Përfundon takimi i dytë në Bruksel, Kurti: Propozova marrëveshje paqeje, por u refuzua. Vuçiç: Takim i keq

Ka përfunduar takimi i dytë mes kryeministrit të Kosovës Albin Kurti dhe presidentit serb Aleksandar Vuçiç në Bruksel, me ndërmjetësimin e BE.

Pas takimit, Kurti ka dalë me një prononcim për media, ku tha se ka propozuar një marrëveshje paqeje, por ajo u refuzua nga Serbia pa u lexuar.

“Propozova një marrëveshje të shkruar me gjashtë pika për një marrëveshje të paqes mes Kosovës dhe Serbisë që u refuzua. Marrëveshja u refuzua ende pa u lexuar. Për mua kjo tregon mos gatishmëri për marrëveshje”, ka thënë Kurti, i cili shtoi se janë dakorduar që gjatë gushtit të ketë edhe një takim të delegacioneve.

“Gjithashtu do të ketë një tjetër takim midis krerëve të vendeve tona në shtator”.

Kryeministri tha se te pika për të pagjetur insistuam që të futet edhe togfjalëshi “ballafaqimi me të kaluarën”.

“U pranua propozimi nga Borrel, por jo edhe nga Vuçiq i cili që të diskutohet kjo pikë”, tha ndër të tjera Albin Kurti

Nga ana tjetër, presidenti i Serbisë, Aleksandar Vuçiç e quajti takim të keq dialogun e sotëm në Bruksel, ndërsa tregoi se Serbia u pajtua me disa propozime nga ndërmjetësit e Bashkimit Evropian, Josep Borrell dhe Miroslav Lajçak.

“Mendova se ishte e pamundur të kisha një takim më të keq dhe sot u binda se ishte e mundur. Ne morëm propozime nga BE-ja që ishin harmonizuar me negociatorët tanë kryesorë. Serbia gjithashtu ra dakord plotësisht me atë që e propozoi BE-ja”, tha Vuçiç.

“Aty ishin tre pika. Të intensifikohen përpjekjet e përbashkëta në identifikimin e personave të zhdukur, të përmbahemi nga situatat e mëtejshme që mund t’i rrisin tensionet në terren dhe që negociatorët të takohen rregullisht”, tha ai.

Ai deklaroi se Serbia pranoi plotësisht dhe pa asnjë vërejtje disa propozime të palës së Kosovës, ndërsa tha se “shqiptarët nuk dëshironin”.

“Është veçanërisht interesante që ata nuk donin asgjë tjetër. Ata kushtëzuan me kritere të reja gjatë gjithë kohës. Prezantimi i tyre ishte se Serbia është fajtore për tri gjenocidet në Kosovë. Pastaj ai na shpjegoi se emrat shqiptarë tërheqin emra nga toponimet në Serbi , ju mund të besoni se njeriu pas 150 vjetësh flet për këto”, theksoi Vuçic.

Sipas tij, Kurti kishte zgjedhur të fliste më shumë për të kaluarën.

“Njerëzit në BE nuk besojnë në ato që po dëgjojnë. Burri është kthyer në shekullin e 19-të. Siç mund ta shihni, unë jam i shqetësuar, nuk e di se çfarë do të bëjmë”, u shpreh ai.