Shqiptarët e Britanisë për ‘Daily Mail’: Nuk jemi gangstera, në Shqipëri ka korrupsion. Po bëhemi ‘kokë turku’

Përplasja mes dy qeverive, asaj shqiptare dhe britanike, për emigrimin e jashtëligjshëm është kthyer në kryefjalën e mediave ndërkombëtare. Përgjgijet dhe kundërpërgjigjet e palëve janë shoqëruar edhe me akuza nga kryeministri Edi Rama.

Disa emigrantë shqiptarë që jetojnë në Britaninë e Madhe kanë folur për ‘Daily Mail’ duke akuzuar qeverinë britanike se po tenton t’i bëjë kokë turku për shkak të problemeve me politikën e emigracionit.

Shqiptarët po ashtu, kanë akuzuar ‘Home Office’ se po përdorin sistemin e të dhënave.

Shqiptarët kanë rrëfyer se ndodhen në Britani për një jetë më të mirë dhe për të paguar taksat e tyre, pavarësisht pretendimeve se përfitimet e tyre vijnë nga aktivitete jo ligjore.

Emigrantët kanë thënë se nuk janë as gangsterë dhe as hajdutë. Tre burrat kanë pohuar se janë haptazi viktima të racizmit dhe ishin shënjestruar qëllimisht nga qeveria britanike për të larguar vëmendjen nga trajtimi i dobët që po i bëhet problemit të emigracionit të paligjshëm.

Ervis Abdullaj, një 39-vjeçar, pronar i 01 Café Bar dhe një nga rreth 150,000 shqiptarë që jetojnë në Mbretërinë e Bashkuar tha “Shqiptarët po vijnë këtu për një jetë më të mirë. Çfarë nuk shkon me këtë? Shumë njerëz kanë ardhur nga vende të tjera, por askush nuk ankohet për ta. Shqipëria është një vend i bukur, por ka shumë korrupsion dhe dhunë atje. Shumë shqiptarë po ikin nga kushtet e tmerrshme dhe jeta e tyre është në rrezik. Mund të mos ketë një luftë atje, por nuk është një vend i sigurt.”

Abdullaj rrëfeu për ‘Daily Mail’ se ka mbërritur në Angli në vitin 2014 në rrugë legale.

“Unë nuk kalova ilegalisht me gomone dhe kam bërë një jetë të mirë për veten time në Britani. Por nëse njerëzit janë të dëshpëruar për të ardhur këtu kështu, atëherë duhet të ketë një arsye të mirë. Unë punoj pothuajse 18 orë në ditë dhe si shumë shqiptarë në Britaninë e Madhe dua të kem një jetë të mirë për veten time. Qeveria britanike thjesht po përpiqet të na fajësojë ne për problemet e saj”, ka thënë Ervisi.

Dritan Doda, 49 vjeç, i cili drejton një kompani ndërtimi, tha “A jemi ne i vetmi komunitet në MB që përfshihemi në kriminalitet dhe trafik droge? Unë nuk mendoj kështu. Kam 25 vjet që jam në Britani dhe nuk e di pse tani shqiptarët fajësohen për gjithçka. Ne jemi një komunitet i vogël në Mbretërinë e Bashkuar, por aktualisht jemi duke u fajësuar për të gjitha problemet e mëdha. Është racizëm për mendimin tim, sepse është më e lehtë për Qeverinë të na fajësojë ne sesa të marrë përgjegjësi.”

Ndërtuesi Ermond Dena, 50 vjeç, i cili ka qenë në Britani për 10 vitet e fundit shtoi: “Shumë komunitete kanë kriminelë dhe tregtarë droge. Pse të fokusohemi vetëm te Shqipëria? Kam vënë re një rritje të numrit të shqiptarëve që vijnë në MB gjatë muajve të fundit, por ka pasur edhe njerëz që kanë ardhur nga vende të tjera.”

Një rrëfim ndryshe nga tre burrat e parë, vjen nga Esadi një 24-vjeçar. AI pohoi për ‘Daily Mail’ se ka mbërritur në Britaninë e Madhe një vit më parë me gomone dhe për këtë kishte paguar një bandë shqiptare.

“Kam ardhur vitin e kaluar me një varkë. Pagova një bandë në Shqipëri dhe ata bënë të gjitha rregullimet. Shumë njerëz duan të vijnë sepse jeta në Shqipëri nuk është e lehtë. Është e vështirë të gjesh një punë dhe nëse e ke një të tillë, je me fat që të fitosh 200 £ në muaj. Unë jam duke pritur që kërkesa ime për azil të shqyrtohet dhe jeta nuk është e lehtë në Londër, por është më mirë se të jesh në Shqipëri”, tha Esadi.

Edi Terziu, 37 vjeç, një ndërtues, me origjinë nga Elbasani, tha “Kam ardhur në Britaninë e Madhe për punë. Kam ardhur 15 vjet më parë dhe tani është shtëpia ime. Unë kam një grua dhe dy fëmijë, djali im më i vogël ka lindur këtu. Nuk ka punë në Shqipëri. Kështu erdha në Londër. Ishte e vështirë të filloja sepse nuk e dija gjuhën.”

Eduard Balla, 31 vjeç, pohon po ashtu se nuk merret me punë të jashtëligjshme.

“Unë jam murator. Unë nuk shes drogë, nuk kam armë. Unë nuk jam kriminel. Kam ardhur në Mbretërinë e Bashkuar katër vjet për të gjetur një jetë më të mirë. Në Londër mund të fitoj deri në 1000 £ në javë. Në Shqipëri nëse je me fat fiton 100 £ në javë. Kështu që kam ardhur në Britani për një jetë më të mirë. Është si një ëndërr për shqiptarët të vijnë në Londër. Ne e dimë nëse punojmë shumë, mund të fitojmë para dhe të jetojmë mirë”, tha 31-vjeçari.