Rrjetet shqiptare, lojtarët më të fuqishëm në trafikimin e k*kainës dhe një pakt i lindur në Kopenhage

Nga Alba Kepi

Në Samitin e Politikës Evropiane në Kopenhagë, më 2 tetor 2025, Italia dhe Franca u bënë promotorët e nismës më ambicioze të dekadës kundër trafikut të drogës: Pakti Evropian Kundër Drogës.

Ky dokument synon të krijojë një front të bashkuar evropian për të ndaluar flukset e kokainës që përshkojnë kontinentin nga portet e Amerikës Latine deri në brigjet e Atlantikut.

Por pse pikërisht Italia dhe Franca?

Sepse sot, sipas të dhënave zyrtare, Italia është porta hyrëse e kokainës në Evropë, ndërsa Franca është tregu i saj më fitimprurës.

Italia – qendra logjistike e trafikut

Në Itali, porti i Gioia Tauro mbetet zemra e sistemit logjistik të kokainës.

Rrjetet kriminale shqiptare, në aleancë me ‘Ndrangheta-n kalabreze, kanë ndërtuar një mekanizëm të sofistikuar transporti që lidh Amerikën Latine me Evropën përmes Adriatikut.

Hetimet e vitit 2025 kanë dokumentuar përdorimin e kontejnerëve të koduar, komunikimeve të enkriptuara dhe skemave komplekse pastrimi parash që kalojnë përmes kompanive shqiptare të transportit dhe ndërtimit.

Në portet italiane, shqiptarët nuk janë më thjesht ndërmjetës. Ata janë partnerë të drejtpërdrejtë në menaxhimin e zinxhirit të furnizimit.

Vetëm në tetë muajt e parë të vitit 2025, autoritetet italiane kanë sekuestruar mbi 28 tonë kokainë, një pjesë e madhe e së cilës vinte nga itineraret që kalojnë përmes Shqipërisë dhe Ballkanit Perëndimor.

Franca – tregu që po shpërthen

Në anën tjetër të Mesdheut, Franca është bërë epiqendra e konsumit dhe shpërndarjes së kokainës në Evropën Perëndimore.

Sipas Observatorit Francez për Drogat (OFDT), në vitin 2023 mbi 1,1 milion francezë kanë konsumuar kokainë të paktën një herë në vit — dyfish më shumë se një vit më parë.

Gjatë vitit 2024, autoritetet franceze sekuestruan 47 tonë kokainë, krahasuar me 23,5 tonë në 2023, duke e bërë këtë periudhë rekord në historinë e kontrollit antidrogë.

Portet e Le Havre dhe Dunkerque janë shndërruar në pika strategjike të hyrjes së ngarkesave që vijnë nga Amerika e Jugut përmes Atlantikut.

Burime të sigurisë franceze kanë identifikuar rrjete të qëndrueshme shqiptare që veprojnë në Marseille, Lyon, Grenoble dhe Bordeaux — struktura të lidhura drejtpërdrejt me grupet italiane dhe rrjetet ballkanike të furnizimit.

Ekonomia e kokainës – një treg miliardash

Në Itali, çmimi i kokainës në vitin 2025 luhatet nga 55 deri në 70 mijë euro për kilogram, ndërsa në tregun francez arrin deri në 80 mijë euro për kilogram.

Nga burimi në Amerikën Latine deri te rrugët e Parisit, fitimi për kilogram kokainë arrin mbi 300%, duke e bërë këtë treg një nga motorët më të fuqishëm të kapitalit të paligjshëm në Evropë.

Vetëm gjatë verës së 2025, operacionet e përbashkëta të Europol-it, Guardia di Finanza-s dhe SPAK-ut kanë sekuestruar rreth 23 tonë kokainë dhe kanë arrestuar dhjetëra persona, shumica me origjinë shqiptare.

Rrjetet shqiptare në shënjestër

Shqiptarët janë sot aktorë kryesorë në kontrollin e rrugëve të reja të trafikut të kokainës.

Nga portet e Amerikës Latine në Afrikën Perëndimore, droga kalon përmes Shqipërisë, për t’u shpërndarë më tej në Itali, Belgjikë, Holandë dhe Francë.

Strukturat shqiptare operojnë me disiplinë, duke përdorur rrjete familjare, kode komunikimi të mbrojtura dhe një model të decentralizuar që e bën pothuajse të pamundur shkatërrimin e plotë të tyre.

Në raportet e fundit të sigurisë italiane dhe franceze, rrjetet shqiptare përmenden si “aktorë të parë të tregut të kokainës në Evropë”, krahas me ‘Ndrangheta-n dhe kartelët kolumbianë.

Pakti i Kopenhagës, i propozuar nga Italia dhe Franca, synon të mbyllë këtë rreth:

të unifikojë politikat e kontrollit portual,
të krijojë një sistem të përbashkët të shkëmbimit të inteligjencës,
dhe të luftojë financimin e rrjeteve që kalojnë përmes Ballkanit dhe Mesdheut.
Kjo është një nismë e qartë politike dhe strategjike: Evropa po kërkon të ndërpresë lidhjen mes burimit dhe tregut, dhe në këtë ekuacion, Shqipëria është nyja më e rëndësishme. Nga Gioia Tauro në Le Havre, nga Tirana në Marseille, trafiku i kokainës nuk është më thjesht një çështje kriminale, por një sfidë politike dhe ekonomike evropiane.

Dhe Italia me Francën, përmes këtij pakti, po dërgojnë një mesazh të qartë: Lufta kundër kokainës do të fitohet vetëm nëse shkatërrohen rrënjët – rrjetet që e lidhin Mesdheun me Ballkanin.