Shqiptarët konsumuan 10 ton mandarina me pesticide të ndaluara nga Kroacia, si mashtronte AKU?

Të paktën 10 ton mandarina me pesticide që Kroacia i ndaloi, janë shitur në treg për shqiptarët, në muajin dhjetor.

Policia e Beratit ka vënë në pranga tre persona përgjegjës: fermeri Elton Tafa, grumbulluesi Arben Dyli dhe veterineri Elson Tahiraj.

Ndaj tyre rëndojnë akuzat për 4 vepra penale nga “Shkelja e rregullave mbi lëndët helmuese”, tek “Prodhimi dhe shitja e ushqimeve dhe e lëndëve të tjera të rrezikshme për shëndetin ose jetën e njerëzve”, “Mashtrimi me produktet ushqimore” dhe “Shpërdorimi detyrës”.

Nga hetimet dyshohet se fermeri i ka shitur Arben Dylit administratorit të një pike grumbullimi 10 ton mandarina të cilat më pas pika e grumbullimit i ka eksportuar drejt Kroacisë. Por kur autoritetet kroate kryen analizat e nevojshme rezultoi se sasia e mandarinave kishte përmbajtje të lartë të pesticidit “Fosmet”, pesticid ky i dëmshëm për shëndetin dhe i ndaluar për t’u përdorur.

Ngarkesat me mandarina janë kthyer mbrapsht dhe kjo sasi dyshohet se është hedhur sërish në treg.

Inspektori i Drejtorisë Rajonale të Veterinarisë dhe mbrojtjes së bimëve, Elson Tahiraj, dyshohet se  ka shpërdoruar detyrën duke lëshuar certifikata fitosanitare fiktive për subjekte të ndryshme, mes tyre edhe për 10 ton mandarinat e Arben Dylit, të cilat duhet të ishin asgjësuar.

Po çfarë shkakton Fosmet në organizëm?

Ky pesticid mund të shkaktojë helmim të rëndë tek njerëzit. Ata që ekspozohen ndaj tij mund të kenë simptoma si: dhimbje koke, marramendje dhe të vjella, vështirësi në frymëmarrje dhe dobësi muskulore, probleme me kujtesën dhe dëmtime nervore në përdorim afatgjatë.

Në rastet më të rënda, mund të shkaktojë edhe koma ose probleme serioze me sistemin nervor.

Si gënjeu AKU?

Asokohe, AKU Berat konfirmoi se kishte marrë masa të menjëhershme, duke ngritur grupe pune për analizimin, vlerësimin e situatës mbi koordinimin për ndjekjen e veprimeve proceduriale në secilën hallkë të zbatimit të kontrollit zyrtar të rastit.

sSubjekti pikë grumbullimi, me pronar shtetasin Arben Dyli, u gjobit në vlerën 4 milion lekë, pasi nuk ka njoftuar për tregtimin e agrumeve.