Rasti 'Veliaj', Lala: I pari në Shqipëri që një zyrtar ustron detyrën në arrest

Kryebashkiaku i Tiranës, Erion Veliaj do të vijojë të qëndrojë në burg. Apeli i Gjykatës së Posaçme rrëzoi kërkesën e tij për lirimin nga qelia me garanci pasurore, duke lënë në fuqi masën e sigurisë "arrest në burg" të caktuar ndaj tij.  
Gazetarja Klodiana Lala shpjegoi në MCN se ky është rasti i parë në Shqipëri ku një zyrtar i zgjedhur vendor mbahet në arrest gjatë ushtrimit të detyrës, dhe vendimi përfundimtar pritet nga Gjykata e Lartë, e cila do të vendosë nëse ai do të qëndrojë apo jo në burg.

“Ligji e detyron Prokurorinë e Posaçme që çdo dy muaj të informojë gjykatën për personat që kanë nën hetim.

Në rastin konkret, prokuroria ka kryer këtë veprim hetimor dhe gjyqësor në një seancë të zhvilluar në muajin prill, ku informoi gjykatën për të gjitha veprimet paraprake hetimore ndaj zotit Veliaj, kryetarit të Bashkisë Tiranë, bashkëshortes së tij Ajola Xhoze, si dhe gjashtë biznesmenëve të tjerë që janë nën hetim për veprat penale të korrupsionit dhe pastrimit të parave.

Sipas ligjit, kur prokurorët ose gjykatësi paraprak konstatojnë se nuk ka më veprime hetimore për t’u kryer, mund të urdhërojnë shkurtime në kohën e hetimit ose të shqyrtojnë masat e sigurisë.

Gjykata e shkallës së parë vendosi që masa e sigurisë për zotin Veliaj të mos ndryshonte, pasi nuk kishin ndryshuar kushtet dhe kriteret mbi bazën e të cilave ishte caktuar kjo masë.

Ky vendim u apelua nga vetë zoti Veliaj, i cili kërkoi rishikimin e masës, duke argumentuar se nuk ekzistonte më asnjë arsye për qëndrimin në arrest me burg, dhe se ai duhej të kthehej në detyrën e kryetarit të Bashkisë Tiranë, pasi nuk ekzistonte rreziku që të prishte provat apo të intimidonte dëshmitarët.

Në seancën e sotme, ku ishte i pranishëm vetëm avokati i zotit Veliaj (pasi kryetari i bashkisë nuk mori pjesë), dhe ku mori pjesë edhe biznesmeni Elman Abule me avokaten e tij, avokatët kërkuan zbutjen e masës për zotin Veliaj, duke propozuar si alternativë garancinë pasurore, pa specifikuar shumën, që do të vendosej nga gjykata.

Megjithatë, gjykata vendosi që zoti Veliaj duhet të qëndrojë nën masën e sigurisë arrest në burg, duke argumentuar se ende ka veprime hetimore për të kryer dhe ekzistojnë dyshime të arsyeshme që ai mund të ndikojë tek dëshmitarët apo të prishë provat, sidomos nëse lirohet me masë më të lehtë sigurie.

Ndërkohë, biznesmeni Abula u la në arrest shtëpie, pasi për të masa e sigurisë u zbut nga arrest me burg në arrest shtëpie, që nga koha kur ai u paraqit në gjykatën e apelit.

Në lidhje me këtë çështje, duhet theksuar se Zoti Veliaj ka ngritur ankim në Gjykatën e Lartë kundër masës së arrestit në burg, ashtu si edhe të dyshuarit e tjerë, përfshirë bashkëshorten dhe biznesmenët e përfshirë.

Deri tani, në praktikë, Gjykata e Lartë nuk ka lehtësuar masat e sigurisë në raste të tilla, si për shembull rastet e zotit Berisha apo zotit Meta.

Megjithatë, ky është rasti i parë kur një zyrtar i zgjedhur vendor, si kryetari i Bashkisë Tiranë, është arrestuar gjatë ushtrimit të detyrës.

Ndryshe nga ish-zyrtarët e tjerë që janë arrestuar jashtë ushtrimit të detyrës, zoti Veliaj është i vetmi që është në detyrë dhe për këtë arsye Gjykata e Lartë do të përballet me një dilemë të madhe, duke marrë parasysh edhe funksionin që ai vazhdon të ushtrojë.

Nëse ankimi i tij rrëzohet, paraburgimi mund të zgjatet minimalisht për një vit, deri në një rivlerësim të mundshëm të masave.

Nga ana tjetër, duke marrë parasysh veprat penale për të cilat dyshohet (korrupsion dhe pastrim parash), praktika e deritanishme e SPAK-ut, gjykatës së posaçme dhe Gjykatës së Lartë ka qenë që të mbahen masa të rrepta sigurie, kryesisht arrest me burg.

Vetëm në raste të jashtëzakonshme, si sëmundje të rënda apo detyra familjare, është lehtësuar masa e sigurisë.

Në rastin e zotit Veliaj, situata është përkeqësuar edhe më shumë, pasi SPAK pretendon se ai ka drejtuar sulme ndaj gjyqtarëve dhe prokurorëve edhe nga burgu.

Ky është argumenti kryesor përse prokurorët e posaçëm insistojnë që ai të mbetet në arrest me burg, seancë pas seance.”