Shqipëria i dëboi, Turqia "hyn mik" për Iranin. Hap zyrë të veçantë për Teheranin

               

Pas shkëputjes së marrëdhënieve zyrtare më 7 Shtator të vitit të shkuar, Irani po tenton të ketë sërish prezencë në Shqipëri.

Pak ditë më parë, ministri i Jashtëm i Iranit, Hossein Amir-Abdollahian tha se një seksion i interesit iranian do të hapet në Shqipëri nëpërmjet Turqisë në mungesë të marrëdhënieve diplomatike me Tiranën.
Hossein Amir-Abdollahian zbuloi se ministria e jashtme iraniane ka rënë dakord të hapë një seksion në Shqipëri për interesat iraniane nëpërmjet Turqisë.

Ky fakt u konfirmua edhe nga Ministria e Punëve të Jashtme. Në një përgjigje për Dosja.al, MPEJ shkruan se deri më tani nuk ka asnjë diskutim për hapje te një seksioni interesi te Iranit ne Shqipëri pranë ndonjë ambasade të një shteti tjetër, por ka një nen në Konventën e Vjenës që ia jep këtë hapësirë.

Bëhet fjalë për nenin 46 që shkruan se kur një shtet nuk përfaqësohet në një shtet tjetër, për të mbrojtur interesat e qytetarëve të tij, merr miratimin e një vendi të tretë.

Gjithsesi, sipas MPEJ-së, Shqipëria është duke eksploruar ketë mundësi, por duke përjashtuar hapjen e seksionit të interesit të Iranit në Shqipëri.

“Në përgjigje të pyetjes tuaj në lidhje me informacionin e kërkuar ju bëjmë me dije se: Nuk ka asnjë diskutim për hapje te një seksioni interesi te Iranit ne Shqipëri pranë ndonjë ambasade të një shteti tjetër. Në rast të shkëputjes së marrëdhënieve diplomatike midis dy shteteve, Konventa e Vjenës për Marrëdhëniet Diplomatike parashikon në nenin 46 te saj se:

“....një shtet dërgues, me miratimin paraprak te një shteti pritës dhe me kërkesë te një shteti të tretë që nuk përfaqësohet ne shtetin pritës, mund te marre përsipër mbrojtjen e përkohshme te interesave shtetit të tretë dhe të qytetareve të tij”

Ne kushtet kur Shqipëria dhe Irani nuk kane marrëdhënie diplomatike, ky nen i Konventës se Vjenës krijon mundësinë e përfaqësimit te interesave te Iranit ne Shqipëri nga një shtet tjetër dhe te përfaqësimit te interesave te Shqipërisë ne Iran nga një shtet tjetër. Shqipëria, në kontakt me partneret e saj, është duke eksploruar ketë mundësi, por duke përjashtuar hapjen e seksionit te interesit te Iranit ne Shqipëri”, thuhet në përgjigjen e ministrisë.

Raportet me Teheranin

Shqipëria ndërpreu marrëdhëniet e saj diplomatike me Iranin në shtatorin e kaluar, duke akuzuar Republikën Islamike për sulme kibernetike kundër infrastrukturës së vendit.

Marrëdhëniet midis Shqipërisë dhe Iranit kanë qenë të tensionuara prej vitesh për shkak të pritjes së vendit evropian të organizatës së grupit opozitar Mojahedin-e Khalq (MEK).

Tirana akuzoi Teheranin për kryerjen e një sulmi kibernetik kundër institucioneve shqiptare për të "paralizuar shërbimet publike dhe hakuar të dhënat dhe komunikimet elektronike të sistemeve qeveritare".