Partia e re e Topallit, Mustafaj: E prita me keqardhje, Jozefina nuk i shmanget dot sintagmës se është hakmarrje

Analisti Besnik Mustafaj, njëherësh anëtar i Komisionit të Vlerësimit në PD ka komentuar partinë e re të ish-kryetares së Parlamentit, Jozefina Topalli, të cilën e prezantoi një ditë më parë.

I ftuar në ‘News 24’, Mustafaj tha se këtë akt e ka pritur me keqardhje, ndërsa kujtoi se PD ka një histori të gjatë fraksionesh, por që deri tani nuk ka patur asnjë histori suksesi.

“E prita me çudi dhe keqardhje, por PD ka një histori të gjatë fraksionesh, por nuk ka asnjë histori suksesi. Parashikoja që krijimi i kësaj partie do të shoqërohej me një analizë pse ka dështuar Gramoz Pashko, Dashamir Shehu, Genc Pollo, pra do duhej një analizë e tillë për të arritur në përfundim realist për të vepruar brenda të mundshmes.

Nëse Topalli do mund të mbledhë të gjithë të pakënaqur nga Rama dhe nga Basha, unë mendoj se do jetë një punë e dobishme për vendin, në të kundërt atëherë do ishte një aventurë”, tha Mustafaj.

I pyetur nëse e dëmton kjo gjë PD, analisti thotë se “votat janë numra dhe nëse Jozefina do jetë e aftë të mbledhë elektorat të caktuar që nuk është i gatshëm t’i besojë Bashës dhe Ramës, do jetë veprim në dobi, por mbetet për tu parë”.

Mustafaj u pyet ashtu nëse krijimi i partisë së saj është një hakmarrje personale si një nga figurat e pakënaqura ndaj PD.

“Jozefina nuk i shmanget dot sintagmës se është hakmarrje. Ishte e propozuar nga demokratët e Shkodrës për listën e deputeteve. Në seleksionimin e parë e përzgjodhëm, i pëlqen ose jo Bashës, Komisioni e përzgjodhi. I shkoi formulari njësoj si të tjerët. Ajo, jo vetëm refuzoi t’i nënshtrohet procedurës korrekte, por e quajtu komisionin farsë. Për mua ishte fyese. Jozefina u vetpërjashtua”, deklaroi Besnik Mustafaj.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm