Shqipëria si Siçilia; tre krime mafioze brenda 8 ditësh në trekëndëshin Vlorë-Elbasan-Shkodër

Tre krime mafioze, brenda 8 ditësh janë regjistruar në vendin tonë gjatë këtij muaji duke tronditur opinionin publik. Janë pikërisht qytetet e Vlorës, Elbasanit dhe Shkodrës, të njohur për krimin dhe përplasjet mes bandave në vitet e fundit, ku janë regjistruar këto ngjarje tronditëse në këtë muaj.

Më 10 Maj, në mes të ditës, u ekzekutua me breshëri kallashnikovi biznesmemi Bledar Birçaj, teksa po ecte me automjetin e tij tip BMW X5, në zonën e quajtur ‘Bishti i Kalldrëmit’ në lagjen “Hajro Çakërri”, Vlorë. Viktimës i ishte zënë pritë nga dy persona të maskuar dhe të armatosur, të cilët dolën nga një makinë ngjyrë e bardhë dhe qëlluan me breshëri në drejtim të Bledar Birçajt dhe më pas u larguan me shpejtësi nga vendi i ngjarjes me të njëjtin mjet. Në makinë me biznesmenin ndodhej dhe një polic antidroge në sediljen e parë të pasagjerit, Granit Deromema, ndërsa në sediljen e pasme një 20-vjeçar, kushëri i viktimës, Edison Zeneli. Këta dy të fundit, fatmirësisht nuk i kap asnjë prej plumbave të dalë nga armët e autorëve. Bledar Birçaj ishte i armatosur, pasi pas krimit iu gjet në brez një pistoletë "Beretta".

Në vendin e ngjarjes u gjetën mbi 30 gëzhoja. Edhe pse ka kaluar mbi një javë, ngjarja ende nuk është zbardhur dhe nuk është gjetur asnjë gjurmë as nga makina e autorëve, e cila mund të jetë strehuar edhe në ndonjë garazh.

Dyshimet e grupit hetimor janë se kemi të bëjmë me një atentat të mirëmenduar dhe se autorët janë vrasës me pagesë. Dyshimet janë se ngjarja mund të ketë lidhje me një hakmarrje të mundshme. Bledar Birçaj kishte tre javë që ishte kthyer nga Spanja. Pistë kryesore e grupit të hetimit është e shkuara e viktimës në Spanjë. Ai rezulton i dyshuar si i përfshirë në një tjetër ngjarje në vitin 2011, por hetimet në lidhje me këtë çështje u pushuan për mungesë provash.

Së fundmi ai kishte qëndruar më shumë kohë në Spanjë prej nga bënte shpesh vajtje ardhje nga Shqipëria. Në Vlorë nuk njihej si person problematik por si biznesmen pasi ishte pronar i një lokali të quajtur “The Boss” të njohur në zonën e Lungomares.

Një ditë më pas, më 11 Maj, krimi kishte zbarkuar në Elbasan. Në lagjen “Skënderbej” u ekzekutua Everest (Ibrahim) Çaka, 41-vjeç. Ai u qëllua me breshëri plumbash në sy të bashkëshortes në automjetin që drejtonte. Për pasojë, Çaka ndërroi jetë, ndërsa e shoqja, Silvana u plagos në dorë.

Sipas dëshmisë të dhënë nga Silvana Çaka, një automjet i kishte goditur fillimisht nga mbrapa dhe çifti kishte menduar se ndodhi aksident. Por, menjëherë pranë xhamit të hapur te dera e shoferit u afrua një person me maskë anticovid dhe qëlloi me breshëri ndaj Everest Çakas në gjoks dhe në qafë. Edhe kjo ngjarje është ende e pazbardhur.

Everest (Ibrahim) Çaka kishte vetëm pak javë që ishte kthyer nga Gjermania, ndërkohë që lëvizte me makinën e shokut të tij, pavarësisht se posedonte edhe mjete të shtrenjta. Pista kryesore e ekzekutimit lidhet me serinë e vrasjes së kushëririt të tij në Belgjikë Arjan Spahiut. Para 10 ditësh, Everest Çaka është marrë në pyetje nga prokurorë belg në lidhje me vrasjen e kushëririt të tij Arjan Spahiut, të cilët po hetojnë për zbulimin e vrasjes.

Mes këtyre dy krimeve, në mbrëmjen e 10 Majit u regjistrua dhe një vrasje në kryeqytet. Në lagjen “5 Maji” u vra me pistoletë Mehmet Qema 27-vjeç nga shoku i tij Marius Dema 28-vjeç. Ngjarja dyshohet se ka ndodhur aksidentalisht, ku viktima dhe autori ishin ulur së bashku me disa shokë të tjerë në një lokal në atë zonë. Autori Marius Dema u vetëdorëzua të nesërmes pas krimit në polici.

Vetëm pak ditë, pas tre vrasjeve të mësipërme, në vendin tonë u regjistrua një tjetër krim mafioz. Mëngjesin e 17 Majit, në zonën e livadheve në Shkodër u gjet i vrarë 32-vjeçari Endrit Mustafa. Ai ishte ekzekutuar me 6 plumba. Vrasja ishte barbare, pasi autorët e kishin qëlluar viktimën edhe  në gojë. Endrit Mustafa ishte raportuar i zhdukur nga familjarët prej tri ditësh.

Policia e zbardhi këtë ngjarje një ditë më pas. Sipas burimeve zyrtare, autori kryesor i këtij krimit është Ibrahim Lici, 28 vjeç banues në lagjen Guerrile, Shkodër, i cili është shpallur në kërkim nga policia. Uniformat blu kanë vënë në pranga shtetasin e mitur Ergys M., 15 vjeç i cili dyshohet si bashkëpuntor i Ibrahim Liçit në këtë krim. Po ashtu është arrestuar dhe shtetasi E. A., 26 vjeç banues ne lagjen “Salo Halili”, Shkodër, i cili dyshohet se ka dijeni për ngjarjen.

Viktima Endrit Mustafa është arrestuar në vitin 2016 për grabitje e arsenal armësh së bashku me vëllezërit Astrit dhe Brahim Bilalin. Këta dy të fundit u ekzekutuan në një atentat më 30 Mars të vitit 2019 dhe si autori i kësaj ngjarje u akuzua pikërisht Ibrahim Lici, i cili akuzohet dhe për vrasjen e Endrit Mustafas. Ibrahim Lici është arrestuar më herët nga policia dhe si “truri” i një bande gjobëvënësish ndaj tregtarëve, ku në pranga përfunduan nëntë persona, si pjesë e këtij grupi kriminal.

Ibrahim Lici është djali i ish-anëtarit të Këshillit Bashkiak Shkodër, Mustafa Licit, i cili është arrestuar më herët për gjobëvënie ndaj tregtarëve në qytetin e Shkodrës.Këtij të fundit i ekzekutuan në një atentat në gusht të vitit 2018 të vëllanë, Fatbardh Licin, ngjarje kjo e ndodhur në qendër të Shkodrës, ndërsa më herët në janar, iu bë atentat me tritol Lul Kullës, kunatit të Fatbardh Licit, të cilit ai i mbijetoi.

Katër të vrarë brenda 8 ditësh, tre krime mafioze, dy prej tyre atentate ende të pazbardhura. Shqipëria po duket si Siçilia e viteve ’80./Politiko.al