E-TJERA

Sa ndikuan te disfata e LSI-së kalimet e Nasip Naços dhe Lefter Kokës te PS-ja

Sa ndikuan te disfata e LSI-së kalimet e Nasip Naços dhe Lefter

Lëvizja Socialiste për Integrim pësoi një disfatë në zgjedhjet parlamentare të 25 prillit, ku arriti të merrte vetëm 4 mandate, nga 19 që kishte në zgjedhjet e kaluara të 2017-tës.

Para zgjedhjeve, ky subjekt u përball me largime të shumta në strukturat e degëve, por më kryesorët ishin largimet e dy ministrave Nasip Naço dhe Lefter Koka, të cilët garuar me Partinë Socialiste. Naço renditej i katërti në listën e PS-së në Qarkun e Beratit, ndërsa Koka renditej i shtati në listën e PS-së në Qarkun e Durrësit. Të dy ata arritën të merrnin mandatin e deputetit.

Por sa ndikuan largimet e Nasip Naços dhe Lefter Kokës në disfatën e LSI-së?

Lëvizja Socialiste për Integrim nuk arriti të merrte mandat as në Qarkun e Beratit dhe as në Durrës, edhe pse ishte shumë pranë. Në Durrës, LSI arriti të merrte 9480 vota, ndërsa në Berat 8394 vota. Pra, në këto dy qarqe ka qenë shumë pranë marrjes së një mandati.

Nëse do të llogarisnim votat preferenciale të Naços dhe Kokës për LSI-në, atëherë do të flisnim për një rezultat ndryshe në zgjedhjet parlamentare të 25 prillit, ku do i shtoheshin dy mandate LSI-së dhe do i hiqeshin dy mandate PS-së.

Nasip Naço arriti të merrte 4667 vota preferenciale, ndërsa Lefter Koka arriti të merrte 9609 vota preferenciale. Asnjë prej kandidatëve të LSI-së në qarqet e Durrësit dhe Beratit nuk kanë marrë më shumë vota sesa Naço dhe Koka, të cilët garuan nën siglën e PS-së. Madje Koka, ka marrë në Durrës më shumë vota se e gjithë LSI-ja bashkë në këtë qark.

Pra, siç duket, nga kalimi i tyre nga LSI te PS, ka dalë fituese forca politike e drejtuar nga Edi Rama dhe humbëse forca politike e drejtuar nga Monika Kryemadhin. Në Berat PS arriti të merrte 5 mandate nga 7 në total që ka qarku, ndërsa në Durrës 8 mandate nga 14 në total që ka qarku

Sa ndikoi kalimi i Brisida Shehajt nga PS te LSI?

Para zgjedhjeve, u regjistrua një lëvizje dhe nga Partia Socialiste drejt Lëvizjes Socialiste për Integrim. Bëhet fjalë për Brisida Shehajn, ish-drejtoreshë e Tatimeve në mandatin e parë të qeverisë Rama. Në këto zgjedhje, ajo renditej e 36-ta në listën e LSI-së për Qarkun e Tiranës dhe arriti të merrte 916 vota preferenciale.

Siç duket kjo lëvizje, nuk ka ndikuar shumë në rezultat, pasi në Qarkun e Tiranës, PS arriti të fitonte 18 mandate, PD 15 mandate dhe LSI dy mandate. 

Të fundit