Si u zbulua afera me tenderin në Ministrinë e Brendshme, akuzat për 9 të arrestuarit; nuk u prekën zyrtarët e lartë

Me urdhër të SPAK, Policia e Shtetit dhe FNSH-ja zbarkuan mëngjesin e sotëm në zyrat e Ministrisë së Brendshme. Si rezultat u arrestuan 9 persona; 8 prej tyre nën masën e sigurisë "arrest me burg", ndërsa një në "arrest shtëpie".  Ata akuzohen për abuzim lidhur me tenderin për blerjen e uniformave të Policisë së Shtetit me vlerë rreth 27 milionë euro.  Burime bëjnë me dije se për zbardhjen e kësaj aferre ka patur edhe bashkepunetore te drejtesise nga brenda Ministrise se Brendshme. Policia ka ushtruar kontrolle në banesat e të arrestuarve. Ky operacion vjen vetëm pak ditës pas operacionit në Bashkinë e Lushnjës, i cili po ashtu kishte të bënte me aferrën e një tenderi.

Të arrestuarit dhe akuzat:

1. Edlira Nagellari - “arrest në burg”, e dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
2. Flutura Çekrezi - “arrest në burg”, e dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
3. Anisa Bogdani - “arrest në shtëpi”, e dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
4. Ani Omuri - “arrest në burg”, e dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
5. Kleivis Hasani - “arrest në burg”, i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
6. Kreshnik Bejkaj - “arrest në burg”, i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”m në bashkëpunim.
7. Fatmir Demneri - “arrest në burg”, i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.
8. Mariglen Buzali - “arrest në burg”, i dyshuar për kryerjen e veprës penale “Shkelja e barazisë së pjesemarrësve në tendera apo ankande publike”, në bashkëpunim.
9. Gëzim Mingaj - “arrest në burg”, i dyshuar për kryerjen e veprës penale “Shkelja e barazisë së pjesëmarrësve në tendera apo ankande publike”, në bashkëpunim.

Si nisën hetimet për tenderin për blerjen e uniformave të Policisë së Shtetit:

Në muajin Gusht të vitit 2020, Grupi Parlamentar Demokrat e kallëzoi ministrin e Brendshëm, Sandër Lleshaj, në SPAK, duke e akuzuar për 5 vepra penale: “Korrupsion aktiv i funksionarëve të lartë shtetëror ose të zgjedhurve vendorë”; “Shpërdorimit të detyrës”; “Shkelje e barazisë së pjesëmarrësve në tenderë apo ankande publike”; “Korrupsion pasiv i personave që ushtrojnë funksione publike”; “Korrupsion pasiv i funksionarëve të lartë shtetëror ose të zgjedhurve vendorë”.

Sipas kallëzimit të depozituar në SPAK nga deputetët Myslim Murrizi dhe Halit Valteri, më datë 11 Qershor 2020, u zhvillua procedura e tenderit me objekt “Blerje dhe shpërndarja e uniformave dhe këpucëve të Policisë së Shtetit” për 4 vjet, me fond limit rreth 2.8 miliardë lekë pa TVSH apo 27 milionë euro me TVSH.

Fituesi i paracaktuar ishte firma “D&E” sh.p.k., e cila nuk plotësonte shumë kushte e dokumente të kërkuara dhe ndonëse ofronte rreth 5 miliardë lekë më tepër se operatori i klasifikuar si i pari. “Sandër Lleshaj ishte i vendosur që në kundërshtim me ligjin ta shpallte fitues. Skandali merr përmasa edhe më mëdha. Kjo, për vetë faktin se tenderi është mbajtur në datë 11.05.2020 dhe sipas ligjit klasifikimi duhet të ishte bërë brenda 10 ditësh, por ndërkohë fituesi është publikuar online më datë 14.07.2020”, thuhej në kallëzimin e Grupit Parlamentar Demokrat.

Në fillim të procedurës, në Komisionin e Vlerësimit të Ofertave ishin 3 anëtarë, të cilëve u bë presion që të skualifikohej kompania e parë e renditur e para, e cila plotësonte të gjitha kriteret, ka ofruar edhe 5 miliardë lekë më pak. Si pasojë e rezistencës së një pjese të këtij komisioni për të shkelur ligjin, në këtë komision u shtuan papritur dy anëtarë të rinj pa asnjë shpjegim, duke e çuar numrin në pesë persona. “Nga ana e Drejtoreshës së Agjencisë së Blerjeve të Përqendruar, Edlira Naqellari, nën bekimin e Sandër Lleshajt, këtyre personave të komisionit u janë ofruar para për të skualifikuar firmën e kualifikuar si e para, por pasi një pjesë e tyre kanë vendosur që të mos e shkelin ligjin, Edlira bashkë me Sandër Lleshajn kanë vendosur të shkrijnë Komisionin. Krejt papritur, një nga anëtarët e komisionit dha dorëheqjen më datë 9.06.2020 në mes të procedurës, pa asnjë shpjegim”, thuhej në kallëzim.

Kompania “D&E” sh.p.k. nuk plotësonte një sërë kushtesh teknike dhe ka mungesë dokumentacioni të theksuar, falsifikuar edhe dokumentacionin e paraqitur.

"Gjatë hetimit, janë konstatuar shkelje te rregullave të prokurimit publik, bërë nga anëtarët e Njësisë së Prokurimit, shtetasit Flutura Çekrezi, Anisa Bogdani, Ani Omuri, Kleivis Hasani dhe anëtarët e Komisionit të Vlerësimit të Ofertave, shtetasit Kreshnik Bejkaj, Fatmir Demneri, Mariglen Buzali, Gëzim Mingaj, të cilët në bashkëpunim me njëri-tjetrin dhe me titullarin e Organit Qendror Blerës, Drejtor i Agjencisë së Blerjeve të Përqendruara, kanë sjellë avantazhe dhe privilegje të padrejta në kualifikimin e operatorit fitues në këtë procedurë prokurimi." thuhet në njoftimin e SPAK.

Ky tender është denoncuar dhe nga ana e Partisë Demokratike, por këta të fundit u mjaftuan vetëm me deklarata për mediat dhe nuk depozituan kallëzim penal në SPAK.

SPAK nuk preku zyrtarët e lartë:

Pavarësisht se u prenë 9 fletë-arreste, ajo që vlen të theksohet është se SPAK nuk preku zyrtarët e lartë. Bëhet fjalë për ish-Ministrin e Brendshëm, Sandër Lleshaj dhe ish-Sekretarin e Përgjithshëm të kësaj ministrie, Plarent Ndreca. Në kallëzimin penal, Lleshaj dhe Ndreca akuzohen si organizatorët e procedurës fiktive të tenderit 25 milionë euro, një projekt i zbatuar, sipas kallëzuesve, nga zyrtarët e prokurimeve, për të cilët kanë vendosur edhe emrat përkatës. Gjithsesi, emrat e tyre nuk gjenden për momentin në listën e prokurorëve specialë, pasi nuk dihet se çdo të nxjerrin hetimet në vazhdim.

Ministri i Brendshëm, Bledi Çuçi shkarkoi drejtoreshën 8 ditë para arrestimit:

Mes 9 zyrtarëve të Ministrisë së Brendshme të arrestuar nga SPAK është edhe Edlira Naqellari. Ajo ka mbajtur postin e drejtoreshës së Agjencisë së Blerjeve të Përqëndruara, por u shkarkua 8 ditë më parë me një vendim nga ministri i Brendshëm, Bledi Çuçi. Motivet e shkarkimit nuk dihen. Ajo është emëruar në postin që mbante në kohën kur Ministria e Brendshme drejtohej nga Fatmir Xhafa. Edlira Naqellari është gjithashtu motra e kryetares së Gjykatës Lezhë, Ornela Naqellarit.