"Shkollat s’janë vatra të nxehta", deklaratat kontradiktore brenda 24 orësh nga Rama te Manastirliu

Nga data 1 dhjetor, sistemi ynë arsimor do t’i rikthehet mësimit online.

Ministrja e Shëndetësisë Ogerta Manastirliu u shpreh në një deklaratë për shtyp deklaroi të mërkurën në mesditë se nga java e ardhshme Komiteti Teknik i Ekspertëve rekomandon zhvillim të mësimit i alternuar, fizik me atë online për shkak të situatës së krijuar nga pandemia.

“Pas rekomandimit të Komitetit të Ekspertëve kemi vendosur t’i rekomandojmë MASR që, nga data 1 Dhjetor, të aplikojë skenarët që parashikojnë kryerjen e mësimit të alternuar, pra në formën tradicionale, me prani fizike duke e kombinuar dhe me mësimin ne distance (online) bazuar në specifikat e sistemit arsimor dhe të dhënave lokale përkatëse në bashkëpunim me autoritetet shëndetësore”, tha ministrja, ndërsa pritet edhe reagimi dhe publikimi i udhëzimit nga ana e Ministrisë së Arsimit se si do të zhvillohet mësimi i kombinuar.

Megjithatë, pas këtij vendimi pati reagime të shumta, për faktin se vetëm 24 orë më parë, kryeministri Edi Rama, i shoqëruar edhe nga ministrja e Arsimit, Evis Kushi deklaruan se shkollat nuk janë vatra të nxehta infeksioni.

“Dua të theksoj dhe njëherë se çfarë hapet dhe çfarë mbyllet është përgjegjësi e autoriteteve tona të autorizuara që kanë të gjithë ekspertizën dhe autoritetin ligjor që të marrin vendime në këto kohë të vështira. Shkollat nuk konsiderohen një vatër e nxehtë por një hapësirë që si të gjitha hapësirat e tjera kanë patjetër dhe potencialin e tyre të rrezikut.

Nga njëra anë është shumë e rëndësishme që masat të zbatohen nga çdo shkollë, siç po ndodh, që personeli drejtues dhe pedagogjik të jetë sa më i durueshëm dhe këmbëngulës në zbatimin e tyre dhe nga ana tjetër ajo çka kam dëgjuar nga ekspertët tanë është që në vlerësimet e përgjithshme që bëhen lidhur me shkollat, domosdoshmëria për të mbajtur një ekuilibër midis këtij aspekti, mbrojtjes së drejtpërdrejt dhe mbrojtjes psikologjike të fëmijëve është në rendin e ditës të kësaj vendimmarrjeje. Është një vendimmarrje në dorë të autoriteteve tona, nuk më takon mua, nuk na takon neve”, tha Rama.

Reagimi i PD

Nisur nga këto qëndrime, kryetari i PD-së, Lulzim Basha akuzoi qeverinë se po menaxhon situatën pa një plan konkret dhe kjo sipas Bashës, faktohet me vendimin për shkollat. Ai evidentoi se kryeministri nuk i cilësoi shkollat me rrezik të lartë për përhapjen e virusit dhe më pas i mbylli ato.

Basha thotë se qeveria duhet të marrë tre masa urgjente që janë: Rritja e testimeve, akomidimi i pacientëve dhe sigurimi i pajisjeve mjekësore dhe stafit.

"Një plan solid për menazhimin e pandemisë nis me një numër të lartë të testimeve. Pastaj nis procesi i atyre që do shtrohen në spitale me të gjitha mjetet spitaliore. Kemi gjashtë muaj që themi të vendosen në dispozicion spitalet rajonale. Kjo do e evitonte kolapsin.

Është e domosdoshme të veprohet urgjentisht me një plan. Dje tha shkollat nuk janë vatër infeksioni, sot i mbylli.  Vendimi për shkollat tregon mungesë totale të planit dhe përgjegjshmërisë.

E mirëpres çdo lloj reflektimi, rolin kryesor si kryetar i opozitës është që të kursej jetë njerëzish. KJo nuk mund të luftohet me masa gjysmake dhe kuturu. Merr përgjegjësitë para shqiptarëve", u shpreh Basha.