Pas Harvardit, gjuha shqipe edhe në Universitetin e Pensilvanisë

Universiteti i Pensilvanisë, një nga tetë institucionet prestigjioze të Ivy League, ka vendosur të integrojë lëndën e gjuhës shqipe në kurrikulën e tij, duke filluar nga semestri i pranverës 2024.

Njoftimi është bërë nga Ballina Prishtina, studentja shqiptare e cila u diplomua në Universitetin e Pensilvanisë këtë maj dhe luajti një rol të rëndësishëm për të bindur universitetin për të filluar mësimin e gjuhës shqipe, transmeton Erudera.com.

Prishtina tha se arsyeja se pse ajo kishte këmbëngulur që gjuha shqipe të bëhej pjesë e kurrikulës së universitetit është për shkak se ajo është një gjuhë që ka mbijetuar qindra vjet nën pushtim.

Prishtina tha se dëshiron ta shohë gjuhën të gjallë edhe për shumë vite të tjera.

“Shpresoj se të gjithë e kuptojmë se çfarë momenti historik është ky për grupin tonë të studentëve shqiptarë në këtë universitet, që gjuha jonë e bukur dhe unike të mësohet në universitetin më të vjetër amerikan”, ka shkruar ajo në Facebook.

Prishtina inkurajoi të gjithë studentët që të ndjekin kursin dhe të kenë një ndikim të rëndësishëm në arsimimin e tyre në këtë universitet, ashtu si individët e përkushtuar që mbrojnë popullin e tyre dhe duan të mbajnë gjuhën e tyre të folur dhe të gjallë.

Studentët e interesuar do të mund të regjistrohen në kursin "Shqipja Fillore", niveli fillestar i gjuhës, i cili do të ofrohet në Departamentin e Gjuhës në Penn.

Gjuha shqipe u prezantua si lëndë në fillim të këtij viti edhe në Harvard, universiteti më i vjetër në SHBA. Mësimet e shqipes në Harvard filluan në prill në departamentin e gjuhëve dhe qytetërimeve të Lindjes së Afërt (NELC).

Ka universitete të tjera në SHBA ku studentët mund të studiojnë gjuhën shqipe, duke përfshirë:

Universiteti Shtetëror i Arizonës

Universiteti DePaul

Kolegji Mercy në Dobbs Ferry, Nju Jork