Raporti që rrëzon propagandën: Shqipëria e fundit në Evropë për cilësinë e ujërave larës

Nga Atlantiku në Mesdhe, shumica e ujërave larës në Evropë janë të një cilësie të shkëlqyer për not kur vlerësohen me parametrat e kërkuara sipas Bathing Water Directive (BWD).

Cilësia e ujërave larës në Evropë është përmirësuar ndjeshëm në dekadat e fundit. Kjo për shkak të një reduktimi drastik të ndotësve organikë dhe patogjenëve të lëshuar më parë në ujërat e zeza urbane të patrajtuara ose pjesërisht të trajtuara.

BWD ka kryer së fundmi një inspektim, raport, i cili përqendrohet në monitorimin e Escherichia coli dhe enterokokëve të zorrëve, tregues të rëndësishëm të kontaminimit fekal, i cili përbën një rrezik për shëndetin e njeriut për shkak të pranisë së mundshme të patogjenëve.

Nga 22,127 ujërat e larjes të raportuara në Evropë në vitin 2024, 85% ishin me cilësi të shkëlqyer. Në pesë vende - Qipro, e ndjekur nga Bullgaria, Greqia, Austria dhe Kroacia - 95% ose më shumë e ujërave të larjes ishin me cilësi të shkëlqyer.

Në Bullgari, e ndjekur nga Malta, Luksemburgu, Rumania dhe Sllovenia, të gjitha ujërat e larjes ishin të paktën me cilësi 'të mjaftueshme' në vitin 2024.

Nga ana tjetër, më pak se 70% e ujërave të larjes ishin me cilësi të shkëlqyer në pesë vende, d.m.th., në rend zbritës, Belgjika, Hungaria, Estonia, Polonia dhe Shqipëria (Figura 2).

Raporti që rrëzon propagandën

Pra, Shqipëria renditet në vendin e fundit sa i përket cilësisë së ujërave larës. Përtej propagandës që qeveria i servir shqiptarëve, raporti i BWD tregon të kundërtën e asaj që trumbetojnë autoritetet.

Shqipëria, e bekuar më shumë vende piktoreske, natyrë të larmishme, përballet me politika diskriminuese që kanë vetëm një synim: të sjellin sa më shumë turistë duke i vënë përballë një përpjestimi të zhdrejtë, sa i përket kushteve dhe çmimeve tejet të larta.

E megjithatë, turistëve iu servirim dhe një cilësi jo të mirë të ujërave larës, edhe pse oublikisht, Rama dhe ministrja e tij Kumbaro, kujdeset ta fshehë duke dëshmuar vetëm ‘sukseset’ e spastrimit të plazheve nga zaptimet me shezlonge private.

Autoritetet fshehin hartën

Çdo shtet e ka detyrim për transparencën e publikut të tregojë në hartë cilësinë e ujërave të larjes. Nëse marrim shembullin e Greqisë, kur klikojmë tek linku i vendosur në hartë hapet faqja zyrtare e institucionit respektiv për mbrojtjen e mjedisit.

E kundërta ndodh me Shqipërinë. Nëse klikoni tek linku i vendosur në hartë, faqja nuk ekziston. Agjencia Kombëtare e Mjedisit nuk ka vendosur asnë informacion mbi cilësinë e ujërave larës në vendin tonë. Duket se agjencia ka zgjedhur ta fshehë renditjen e Shqipërisë në vendin e fundit për cilësinë e ujërave larës.