Rama premtoi se mbërrijnë në javën e tretë të janarit, ende asnjë gjurmë nga vaksinat e Pfizer në Shqipëri

Në fillim të vitit, përkatësisht në 1 janar, kryeministri Edi Rama deklaroi se javën e tretë të Janarit do të mbërrinin dozat e vaksinës dhe se kompania Pfizer do t’i shesë Shqipërisë 500 mijë doza gjatë këtij viti. Mirëpo, java e tretë kaloi, po mbaron edhe janari (sot data 27) dhe ende asnjë gjurmë të vaksinave anti-covid.

Gjatë një konference me gazetarët,në 18 janar, Rama tha se ardhja e dozave është shtyrë edhe me një javë, kjo për shkak të procesit të dorëzimit të dozave nga vetë kompania Pfizer, vendim ky që sipas Ramës ka ndezur polemika në shumë shtete. 

“Pfizer ka bërë një deklaratë që ka ndezur zjarr dhe polemika me shumë shtete duke thënë që do ta shtyjë për një javë procesin e dorëzimit të dozave që ka kontraktuar. Si t’ja bëjmë tani?”, u shpreh Rama.

 Më herët, kryeministri deklaronte se 10,750 dozat e para të vaksinës do të mbërrijnë në Shqipëri brenda janarit si pjesë e blerjes së 500 mijë dozave nga kompania Pfizer.

“Kemi dakordësuar marrjen e vaksinës nga kompania Pfizer. Kemi dakordësuar blerjen e 500 mijë vaksinave,” deklaroi Rama, por nuk bëri të ditur se me çfarë kushtesh është arritur blerja e tyre.

Ndërkohë, mbrëmë në emisionin ‘Open’, kryetarja e komitetit teknik të Ekspertëve, Mira Rakacolli tha se plani i vaksinimit do vazhdojë pa probleme, ndërsa nga vonesa nga Pfizer është problem botëror.

“Vaksinimi po vazhdon ndërkohë, është e sigurt dhe doza e dyte për ata  që kanë bërë të parën. Nuk do ketë ndërprerje . Siç tha kryeministri Rama jemi në komunikim të vazhdueshëm me Pfizer, që nuk na ka thënë që nuk do e respektojmë kontratën.
Arsyeja e vonëses nuk është vetëm ne por ne te gjithë botën“, tha Rakacolli.

Dozat e para

Ndërkohë, më 11 janar në Shqipëri filloi procesi i vaksinimit me bluzat e bardha, për ata që janë në vijën e parë të luftës me Covid-19, por ndër të parët që e mori dozën e parë ishte edhe kryeministri. Kjo u "shit" nga qeveria si arritje para premtimit, pra javën e tretë të janarit. 

Sipas planit të Komitetit Teknik të Ekspertëve më pas do të vijohej me mësuesit, policët dhe personat mbi moshën 75 vjeç.

Pjesa e parë e vaksinave prej 975 dozash u dha dhuratë nga një shtet anëtar i BE-së, emri i së cilës nuk u bë i ditur. Deri tani janë kryer rreth 700 doza dhe procesi po realizohet në stadiumin kombëtar ‘Air Albania’ ku janë vendosur 60 postacione, ndërsa ende nuk ka asnjë informacion se kur pritet të mbërrijë sasia tjetër e vaksinave.

Madje, në seancën e pare parlamentare, Rama shprehu ambicien të arrijë një skenar në Shqipëri për të përfunduar vaksinimin brenda 14 muajsh. Kujtojmë se në kete senace, parlamenti miratoi tre aktet normative të marrëveshjes Shqipëri-Pfizer. Të treja aktet normative morën dritën jeshile për t’i hapur rrugën ardhjes së dozave të vaksinave anti-Covid në Shqipëri. 

Marrëveshja me Covax

Po ashtu, në hije mbetet edhe përgjigja në lidhje me porosinë prej 1.1 milionë doza vaksine të paguara nga qeveria shqiptare pranë programit Covax.

Ministrja e Shëndetësisë Ogerta Manastirliu ka deklaruar dy ditë më parë se Shqipëria është në dritaren e parë të sigurimit të dozave të vaksinës anti COVID përmes COVAX.

“Lajm i mirë. Me parapagimin e 3.9 milion dollarë nga qeveria, Shqipëria është në dritaren e parë të sigurimit të dozave të vaksinës antiCOVID nëpërmjet mekanizmit COVAX ”, shkroi Manastirliu teksa kishteshpërndarë në Tëitter një deklaratë të kreut të OBSH.

"COVAX ka nënshkruar një marrëveshje me Pfizer/ BioNTech për deri në 40 milion doza të vaksinës së saj COVID19. Ne gjithashtu presim të shpërndajmë pothuajse 150 milion doza të vaksinës AstraZeneca/ Oxford në 1/4 e 2021, pasi vaksina të jetë e shënuar për përdorim urgjent nga OBSH”, shkruante kreu i OBSH.