Pa konsultim/ Rama tregon planin për krijimin e një Shteti Bektashi

Për “New York Times”, kryeministri Edi Rama zbuloi planin për krijimin e një shteti brenda shtetit, një “Vatikan” në Shqipëri.

Për prestigjiozen amerikane, Rama tha se në Shqipëri do të ndërtohet Shteti i Bektashinjve.

Konkretisht, bëhet fjalë për një tokë prej 27 hektarësh që do të qeveriset nga Baba Mondi, Kryegjyshi Botëror i Bektashinjve.

Shteti i bektashinjve do të jetë një enklavë sovrane e stilit të Vatikanit që do të kontrollojë territorin prej 27 hektarësh dhe do të lejojë alkoolin, t'i lejojë gratë të veshin çfarë të duan dhe të mos vendosin rregulla të stilit të jetesës.

“Zoti nuk ndalon asgjë; prandaj na dha mendjen”, tha Baba Mondi. Rama tha për NYT se në të ardhmen e afërt do të shpallë planet për entitetin, që do të quhet Shteti Sovran i Urdhrit Bektashi.

Harta lokalizon Tiranën dhe Krujën.

“Të gjitha vendimet do të merren me dashuri dhe mirësi,” tha Baba Mondi.

“Duhet ta mbrojmë këtë thesar, që është toleranca fetare dhe që nuk duhet ta marrim kurrë si të mirëqenë”, është shprehur Rama për “New York Times”, duke theksuar mesazhin kryesor: “Mos lejoni që stigma e myslimanëve të përcaktojë se kush janë myslimanët”.

Një ekip ekspertësh ligjorë, përfshirë juristë ndërkombëtarë, po hartojnë legjislacionin përkatës.

“Deri më tani, Edi Rama, një katolik jopraktikant, tha se vetëm disa nga ndihmësit e tij më të afërt e dinë për planin dhe aleatët e NATO-s si Shtetet e Bashkuara nuk janë konsultuar”, thekson gazeta. 

Por, Baba Mondi për A2 CNN, ka mohuar që të ketë pasur konsultime me kryeministrin apo ekspertët për krijimin e këtij shteti, duke e quajtur një “befasi”.

“Lajmi se Shqipëria mund t'i japë sovranitet Urdhrit Bektashi për pavarësi territorial na ka befasuar. Ne nuk e kemi kërkuar dhe nuk pretendojmë të krijojmë një shtet Mysliman. Nisma është tërësisht e kryeministrit Rama. Nuk jemi pyetur, mbi ato që Kryeministri ka deklaruar në ‘The New York Times’”, tha Baba Mondi.

Rama, i cili shpalosi planin për median amerikane, nuk ka dhënë më shumë detaje, as se si lindi ideja e këtij plani, as nëse ka pasur ose jo konsultime me grupet e interesit apo se çfarë do t’i duhet qeverisë për krijimin e Shtetit të Bektashinjve.