Rrëmbimi i 3 policëve, ironia e Fugës: Politika shqiptare hesht, rritet rroga shkurtohet mendja

Akademiku Artan Fuga  ka reaguar lidhur me ngjarjen e djeshme ku tre policë kosovar morën rob nga ana e serbëve.

Referuar rrëmbimit të 3 efektivëve, Fuga është shprehur se Kombet e civilizuara i zgjidhin incidentet kufitare me maturi, bashkëpunim.

Sipas tij, nuk ka asnjë rëndësi se në cilin territor u kapën 3 efektivët, atë kosovar apo serb.

Në një postim në Facebook, Fuga shkruan se për krizën në Veri të Kosovës, partitë politike në Shqipëri heshtin, hesht Kuvendi, hesht qeveria.

“Po ne na u rrit edhe rroga! Rritet rroga shkurtohet mendja!”, shkruan me ironi Fuga.

Reagimi i plotë:

Kombet e civilizuara i zgjidhin incidentet kufitare me maturi, bashkëpunim!

E tmerrshme, çfarë na ndodh, sa shumë jemi budallallepsur!

Diskutojmë nëse policët e Kosovës, ushtarakët serbë i kapën në territorin e Kosovës, apo kishin kaluar kufirin për të dalë në territorin e Serbisë!!! A thua se është çështje metrash, dhe jo një problem që krkon gjykim politik

Pa pikë rëndësie. Sikur t’i kishin rrëmbyer brenda kufirit të Kosovës, sigurisht kjo do të ishte një ngjarje me përmasa shumë të rënda. Por, ja e zemë se ata tre policë i zunë në territorin serb.

E cfarë pastaj? Në kufi edhe ndodh. Kush të jep të drejtën t’i mbërthesh, t’i trajtosh sikur të ishin terroristë, të mos japësh prova, të mos bësh notë proteste, të mos bashkëpunosh për t’i zgjidhur këto incidente kufitare kaq minore, por që pastaj përdoren brenda strategjisë të nxitjes të konflikteve që lidhen me gjendjen në Veri, me Asociacionin, me këtë ose atë.

Parimisht, shteti i Kosovës, boll i kishte hallet me serbët, nuk kishte përse të shtynte policët t’i shtonin ujë gotës në të derdhur.

Por, e them, ç’rëndësi ka kjo përpara faktit që i mban si robër lufte tre policë në vend të bashkëpunosh për të zgjidhur incidentin.

Kush po i mban ata tre policë ashtu? Kosova?Hë? Kosova?Njësoj pra qenka pozicionuar Serbia dhe Kosova?Kur sheh që në këtë marri bien edhe institucione prestigjioze ndërkombëtare, thua: O mjerë ne, ç’na ka gjet!

Këta i janë qepur, se ku ishin policët kur u rrëmbyen! O Zot, a mund të na japësh pak kulturë politike dhe mos na bësh të mos i dalim zot imazhit tonë!

Në vend të themi: Zgjidhini si njerëz konfliktet, bërtasi: I kaaapët brenda territorit kosovar! Kërkohen hetime se ku u kapën! Tmerr! Dhe për krizën në Veri të Kosovës, partitë politike në Shqipëri heshtin, hesht Kuvendi, hesht qeveria.

Asnjë deklaratë!

Po ne na u rrit edhe rroga! Rritet rroga shkurtohet mendja!