“Plasi lufta, Tatimet zbuluan diçka”, zbardhen bisedat e zyrtarëve të arrestuar të Bashkisë: Lali Eri është aksionet tek hoteli

Ndërsa iu arrestuan 5 drejtorët kryesorë të përfshirë në afera korruptive me kompaninë “5 D”, del në dosje edhe emri i kryebashkiakut Erion Veliaj. Duke folur për hotelin që ndërtohet nga kompania e Redi Mollës, punonjësja Jona Bejko ndërsa flet me një person me emrin “Arban”,  i thotë se Lali Eri është aksioner, është pronar i këtij hoteli. Hoteli luksoz, që mban emrin e një prej markave të njohura të hotelerisë, po ndërtohet buzë deti në shëtitoren kryesore në Durrës dhe ka një vlerë prej 20 milionë eurosh.

Kryebashkiaku i Tiranës Erion Veliaj del në dosjen korruptive të 5 drejtorëve të bashkisë.

Nga bisedat e zbërthyera në celularët e sekuestruar të punonjësve të kompanisë “5D konstruksion”, Veliaj përmendet si aksioner i një hoteli me vlerë 20 milionë euro në Durrës, bashkë me Redi Mollën që sot është në burg.

Por ndonëse ky fakt është zbardhur në bisedat mes punonjësve të kompanisë “5D kontruksdion”, të Redi Mollës e Mariglen Qatos, SPAK nuk është thelluar për të provuar deklarimet që bëjnë bashkëpunëtorët më të ngushtë të drejtorëve.

Jona Bejko, punonjëse e “5D” komunikon me një shtetas me emrin Arban ku flasin për tema që kanë lidhje me punën e përditshme. Bejko mes të tjerave i dërgon foton e një hoteli bashkëbiseduesit, ku më pas sqaron se kush janë pronarët, teksa i sjell në vëmendje kolegut rrogat e ulëta me të cilat paguhen në një kohë kur eprorët ndërtojnë hotele.

JONA BEJKO: “Këtë hotelin po e bëjmë ne. Është aksioner pronari jonë, Lali Eri e këta. Dhe unë marr vetëm 600 mijë lekë të qelbta. Plasi lufta këtej nga zyra. U zu me shefen e financës keq fare Nestori. Ajo i përplas derën në fytyrë. Ky e përzë në shtëpi. Qr mirë që s’u rrafën s’e ke idenë çfarë bëri këtu. Me të thënë Nestori pra hapur fare në anën e kujt je”.

Ky është pikërisht hoteli luksoz, që mban emrin e një prej markave të njohura të hotelerisë, dhe po ndërtohet buzë deti në shëtitoren kryesore të Durrësit ndërsa ka një vlerë prej 20 milionë eurosh.

Por ky fakt që për SPAK me sa duket nuk tërhoqi vëmendje për të kryer verifikime, përforcon më tej dyshimet e arsyeshme mbi pastrimin e parave të zyrtarëve të lartë, përmes një tjetër komunikimi të zbërthyer nga organi i akuzës.

Jona Bejko i thotë kolegut të saj se në fillim të vitit të janarit 2023 disa inspektore tatimor kanë parë disa dokumente te zyra e Financës që nuk duhet t’i shihnin.

JONA BEJKO: “Koleg, kam lajme këtej nga zyra. Plasi lufta. U grinë N me J. Se ke idenë ça lufte po them. Se erdhën tatimet për kontroll në mëngjes. Sa u hap dera, direkt pa na thënë asgjë. U futën të zyra e financës duke prek dhe hap çdo gjë pa leje. Seç kapën ca gjëra që s’duhet ti shifnin. Kjo përplasi derën. Ai tha kujt i përplas derën. Merr çantën ik shpi debile”.

E me sa duket, drejtorët jo vetëm që u frikësuan nga zbulimi i gjërave që nuk duhej të zbuloheshin, dhe që dyshohet se bëhet fjalë pikërisht për një hotel që po ndërtohej në Durrës i denoncuar nga opozita dhe media, se ka aksione Redi Molla, por “fluturojnë” nga puna e marrin kur të duan në punë punonjës.  Në një tjetër bisedë të Jona Bejkos me shtetasin Algert Çifligu, evidentohet një takim pikërisht në hotelin që ndërtohej mes drejtorëve Mariglen Qato, Redi Molla e Nestor Muhametllari. Pas sherrit sipas Çifligut, në Durrës bëhet gjyqi.

ALGERT ÇIFLIGU: “Sot bëhet gjyqi, janë në Durrës. Marigleni, Redi dhe Nestori. Tek objekti, një rrugë e dy punë”

Afrimiteti mes Redi Mollës dhe kryebashkiakut Erion Veliaj, nga punonjës të administratës apo si në rastin konkret të Jona Bejkos, konstatohet edhe më tepër, kur kjo e fundit, thotë se Molla urdhëron punonjësit të dalin në fushatë.

Ajo i thotë Algertit se zgjodhi sektorin privat të punonte pikërisht mos përfshihej me politikë, por që sipas saj, Redi Molla është i dyti pas Erion Veliajt ku i referohet me emrin ‘Lali’.

JONA BEJKO: “Më ftoj te kafja, më tha të merresh me partinë te lagjja. I thashë prandaj kam zgjedhur të punoj në privat, që të mos i bëj fresk njeriu. Po se ai i joni është i dyti mbas lalit”.

SPAK zbardhi të paktën 13 procedura të tenderimit publik, të fituara nga “5D konstruksion”, pronar të të cilës ishin vetë drejtorët që po vetë kontraktonin e firmosnin në favor të kompanisë. Redi Molla e Mariglen Qato përfunduan në pranga, Taulant Tushës iu komunikua një tjetër masë arresti në burg në qeli ku ndodhet për inceneratorin e Tiranës. Ndërkohë për 6 të tjerë u caktua masa detyrim paraqitje, ku shumica prej tyre janë anëtarë të komisioneve për vlerësimin e ofertave./ SYRI TV