Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Pikëpyetjet e marrëveshjes Itali-Shqipëri: Të huajt pa gjyqtarë, azili dhe vërtetimet vetëm elektronikisht

Politiko 22 Nëntor 2023, 12:31

Pikëpyetjet e marrëveshjes Itali-Shqipëri: Të huajt pa

Marrëveshja Itali-Shqipëri për refugjatët ngjalli polemika që në momentin e nënshkrimit, mes kryeministrit Edi Rama dhe homologes së tij Giorgia Meloni. E cilësuar nga kritikët si një pakt që shkel të drejtat e njeriut dhe mbi të gjitha të emigrantëve, marrëveshja në fjalë parashikon 30 mijë emigrantë të jashtëligjshëm që do të strehohen në Shqipëri.

Një ditë më parë, ministri i Jashtëm dhe njëherazi zv.kryeministri, Antonio Tajani, tha se marrëveshja mes dy vendeve fqinje nuk mund të krahasohet me paktin britanik për të dërguar emigrantët e paligjshëm në Ruandë. Madje ai tha se do të ketë edhe një projekt-ligj ratifikimi për marrëveshjen. Por, Tajani nuk dha më shumë detaje.

“Il Fatto Quotidiano” në një artikull ngre shumë pikëpyetje për shpenzimet që do të mbulohen me lekët të cilat pritet të akordohen në kuadër të marrëveshjes.

Gazeta italiane shkruan se është e paqartë nëse do të ketë apo jo gjyqtarë italianë në Shqipëri për emigrantët, madje në pikëpyetje janë edhe përkthyesit.

Po ashtu, “Il Fatto Quotidiano” ngre pikëpyetje edhe mbi përputhshmërinë me konventat ndërkombëtare, duke sjellë shembullin e Lampeduzës e cila u dënua nga Gjykata e Strasburgut për trajtim çnjerëzor të emigrantëve.

Artikulli i plotë:

Nuk do të ketë gjyqtarë italianë në Shqipëri, të paktën fizikisht, për të vërtetuar ndalimin e emigrantëve. Komisionet që vendosin për azilin nuk do të kalojnë Adriatikun. Nuk do të ketë as avokatë, përveçse me shpenzimet e tyre. Është ende për t’u përcaktuar aplikimi konkret (i parashikuar në pranverë) i marrëveshjes italo-shqiptare e 6 nëntorit për ndërtimin e dy qendrave ku Italia do të kyçë deri në 3000 azilkërkues dhe të huaj në proces dëbimi, por në ‘Viminale’ (godina e kryeministrisë italiane), ku trajtohet problemi i mbajtjes së kostove të operacionit të paralajmëruar nga Giorgia Meloni, për momentin po mendohen ‘të gjitha procedurat elektronike – burime të kualifikuara të konfirmuara – siç bëhet edhe në Itali’.

Kush e di nëse do të kenë përkthyes? Ky ishte orientimi deri dje, në ditën kur ministri i Jashtëm njëkohësisht zëvendës kryeministri italian, Antonio Tajani prezantoi dje pasdite (21 nëntor) marrëveshjen Rama-Meloni para Dhomës së Deputetëve në Parlamentin Italian. Ai bëri gjysmë hapi prapa, i rrethuar nga opozita. Në fakt, ai premtoi ‘një projekt-ligj ratifikimi që përmban gjithashtu rregulloret dhe ndarjet e nevojshme’. Megjithatë, deri më tani, qeveria kishte përjashtuar nevojën e autorizimit parlamentar për ratifikimin, gjë që do të zgjasë procesin.

Tajani ‘nuk zgjidhi shumë nyje të tjera’ dje gjatë seancës plenare. Ndoshta qeveria nuk do ta bëjë këtë përpara fundit të janarit, kur Gjykata e Kasacionit do të vendosë mbi urdhrat e gjyqtarëve të Katanias, të cilat përjashtonin ndalimin automatik të të gjithë azilkërkuesve që vijnë nga vende të sigurta si Tunizia. Ata janë njerëzit e destinuar për në Shqipëri: duhet të qëndrojnë vetëm për 28 ditët e parashikuara nga direktiva e BE-së për procedurat e përshpejtuara të azilit, e cila megjithatë në realitet zgjat disa muaj. Pas këtij afati ku do të shkojnë?

Pastaj është çështja e përputhshmërisë me konventat ndërkombëtare që ndalojnë refuzimet kolektive dhe rekomandojnë sjelljen e azilantëve në portet më të afërta, të sjella në vëmendje dje (21 nëntor) nga shoqatat e ‘Tryezës së Rrumbullakët për Azilin dhe Imigracionin’.

Këto nënvizojnë dënimin e fundit të Italisë nga Gjykata e Strasburgut për trajtim çnjerëzor dhe degradues në Lampeduza dhe i kërkojnë Parlamentit të mos ratifikojë marrëveshjen me Tiranën. Mbetet gjithashtu çështja e kostove: po flasim për 30 milionë euro vetëm për shtesa, udhëtime, ushqime dhe akomodim për 300 policët e nevojshëm. Dhe pastaj: ku, si dhe nga kush do të ndahen të miturat dhe gratë shtatzëna nga ata që shkojnë në Shqipëri? A do të ndahen familjet? Pyetjet mund vazhdojnë pafund.