët pa Kufij thanë se gazetarët në Shqipëri janë në shënjestër të grupeve të krimit të organizuar, madje edhe nga dhuna policore dhe se shteti nuk po arrin t'i mbrojë ata, ndërsa mediat private janë në pronësi të biznesmenëve që kanë lidhje me politikanë.