Shumëfishohen rastet, Komiteti Teknik i Ekspertëve nuk i ndryshon masat anti-Covid: Jemi në pikun më të lartë të gati dy viteve

Komiteti Teknik i Ekspertëve ka vendosur që të mos i ndryshojë masat anti-Covid edhe pse shifrat janë shumëfishuar gjatë ditëve të fundit.

Zv.ministrja e Shëndetësisë Mira Rakacolli u shpreh se vendi po përjeton një valë të re të Covid-19, ndërsa kërkoi respektim rigoroz të masave.

Ajo bëri me dije se ekspertët kanë vendosur se masat aktuale i përgjigjen situatës epidemiliogjike në vend

"Treguesit flasin për përfshirjen e vendit në një tjetër valë. Po aq qartë shihet dhe vlera  emasave mbrojtëse, kur ato janë të zbatuara, sidomos vaksinimi. Këto shifra nuk duhen parë me frikë, por me shtim të kujdesit.

Komiteti i Ekspertëve mendon se niveli i masave mbrojtëse që kemi sot, është në përputhje me zhvillimet epidemiliogjike në vend dhe sot për sot nuk do të ketë ndryshim", tha ndër të tjera Rakacolli.

Drejtoresha e Institutit të Shëndetit Publik, Eugena Tomini ka bërë me dije se kjo valë infektimesh ka arritur edhe pikun më të lartë të pandemisë në vend në këto dy vite. Ajo tha se varianti Omicron, Delta dhe virusi i gripit, shoqëruar dhe me mosrespektimin e masave për festat e fundvitit kanë sjellë rritje të shifrave.

"Incidencë e lartë e rasteve pozitive në dy javët e fundit. Rritja i atribuohet variantit Delta dhe Omicron por dhe mos respektimit të masave, të grumbullimeve por edhe reflektimit të grumbullimit të festave të fundvitit. Aktualisht në vend po qarkullon dhe virusi i grupit e po bëjnë një qarkullim e transmetueshmëri në nivele të larta. Kjo incidencë e lartë gjatë këasj periudhe ka reflektuar dhe pikun më të lartë të gati dy viteve, pikun më të lartë të pandemisë të hasur në vend", deklaroi Tomini.

Ndërsa drejtoresha e departamentit të epidemilogjisë në ISHP, Siva Bino bëri me dije shifrat e fundit sa i përket procesit të vaksinimit.

“Vaksinimi është sfida më e madhe në lidhje me pandeminë. këtë javë është shtuar ritmi i vaksinimeve në të gjithë vendin. Kemi pasur shifra të lartë këtë javë, sidomos me dozën e parë, ka një rritje dyfish. Në popullatën target kemi vaksinim 52.7% me një dozë, 47.3% me 2 doza, 7.7% me 3 doza. Sa i përket popullatës në përgjithësi kemi 42.4% me një dozë dhe me të dyja dozat përreth 38%", tha ajo”, tha Bino.

Masat që mbeten në fuqi janë:

Ora policore vijon 23:00 – 06:00.

• Qytetarët që hyjnë në Republikën e Shqipërisë, nga të gjitha pikat kufitare apo ata që kalojnë tranzit, duhet të vijojnë të dorëzojnë një nga dokumentet e mëposhtme:

- Pasaportë vaksinimi, ku data e vaksinës së fundit të ketë të paktën dy javë e aplikuar nga data e hyrjes në kufi.

- Test PCR, të kryer brenda 72 orëve ose testin e shpejtë antigenic brenda 48 orëve të hyrjes në kufi.

- Provë të kalimit të infeksionit Sars-Cov-2 të vlefshme deri në 6 muaj pas shërimit.

- Qytetarët rezidentë të Republikës së Shqipërisë dhe që nuk kanë asnjë nga dokumentet e përmendura në pikën 1, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit.

*Përjashtim nga këto rregulla bëhet për fëmijët deri në moshën 6 vjeç.

• Në strukturën e aerorporteve do të lejohen të hyjnë vetëm pasagjerët që udhëtojnë, të cilët duhet të zbatojnë me rigorozitet mbajtjen e maskës, ashtu siç është rekomanduar sipas protokollit.

• Në të gjithë institucionet shëndetësore, nuk lejohet hyrja e familjarëve për personat që janë të shtruar, sipas protokolleve përkatëse.

• Mbetet në fuqi urdhri për përdorimin e maskave në ambiente të mbyllura, në qendra tregtare, supermarkete, dyqane, etj dhe në të gjithë ato vende ku nuk sigurohet distancimi fizik.

• Vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive, etj, deri në 30% të kapaciteteve të tyre me prezencë të spektatorëve.

• Grupet e riskut, arsimtarë, studentë, personel shëndetësor, administrata dhe punonjësit e shërbimeve të supermarketeve dhe qendrave tregtare, vijojnë dorëzimin vërtetimin/çertifikatën e vaksinimit ndaj Covid 19 ose çertifikatën e shërimit, të lëshuar nga e-Albania pranë qendrës së punës, në të kundërt do të kërkohet paraqitja në mënyrë periodike e testit PCR çdo javë për të verifikuar infektueshmërinë.