Patozi njësoj si Topalli: Marr përgjegjësinë dhe dorëhiqem nga drejtimi i Bindjes Demokratike

Njësoj si Jozefina Topalli dhe Astrit Patozi i cili drejtonte Bindjen Demokratike në zgjedhjet e 25 Prillit ka dhënë dorëheqjen nga partia.

Patozi sqaron se duke marrë të  gjitha përgjegjësitë për mosarritjen e objektivave elektorale, dorëhiqet nga drejtimi i partisë. Këtë veprim të tij e konsideron akt moral dhe jo dorëzim. 

"Duke falenderuar edhe një herë kandidatët, mbështetësit dhe të gjithë votuesit e Bindjes Demokratike në zgjedhjet e 25 prillit, kam vendosur të marrë të gjitha përgjegjësitë për mosarritjen e objektivave tona elektorale dhe të dorëhiqem nga drejtimi i partisë.

Fakti që ne bëmë një betejë dinjitoze dhe qytetare, në mesin e një polarizimi ekstrem, që erdhi nga egërsia dhe ashpërsia e forcave kryesore politike, nuk mund të shërbejë në asnjë rast si justifikim për askënd prej nesh, por sidomos për mua që udhëhoqa fushatën. E kemi ditur që në fillim se në kohë lufte njerëzit nuk kanë mundësi të dëgjojnë muzikë, por nuk kemi ndërmend të fshihemi prapa rrethanave të vështira dhe të pazakonta", shkruan ndër të tjera në Facebook, Patozi.

Më tej ai shton se që nga dita e parë e krijimit të partisë ka patur privilegjin të njohë dhe bashkëpunojë me njerëz të shkëlqyer, politikanë me eksperiencë apo edhe të rinj të supermotivuar.

"Unë i inkurajoj ata të gjithë që ta vazhdojnë edhe më të vendosur këtë rrugëtim politik, i cili ka në epiqendër respektin për disa vlera dhe parime të qenësishme si dhe dëshirën për t’i shërbyer vendit dhe interesit publik", shprehet Patozi.

Ai shton se nuk mendon që është koha për t’u dekurajuar, sepse i ka ditur dhe marrë parasysh vështirësitë që në nisje të këtij projekti politik.

" Askush prej nesh nuk kishte keqkuptimin se rezultati do të arrihej me një të rënë të sopatës dhe asnjëherë nuk e kishim menduar se Bindja Demokratike ishte projektuar për vetëm një palë zgjedhje. Ndryshe, do të kishte qenë e pandershme dhe e padenjë për të gjithë ata shqiptarë, që e mbështetën dhe i besuan asaj", thotë ai.

Patozi thekson se dorëheqja është akt moral, por kurrësesi dorëzim.

"Dorëheqja ime është një akt moral përgjegjësie, por kurrërrësesi dorëzim. E kemi shpallur që në ditën e parë të themelimit se Bindja Demokratike nuk është një njeri, as një grup personash, e aq më pak pronë apo ndërmarrje biznesi e dikujt. Ajo është një ide e bukur për të ndryshuar mënyrën e drejtimit të Shqipërisë, pasi ne mendojmë se ajo keqqeveriset për shkak të një sistemi të kapur, që ka mbyllur të gjitha shtigjet e konkurrencës së lirë", shprehet më tej Patozi.

Ai do të vijojë të jetë mbështetës i palodhur i kësaj ideje, si njeri politik dhe qytetar i angazhuar, sepse është i bindur që është e vetmja rrugë për të pasur një atdhe më të drejtë, më pak të korruptuar, më të jetueshëm, dhe me një qeveri që shërben dhe nuk sundon.

"I uroj fat dhe sukses Bindjes Demokratike në sfidat e radhës, si një projekt serioz që, sipas meje, ka për qëllim ndryshimin strukturor të politikëbërjes në këtë vend, i cili ka qenë që në fillim dhe duhet të vijojë mbetet sërish në dispozicion të ripërtëritjes të së djathtës dhe të opozitës në Shqipëri", mbyll reagimin e tij Patozi.

Kujtojmë që pas rezultateve të zgjedhjeve, ku nuk arritën të siguronin asnjë mandat, Jozefina Topalli dha dorëheqjen nga Lëvizja për Ndyshim, Nard Noka nga Partia Demokristjane, ndërsa Tom Doshi nga Partia Socialdemokrate (ndonëse ky i fundit siguroi 3 mandate në gjithë Shqipërinë).