Shqiptari s’ble dot banesë, por Shakohoxha e gjen gjithmonë një rrëfim sportiv për krizën

Nga Osman Stafa

Në Shqipëri ka ndodhur një "mrekulli": çmimet e banesave kanë arritur nivelet e Berlinit, ndërkohë që rrogat s’kanë lëvizur nga Vlora. Dhe në këtë absurd ekonomik, del Dritan Shakohoxha, me pasionin e tij të hershëm për sportin dhe dhe i tregon një ish-ministri të Financave, Ekonomisë, Arben Malajt, si funksionon tregu.

Në një vend normal, kur flet një ekonomist me eksperiencë dhe të dhëna konkrete, të tjerët dëgjojnë. Në Shqipëri, ndërpret Dritani. S’ka rëndësi që Malaj flet për pastrim parash, për rregulla të Bankës së Shqipërisë, për inflacion të krijuar nga para joformale. Jo, rëndësi ka që Dritani të ngrejë zërin e vet me të njëjtën mënyrë siç komenton një ndeshje derbi: pa thellim, pa statistikë, por me shumë patos.

Sepse kur nuk i kupton shifrat, ke vetëm një mënyrë për t’u mbrojtur: të sulmosh njeriun që i thotë. 

“Seriozisht e ke?!”, e pyet Malajn, si të ishte duke folur për një penallti të dhënë gabim, jo për dramën e mijëra familjeve që jetojnë me qira, ndërsa Tirana ndërtohet për mafien.

E vërteta është kjo: në Shqipëri nuk është më lajm që qytetari i ndershëm nuk e blen dot një shtëpi. Lajm është që dikush ka guximin ta thotë me zë, diçka që shumica e vuan në kurriz. Dhe në vend që ta dëgjojnë, i thonë “qetësohu, profesor, se na prish atmosferën”.

Atmosferë? Atmosferë ka vetëm në stadium. Në tregun e pasurive të patundshme ka vetëm pastrim parash, beton dhe një krim që ngrihet kat më kat.

Por pyes Shakohoxhën: 

A mund ta blente Shakohoxha një shtëpi vetëm me rrogën e tij si komentator sportiv? Apo me punë të tjera të ngjashme? 

Kur duhet të mbaj familjen, të paguaj ujë, drita, taksa, të vishet, të dalë në restorante, të bëj një udhëtim, t'u përgjigjet halleve, spitale etj... 

A mundet? 

Shumë jo, nëse Shakohoxha po, të dalë e të na e tregojë sekretin, e të na shpëtojë të gjithëve.