Media italiane: Qendrat e emigrantëve në Shqipëri shërbejnë për fushatën e zgjedhjeve Europiane të Melonit

Marrëveshja e firmosur mes qeverisë shqiptare dhe asaj italiane për pritjen e rreth 36.000 emigrantëve në dy kampe që parashikohet të ndërtohen në Shëngjin dhe Gjadër ka marrë sërish vëmendjen e mediave italiane.

Kështu, sot ballina e prestigjiozes italiane "L'Espresso" është hapur me artikullin e titulluar “Mbretëresha Giorgia e Shqipërisë”.

Sipas këtij artikulli, qendrat e emigrantëve në Shqipëri shërbejnë për fushatën e zgjedhjeve Europiane të Melonit.

“Qeveria kërkon të djeg të gjitha etapat pa kursyer cdo kosto. Do të arrihet në 1 miliardë euro për procedurat speciale. Para që do u merren shëndetësisë,  arsimit transportit”, thuhet në kryeartikull.

Shkrimi i medias italiane: 

Qendrat e emigrantëve në Ballkan janë të nevojshme për fushatën zgjedhore evropiane të Melonit. Pra, qeveria dëshiron të ecë përpara pavarësisht shpenzimeve: kostoja do të arrijë në një miliard, me procedura të veçanta. Të gjitha janë para të marra nga shëndetësia, arsimi, kultura dhe transporti. “Në muajt e fundit, Kryeministrja ka folur vazhdimisht për “mbrojtjen e kufirit” për të ngadalësuar “pushtimin” e emigrantëve që vijnë nga brigjet e Afrikës së Veriut.

Numrat, megjithatë, tregojnë një histori shumë të ndryshme. Asnjë pushtim, asnjë sulm ndaj Italisë”, shpjegon Bianca Senatore. Ndërsa Bruno Manfellotto analizon paqartësinë politike të Melonit, mes ledhatimeve dhe përqafimeve me të mëdhenjtë e Tokës. Dhe regjisori Enrico Bellavia, në editorial, kujton sesi konsensusi është shteruar nga frika e shkaktuar: «Ne gjithmonë fillojmë duke ngritur një alarm, pavarësisht nëse është i vërtetë apo i supozuar – dhe “pushtimi” i emigrantëve i bindet kategorisë së dytë – për të përfunduar me një zgjidhje muskulare si dekreti Cutro. Nëpërmjet një vetë-konsumimi bulimik të burimeve, të diktuar nga një axhendë indiferente ndaj urgjencave të vendit”.

“Lulëzimi i Forza Italia, përtej çdo parashikimi të arsyeshëm pas vdekjes së themeluesit dhe liderit absolut të saj, duhet të llogaritet ndër fenomenet paranormale të këtij viti 2024. Me siguri, që ne duhet ta quajmë Melonin një Mbretëreshë të Shqipërisë, në lidhje me marrëveshjen e saj të arritur me vendin fqinj”.

Kujtojmë se marrëveshja e firmosur në Romë mes kryeministres italiane Georgia Meloni dhe kryeministrit shqiptar Edi Rama përfshin emigrantët që nisen nga Afrika e Veriut dhe kapen në det nga anijet italiane. Marrëveshja parashikon ngritjen e një pike në Shëngjin, ku do të kryhen procedurat e verifikimit të emigrantëve dhe i një qendre në Gjadër, ku refugjatët do të mbahen të izoluar, deri në përfundim të procedurave për pranimin ose jo të azilit. Qeveria italiane e miratoi marrëveshjen dhe Gjykata Kushtetuese e Shqipërisë gjithashtu dha “ok” për të.

Në kampin e parë pritet të bëhet verifikimi i të dhënave personale të refugjatëve, ndërsa në të dytën, ata duhet të qëndrojnë deri në përfundim të procedurave për azil. Të dy kampet parashikohet të jenë nën juridiksionin italian dhe ndërtimi dhe funksionimi i tyre do mbulohet financiarisht nga pala italiane. Gjithashtu, është planifikuar dhe një burg në Gjadër që do të kushtojë 25 milion euro për pesë vite dhe do të ketë hapësira për 20 të burgosur.

Marrëveshja parashikon sjelljen në Shqipëri të 3 mijë refugjatëve në muaj, 36 mijë refugjatëve në vit, teksa është nënshkruar për 5 vite, me mundësi zgjatjen më tej me miratimin e të dy palëve.

Vlen të theksohet fakti se marrëveshja u nënshkrua në “terr” të plotë, ku madje fillimisht as deputetët socialistë nuk ia kishin idenë se për çfarë bëhej fjalë, ndërsa shqiptarët si gjithmonë nuk i pyeti askush rreth shqetësimeve se kjo nismë do nxiste trafikimin e qenieve njerëzore, apo do të krijonte probleme serioze me sigurinë pasi mes refugjatëve mund të ketë edhe individë me qëllime terroriste.

Kujtojmë se fillimisht për vendet e BE-së, ishte çuarje e refugjatëve në Ruanda, por pasi u rrëzua kjo pistë Rama iu përgjigj menjëherë me një “PO” homologes italiane Meloni. Pra, Shqipëria pasi ka mbushur kapanonet e azilantëve në vendet e BE-së me njerëzit e saj, vetëofrohet për të ngritur kampe për pritjen e refugjatëve nga vendet e “botës së tretë”.