Rrëqeth vajza e Ardian Nikulajt, poston videon prekëse të të atit: Do na mungosh bab

Vajza e biznesmenit të njohur në Lezhë, njëkohësisht dhe ish-kandidati për deputet i Tom Doshit, Ardian Nikulaj, që u ekzekutua ditë më parë në lokalin e tij në Shëngjin, ka publikuar një video prekëse të të atit.

Në rrjetin social TikTok, Gleida Nikulaj ka ndarë me ndjekësit e saj një video nga 50-vjetori i Ardianit.

Ky i fundit me tortën përpara duket i rrethuar nga njerëzit e afërm dhe familjarët e tij, të cilët i përshëndet me dorë.

‘Fly high beautiful angel, do na mungosh bab,’ shkruan Gleida.

Cfarë raportoi policia?

"Rreth orës 13:30, në rrethana ende të paqarta, është vrarë me armë zjarri, në ambientet e lokalit të tij, shtetasi A. N. 50 vjeç, banues në Shëngjin.

Shërbimet e Policisë dhe grupi hetimor kanë shkuar menjëherë në vendngjarje.

Janë ngritur pika kontrolli dhe është rrethuar zona ku vijojnë kontrollet për kapjen e autorit/ve. Grupi hetimor, në drejtimin e Prokurorisë, vijon punën për zbardhjen dhe dokumentin e plotë të ngjarjes",

Dëshmia e personave që ishin prezent në lokal

Banakieri i lokalit ku u vra Nikulaj dhe një mik i viktimës, panë gjithçka nga ekzekutimi me 7 plumba që ndodhi në pak sekonda.

Miku i Nikulajt, ka qenë ndër të parët që është marrë në pyetje nga policia.

“Isha te dera edhe isha me fytyrë nga lokali nga Ardiani, kur më erdhi nga mbrapa nga ana e djathtë e imja, një burrë i gjatë. Ai më tha veç “largohu” dhe hyri brenda në lokal dhe shkoi në drejtim të Ardianit dhe qëlloi ndaj tij. Autori ishte i gjatë, trup i mbushur, kishte një zë të trashë, por theksin nuk e mbaj mend”.

Edhe banakieri i lokalit, që ishte në pronësi të viktimës, ka dhënë disa detaje mbi autorin, që mund t’i shërbejnë hetimit. Ai thotë se nga përshëndetja që bëri vrasësi, kishte kuptuar që ai fliste me dialekt nga Veriu, ose nga Shqipëria e Mesme.

“Rreth orës 12:30-13:00, unë kam qenë në banak, dhe i ulur në tavolinën përballë ka qenë pronari Ardiani, i vetëm. Në këtë kohë ka hyrë në lokal një person mashkull, i cili ishte trup i gjatë rreth 190 cm, i shëndetshëm, i cili mbante veshur një veshje të trashë dhe një jelek pune jeshil sipër rrobave, ndërsa në kokë kishte skafandër dhe dorën e kishte në çantë, me rrip të lidhur në trup.

Pasi është afruar afër banakut na ka përshëndetur duke na thënë “si e kalut” dhe është afruar tek tavolina ku ndodhej Ardiani dhe pasi ka nxjerrë armën nga çanta ka filluar të qëllojë. Nuk kam arritur ta fiksoj fytyrën e tij, pasi ndodhi gjithçka shumë shpejt. Gjithashtu nuk jam në gjendje të them se nga cila zonë mund të ketë qenë, por mendoj se nga Veriu ose Shqipëria e mesme, pasi nuk m’u duk dialekt jugor”.

Fotoja e mjetit me të cilin dyshohet se vrasësi u largua nga Lezha

Ky është mjeti tip “Land Rover Defender” me të vilin vrasësi i Ardian Nikulajt u largua në drejtim të paditur pas ekzekutimit. Land Rover-i ka targa të huaja.

Pas vrasjes së biznesmenit, vrasësi është larguar me motor, të cilin më pas e ka future në Defender dhe është arratisur.

Kush ishte Ardian Nikulaj?

Nikulaj njihej në zonën e Shëngjinit si një biznesmen ndërtimi. Ai kandidonte për anëtar në Këshillin Bashkiak të Lezhës nën siglën e PSG-së, ndërsa edhe në vitin 2021 ka garuar krah Tom Doshit për deputet në Lezhë.

Nikulaj ishte një person me precedent të mëparshëm penalë. Në vitin 2003 ka qenë i dënuar për armëmbajtje pa leje dhe në 2006 për kontrabandë e falsifikim. Deri në vitin 2003, viktima mbante mbiemrin Marku, për ta ndërruar më vonë në Nikulaj.