Shqipëria hap sot grupkapitullin e parë të bisedimeve me BE-në, çfarë do të diskutohet

Shqipëria do të hapë sot grupkapitullin e parë të bisedimeve të anëtarësimit me Bashkimin Evropian në Luksemburg, 10 vite pasi vendi mori zyrtarisht statusin kandidat për t'u bashkuar me bllokun 27-vendesh.

Konferenca e së martës do të jetë e dyta që do të mbahet midis BE-së dhe Shqipërisë që kur ajo u bë vend kandidat. Ajo do t'i lejojë Brukselit të shqyrtojë të ashtuquajturat 'baza' të anëtarësimit, duke përfshirë mënyrën se si vendi përafrohet me të drejtat e njeriut, sundimin e ligjin dhe funksionimin e institucioneve demokratike.

Shqipëria do të përfaqësohet në konferencë nga kryeministri Edi Rama, Kryenegociatorja Majlina Dhuka si dhe Ministri për Evropën dhe Punët e Jashtme, Igli Hasani.

Më poshtë janë zbardhur dhe kapitujt që do të diskutohen mes Shqipërisë dhe unionit:

• Funksionimi i institucioneve demokratike

• Reforma e administratës publike

• Kapitulli 23 – Gjyqësori dhe të drejtat themelore

• Kapitulli 24 – Drejtësia, liria dhe siguria

• Kriteret ekonomike

• Kapitulli 5 – Prokurimi publik

• Kapitulli 18 – Statistikat

• Kapitulli 32 – Kontrolli financiar

Shqipëria dorëzoi aplikimin për anëtarësim në BE më 24 prill 2009.

Më 9 nëntor 2010, Komisioni Evropian dha opinionin e tij për aplikimin e Shqipërisë për anëtarësim në BE dhe vlerësoi se përpara se negociatat e anëtarësimit të hapeshin zyrtarisht, Shqipërisë i duhej të arrinte një shkallë të nevojshme përputhshmërie me kriteret e anëtarësimit, veçanërisht për të përmbushur 12 prioritetet kryesore të identifikuara në opinion.

Këto prioritete përfshinin përfundimin e hapave thelbësorë në reformën e administratës publike, miratimin dhe zbatimin e një strategjie reforme për gjyqësorin, forcimin e luftës kundër krimit të organizuar, zhvillimin e një historie solide në luftën kundër korrupsionit dhe forcimin e mbrojtjes së të drejtave të njeriut.

Në tetor 2012, Komisioni Evropian rekomandoi që Shqipërisë t'i jepet statusi i kandidatit, në varësi të përfundimit të masave kyçe në fushat e reformës gjyqësore dhe të administratës publike dhe rishikimit të rregullores së procedurës parlamentare.