Pas Metës, bindet edhe Kryemadhi, kush ia ‘mblodhi’ presidentit dhe të shoqes të shfaqen me maskë anti-covid

Ashtu siç kishte paralajmëruar, kryetarja e LSI, Monika Kryemadhi u shfaq për herë të parë në publik me maskë anti-covid.  

Ndonëse prej kohësh deklaronte në takimet e saj publike, apo studiot televizive se nuk do ta mbante, sot në procesin e zgjedhjeve brenda partisë që drejton, ajo i shfaq me një maskë të kuqe që mbante logon e LSI-së.

Në një prononcim për mediat, Kryemadhi u pyet nga gazetarët se përse kishte ndryshuar qëndrim lidhur me këtë ‘risi’.

Ajo tha se nuk ia kishte mbledhur policia, por vetëm partia që ta mbante. 

"Me sa duket partia ma mbledh, jo njeri tjetër. Unë përsëri vazhdoj të mendoj që maska mbahet në ambiente të mbyllura, ta mbajnë se besojnë dhe jo se i kërcënojnë”, u shpreh kryetarja e LSI.

Deri pak ditë më parë, Kryemadhi shprehej publikisht se nuk do e mbante maskën dhe u bën thirrje shqiptarëve që të mos e zbatojnë vendimin e mbajtjes së maskës me detyrim në çdo ambient.

Madje, në takimet e saj, Kryemadhi është gjobitur dy herë nga policia.

Pak ditë më parë, reflektim në këtë drejtim pati edhe nga ana e presidentit Ilir Meta, bashkëshorti i zonjës Kryemadhi.

Në takimin e përjavshëm me gazetarët, Meta u shfaq me një maskë të bardhë.

Kreu i shtetit tha se e ka “tmerr” që të mbajë maskë, por është i detyruar për shkak të rrethanave dhe situatës së pandemisë.

“Unë e kam pasur tmerr të mbaj maskë dhe e kam tmerr. Por në momente aktuale jam i detyruar të vendos maskën dhe u bëj thirrje të gjithëve të vendosin maskën. Kjo ka ta të bëjë me ndërgjegjësimin që në kushtet kur qeveria po kujdeset kaq shumë për disa oligarkë, qytetarët të kujdesen dhe të ruajnë higjienën. Nëse ju e shikoni si reflektim timin, prapë pozitive është”, u shpreh Presidenti Ilir Meta.

Kujtojmë se vendi ynë prej ditësh po përballet me një numër në rritje të të infektuarve dhe humbjeve në jetë.

Vetëm gjatë ditës së djeshme (20 nëntor) u shënuan 15 viktima dhe 836 të prekur.

Në total nga fillimi i pandemisë, janë regjistruar 672 viktima.