"Po përballemi me ksenofobi", shqiptarët legalë të Britanisë shënjestrohen si trafikantë droge

Deklarata e Sekretares së Brendshme britanike, Suella Braverman, shkaktoi debate mes Shqipërisë dhe Britanisë së Madhe. Braverman e quajti fluksin e emigrantëve të paligjshëm shqiptarë në Britani, një ‘pushtim’ i cili duhej të parandalohej.

Mirëpo, përveç ‘përplasjeve’ në distancë mes dy qeverive deklarata e saj ka ndikuar edhe në jetën e shqiptarëve të cilët punojnë dhe jetojnë në mënyrë legale në Britani. Metro.co.uk raporton se shqiptarët po ndjehen gjithnjë e më shumë të padëshiruar.

Fillimisht ndodhi me polakët, pastaj me bullgarët dhe rumunët, e tani shqiptarët po përjetojnë akuzat për ‘vjedhje të punës’ apo përfshirje në punë që lidhen me grupet kriminale.

Dr. Andi Hoxhaj, lektor i Drejtësisë në University College London pohoi për Metro.co.uk se shqiptarët janë duke përjetuar një rritje alarmante të armiqësisë dhe ksenofobisë nga ana e britanikëve, fill pas deklaratës së Braverman.

Hoxhaj u shpreh se njerëzit shpesh e paragjykojnë atë si një individ që merret me biznese të dyshimta për shkak të vendit të tij të origjinës. Ai pohon se shkak është bërë krimi i organizuar.

“Sapo njerëzit të njohin, është në rregull, por sa herë që del në pah problemi i krimit të organizuar shqiptar, gjithmonë ka komente negative. Për shembull, kur punoja në Universitetin Warwick, afër Birminghamit, kishte shumë raporte mbi lajmet për krimin e organizuar shqiptar. Njerëzit atje më shikonin me dyshim”, tha Hoxhaj.

Si shumë emigrantë, Hoxhaj u shpërngul në Mbretërinë e Bashkuar në vitin 2004 për arsimin e tij të lartë, dhe më vonë vendosi të qëndroj në Britani. Sipas Zyrës Kombëtare të Statistikave, ai është një nga vetëm 47,000 shqiptarët në vend.

Këtë vit, ai u zhvendos nga Birmingham në Londër, ku incidentet e ksenofobisë janë më pak të zakonshme, të paktën për të. Por komentet e javës së kaluar nga Sekretarja e Brendshme dhe deputeti konservator James Daly, e lanë atë të shqetësuar për të ardhmen e bashkëqytetarëve të tij në Mbretërinë e Bashkuar.

Korrupsioni është bërë pengesa më e madhe e Shqipërisë, duke penguar përpjekjen e saj të vazhdueshme për kandidaturën në BE dhe duke detyruar mijëra të largohen me shpresën për një jetë më të mirë.

Hoxhaj theksoi se një ‘demonizim’ i tillë i shqiptarëve ka bërë që njerëzit në komunitetin e tij të ndjehen të ‘shënjestruar’. “Me politikanë që bëjnë komente të tilla për shqiptarët, njerëzit në komunitet ndihen më të pakëndshëm. Fqinjët tanë dhe njerëzit me të cilët ndërveprojmë kanë frikë nga ne, veçanërisht shqiptarët që punojnë si ndërtues”, tha Hoxhaj.

Lektori theksoi se ky është vetëm një shembull i ksenofobisë me të cilën përballen njerëzit çdo ditë.

“Kohët e fundit kam dëgjuar studentë që talleshin me një çift shokësh të klasës që janë nga Shqipëria. Ata po i pyesnin nëse ndodheshin në Britaninë e Madhe për t'u përfshirë në rrjetet e drogës. Këto janë vetëm disa nga qëndrimet. Sapo njerëzit të mësojnë se je shqiptar, nuk shikohesh si favorizues. Një pjesë e kësaj ksenofobie i ka rrënjët në Brexit. Kishte pak më parë, por gjatë fushatës, të dy kampet Leave dhe Remain përdorën Shqipërinë si një argument negativ, kështu që shumë njerëz tani e lidhin vendin me këtë”, pohon Hoxhaj.

Shqiptarja Megi Adamou pajtohet se diskriminimi ndaj emigrantëve është në rritje në Mbretërinë e Bashkuar. 44-vjeçarja u transferua në Londër në vitin 2018 pasi u takua me bashkëshortin e saj në Shqipëri.

Duke qenë vullnetare për Kishën Harmony në Londër, e cila kryesisht kujdeset për shqiptarët, ajo dëgjon për incidente ksenofobie. Adamou tregoi se si djali 16-vjeçar i shoqes së saj u cilësua kriminel në shkollë vetëm për faktin se ishte shqiptar pas retorikës në Commons për emigrantët.

Sipas Zyrës së Brendshme, më shumë se 11,500 shqiptarë hynë ‘ilegalisht’ në Britaninë e Madhe përmes varkave të vogla, që përfaqëson 35% të totalit të mbërritjeve të varkave të vogla deri më sot këtë vit.

Sipas planeve të shpallura në gusht, ata do të shqyrtohen rrethanat e tyre, me ata që nuk kanë të drejtë të jenë në Mbretërinë e Bashkuar të largohen sa më shpejt të jetë e mundur.