Rrëfehet sërish Dan Hutra: Kisha hapur një varr, do të fshihesha pasi të vrisja Rahmanin

Vrasësi i tre grave në Tiranë, Dan Hutra është rrëfer sërish nga qelia e burgut 302 ku po vuan dënimin pas masakrës që kreu në Paskuqan.

Në një intervistë për gazetarin Spartak Koka për emisionin “Uniko”, Hutra ka rrëfyer se pas vrasjes së katërt, që ishte Rahman Sela, kishte planifikuar të fshihej në një varr të cilin e kishet hapur vetë disa ditë para.

Hutra tregon se kishte dy mundësi, ose të fshihej në varr ose të dorëzohej. AI tregon se varri e kishte hapur gjatë natës në Sharrë. Hutra thotë se familjarëve nuk iu ka treguar, por iu ka thënë t’i bëjnë gati çantën për të ikur në Gjermani.

Hutra këmbëngulte se Rahman Sela ishte personi që kishte pajisur me armë autorin e vrasjes së babait të tij shumë vite më parë. Hutra u gjet nga efektivët e policisë pas denoncimit nga një qytetar, pikërisht disa metra larg banesës së Selës.

Pjesë nga intervista:

Dan Hutra: Pasi do vrisja Rahmanin, kisha hap një varr edhe do futesha atje në varr. Të çoheshin këta në daç me helikopter, në daç me.. nuk do më gjenin dot ore.

Spartak Koka: Ku e kishe hapur varrin?

Dan Hutra: Në Sharrë. E kisha hapur natën, nja 2-3 netë para se me ashtu ato. Do vrisja Rahmanin, do futesha pastaj atje ose do dorëzohesha. Edhe mund të dorëzohesha. Se pas Rahmanit s’kisha më.

Spartak Koka: Varrin që ke hapur, sa metra larg nga vendi që të kanë kapur është?

Dan Hutra: Është shumë larg. Shiko, unë e kisha llogarit vrasjen e Rahmanit do dilja poshtë aty ku më ka kapur policia, do dilja do futesha poshtë te rruga poshtë te varrezat, do futesha te varrezat, është shumë larg varri që e kam hapur. Unë jam futur brenda, e kam provuar veten a më merr a s’më merr.

Spartak Koka: Do futeshe vetë? E kishe hapur për vete?

Dan Hutra: Vetë e kam rregulluar, vetë e kam studiuar, nuk ka ditur askush asnjë gjë. Dhe në Kukës atë ditë kur kam ikur nga Kukësi, i kam thënë familjarëve më bëni çantën gati se unë pasnesër iku për Gjermani. Po pasaportën më thanë. Pasaportën i thashë do ta marr nesër.