Seanca për ish-zyrtarët e bashkisë Tiranë, Gjykata lë në burg Qaton, Mollën dhe Tushen, 6 të tjerët ‘detyrim paraqitje’

GJKKO ka dhënë masën e sigurisë për 9 drejtorët e ish-drejtorët e bashkisë Tiranë të cilët dyshohen për veprën penale të korrupsionit në lidhej me të ashtuquajturën dosja 5D. 

Kështu, GJKKO ka lënë në fuqi masën arrest në burg për Redian Mollën, ish drejtori i UKT e Mariglen Qato, ish drejtori IMT, si dhe për Taulant Tushen, ish-drejtor i Punëve Publike, ndërsa për 6 të tjerët vendosi ‘detyrim paraqitje’.

Për Tushen, ish Drejtor i Përgjithshëm, i arrestuar më herët, për përfshirjen në rastin e inceneratorit të Tiranës ky është një urdhër i dytë arresti pasi dyshohet për “shkelje të barazisë në tendera”.

Masa më të lehta, “Detyrim për paraqitje”, janë dhënë ndaj drejtuesve dhe ish drejtuesve në Bashki, Enton Punavija, Drejtor i Drejtorisë së Transportit, Julian Zanaj Drejtor i Prokurimeve, Eglantina Zere e shoqërisë “Tirana Parking” dhe Deborah Keçi, titullare e Klubit Sportiv “Tirana”, ndaj një përgjegjësi sektori si dhe ndaj administratorit të kompanisë “5D Konstruksion”, Nestor Muhametllari dhe Albano Janku. 

SPAK akuzon 8 zyrtarë të Bashkisë së Tiranës se favorizuan në mënyrë të paligjshme një kompani të zotëruar “de facto” nga ish-kreu i Ujësjellësit, Redi Molla dhe ai i IMT, Mariglen Qato, duke e ushqyer atë me tendera publikë. 5D Konstruksion fitoi dhjetra tendera dhe qarkulloi rreth 20 milionë euro në gjashtë vjet.

Sipas njoftimit të SPAK, kompania e cila kontrollohej nga Qato dhe Molla është 5D Konstruksion, e cila në QKB është regjistruar në pronësinë e Nestor Muhametllarit.

Kompania 5D Konstruksion u themelua në vitin 2016 me emrin “Igor Elektrik” dhe e ndryshoi më pas emrin në vitin 2019 në V.A.S. Konstruksion dhe në vitin 2021 në 5D Konstruksion.

Nga të dhënat e prokurimeve publike, kompania ka fituar 29 kontrata me vlerë të përgjithshme prej 1.8 miliardë lekësh. Kompania ka fituar tenderë të tjerë përpos këtyre në formën e bashkimit të operatorëve. Tenderi më i madh është fituar në vitin 2022 me objekt “Rehabilitimi i Qendrës së Kinostudios” me vlerë kontrate 414 milionë lekë.

Prokuroria sqaron se hetimi për këto afera ka filluar kryesisht në prill të vitit 2023 dhe një muaj me vonë është regjistruar një tjetër procedim bazuar në kallëzimin penal të kryer nga kandidati i opozitës për kryetar i Bashkisë së Tiranës në zgjedhjet vendore të vitit të kaluar, Belind Këlliçi. Të dyja procedimet janë bashkuar në një dosje të vetme.

Sipas SPAK, Qato dhe Molla e kishin fshehur pronësinë mbi kompaninë 5D Konstruksion përmes ortakëve fiktivë në aktet e regjistrimit.