Qeveria hap ‘thesin’, miliarda lekë investime publike për 2023-shin, kryeson ministria e Ballukut

Qeveria ka miratuar në total 116.25 miliardë lekë shpenzime për investimet publike në vitin 2023 për 964 projekte.

Një analizë e Open Data, tregon se vlera e investimeve shtetërore për vitin 2023 përbën 5.34% të PBB (Prodhimi i Brendshëm Bruto) ose 16.9% të totalit shpenzimeve buxhetore të parashikuara.

Në kryet të piramidës, qëndron Ministria e Infrastrukturës dhe Energjetikës me një vlerë investimesh prej 17.7 miliard lekë. Në vend të dytë, renditet Fondi Shqiptar i Zhvillimit (FShZh) i cili është parashikuar të shpenzojë një vlerë prej 16.8 miliardë lekë.

Si MIE ashtu edhe FShZh jo rrallë janë akuzuar për shpërdorim fondesh dhe tejzgjatje projektesh me qëllim përfitimi nga buxheti i shtetit.

Shpenzimet e parashikuara për secilin institucion janë për një numër projektesh që kanë nisur më herët dhe nuk kanë përfunduar ende ose për projekte që pritet të nisin në vitin 2023.

Buxheti i Shtetit ka parashikuari edhe për pushtetin vendor ku janë transferuar investime për 2023 për disa bashki. Ndër to kryesojnë Tirana, Berati, Mati dhe Pogradeci. Në total për bashkitë buxheti i shtetit ka parashikuar në 2023 një portofol Investimesh me vlerë 5.15 miliard Lekë.

Bashki që nuk kanë buxhetim për investime për vitin 2023 janë Durrës, Shkodër, Gramsh, Delvinë, Fushë Arrëz dhe Bashkia Vorë. Vora dhe Durrësi ndërkohë përfitojnë nga Programi i Rindërtimit pas tërmetit.

Po ashtu, janë 7 PPP koncesione të cilat mbështeten nga shpenzimet e investimeve në buxhetin e shtetit, të cilat janë PPP për  përmirësim, ndërtim, operim dhe mirëmbajtje e rrugës së Arbrit.

Projekt Investimet me peshën më të lartë në buxhetin e shtetit për vitin 2023

Projekti Ndërtim i Tuneli i Llogorasë, totalisht me financim të brendshëm dhe vlerë për vitin 2023 prej 6.9 miliard Lekë. Ka nisur në vitit 2021 dhe në total ka 20 miliard lekë parashikim. Pritet të Përfundojë në 2024. Zbatohet nga një bashkim operatorësh të huaj.

Projekte per Forcat e Luftimit (Reparti Ushtarak Nr.1001 Tirane (3535), me 4.1 miliard lekë për vitin 2023 është një tjetër parashikim Investime. Ky projekt në total ka vlerën 16.7 miliard lekë, ka filluar në vitin 2022 me afat përfundimi 2025.

Projekt Investime në Forca Luftarake ka vlerë të parashikuar 3 miliard dhe përkon me Forcat Tokësore. Ky është një projekt i ri me financim të brendshëm që pritet të mbyllet brenda vitit 2023.

Projekti per mbështetje ne sektorin energjetik (Aparati i MIE (OSHE dhe OST), ka peshën 3 miliard lekë në vitin buxhetor 2023 dhe në total 20.5 miliard lekë, e përfundon në 2025.

Agjencia Kombëtare e Shoqërisë së Informacionit do të zbatojë gjatë 2023 Projektim Përmirësimi i Sistemeve Digjitale me 3 miliard lekë. Në total deri në 2025 për këtë projekt do të shpenzohen  9.2 miliard lekë.

Ndërtim segmenti rrugor Qukës – Qafë Plloçë, për 2023, ka vlerë 2.95 miliard lekë, dhe në total 26 miliard lekë, është me financim të huaj nga Fondi Saudit për Zhvillim.

Programi IPARD III (2021-2027), është projekt i Agjencisë së Zhvillimit të Bujqësor dhe Rural në vlerën 2.88 miliard lekë për vitin 2023.

Investimi i tetë më i lartë për vitin 2023 është Kontrata e Koncesionit PPP per përmirësimin, ndërtimin, operimin dhe mirëmbajtjen e rrugës se Arbrit. Është financim i brendshëm në vlerën 2.84 miliard lekë vetëm për vitin 2023.

Projekti Infrastruktura Bashkiake V, projekt i Agjencisë Kombëtare të Ujësjellës dhe Kanalizimeve dhe Infrastrukturës së Mbetjeve me Financim të huaj ku për vitin 2023, janë miratuar 2.69 miliard lekë. Në total projekti  ka 9.84 miliard lekë dhe pritet të finalizohet me 2023.

Armatimi i lehte municion dhe makineri  pajisje për Forca Tokësore është gjithashtu Projekt Buxhetor për Investime në listën e dhjetë projekteve më të madhe ku 2.17 miliard lekë janë parashikuar për këtë vit dhe vlerë totale 31.7 miliard lekë.