Peticion për të ndaluar glorifikimin e diktaturës dhe përdorimin e simboleve të komunizmit, 6 kërkesa për Kuvendin

Një peticion për të ndaluar me ligj glorifikimin e diktaturës dhe përdorimin e simboleve të regjimit komunist është publikuar nga Instituti për Demokraci, Media dhe Kulturë.

Ky peticion parashikon gjatë kërkesa për Kuvendin e Shqipërisë lidhur me dekomunistizimin.

Instituti vë në dukje se gjatë viteve të fundit ka pasur përdorim të shtuar të simboleve të regjimit komunist në hapësirën publike apo për qëllime tregtare, glorifikimin e diktaturës, diktatorit Hoxha dhe bashkëpunëtorëve të tij

Ndërkohë thekson se një numër i madh vendesh europiane e kanë ndaluar përdorimin e simboleve naziste dhe komuniste. Nënvizohet gjithashtu se nuk mund të ketë një integrim të Shqipërisë në BE pa zbardhur të shkuarën.

Kërkesat për Kuvendin:

1. Miratimin e një kuadri ligjor që ndalon propagandën e regjimit komunist në programet e partive politike, ndalon ligjërimin glorifikues të diktaturës dhe përdorimin e simboleve të regjimit komunist në hapësirën publike, përmes ndërhyrjeve të duhura në Kodin Penal, sipas modeleve që shtete të BE kanë mbajtur ndaj nazizmit, fashizmit dhe regjimeve totalitare komuniste.

2. Vetingun e funksionarëve politikë dhe drejtuesve të institucioneve në raport me të shkuarën e tyre gjatë regjimit komunist, si kusht i domosdoshëm për pastrimin e institucioneve të sotme të shtetit.

3. Zbardhjen e plotë të aktivitetit kriminal të Sigurimit të Shtetit dhe organeve të tjera represive të diktaturës që merreshin me përndjekjen politike, si dhe akses publik të pakufizuar në dokumentet e tyre.

4. Rishikimin e emërtimit të shkollave, rrugëve, shesheve dhe institucioneve duke propozuar ndryshime konkrete në ligjin Nr. 139/2015 "Për vetëqeverisjen vendore" si dhe në ligjin Nr. 9270/2004 "Për sistemin e adresave". Nëpërmjet këtij ndryshimi synojmë një parashikim ligjor që detyron organet e pushtetit vendor të kryejnë verifikime paraprake të emrave të propozuara për rrugë, sheshe apo shkolla në territoret e bashkive.

5. Muzealizimin e institucioneve ku janë kryer dënime të padrejta si burgjet, kampet e internimit e të punës së detyruar, dhomat e torturave, vendet e pushkatimit. Ngritjen e një Memoriali Qendror Kombëtar në respekt të martirëve dhe të një Muzeu të posaçëm për Diktaturën. Si masë paraprake para muzealizimit kërkojmë marrjen e menjëhershme në mbrojtje të veçantë ligjore të vendeve të vuajtjes, përpara se ato të tjetërsohen nga degradimi natyror dhe mbivendosja mbi to e projekteve bujqësore a industriale, shtetërore a private.

6. Rishqyrtimin e kurrikulave mësimore në ciklin shkollor duke propozuar krijimin e një grupi pune të përbërë nga juristë, studiues, historianë dhe specialistë të fushës, për t'i ofruar Ministrisë së Arsimit propozime konkrete. Kjo do të garantonte një brez të ri më të informuar për historinë e diktaturës, më të ndërgjegjshëm për vlerat e sistemit demokratik.