Skandali i byzylykëve elektronikë, Ministria e Drejtësisë fiton gjyqin me ‘Bashkimin e Operatorëve Ekonomik’: 2.2 mln euro kthehen pas në buxhetin e shtetit

Pas një beteje gjyqësore 3 vjeçare, Ministria e Drejtësisë ka fituar gjyqin me kompanitë që kishin fituar tenderin për të realizuar mbikëqyrjen elektronike të të parabugosurve, apo të dënuarve në shtëpi.

Gazetarja e kronikës, Klodiana Lala, bën me dije se “Gjykata ka urdhëruar ‘Bashkimin e Operatorëve Ekonomik’, shoqëria “Ratech”, shoqëria “Soft& Solution” dhe shoqëria “Fasttech Sh.p.k” që të depozitojnë në buxhetin e shtetit shumën prej 150 milionë lekësh që kishte marrë për shkak të shumës kontraktore që  kishte nënëshkruar në vitin 2017 me Ministrinë e Drejtësisë”.

Kjo shumë ishte lëvruar në favor të bashkimit të operatorëve ekonomik, me qëllim që këto kompani të jepnin shërbimin e mbikëqyrjes elektronike, në rastet kur gjykata udhëronte që të dënuar apo të paraburgosur të mos mbaheshin në ambientet e paraburgimit, apo burgut, por të liheshin në ambiente shtëpiake, për arsye të ndryshme nën mbikëqyrjen elektronike.

Po ashtu, në buxhetin e shtetit do të mbetet edhe shuma prej 70 milionë lekësh që nuk është lëvruar nga ana e Ministrisë së Drejtësisë për faktin se nisi konflikti mes këtij institucioni, të drejtuar tashmë nga Etilda Gjonaj, dhe “Bashkimit të Operatorëve Ekonomik”.

Pra në total bëhet fjalë për një shumë 2.2 milionë eurosh që i merret privatit dhe kalonë në funksion të buxhetit të shtetit, për shkak se “Bashkimi i Operatorëve Ekonomik” nuk e ka përmbushur kontratën.

Por si u zbulua ky skandal?

Në 2017 Ministria e Drejtësisë konstatoi se “Bashkimi i Operatorëve Ekonomik” nuk po e përmbushte kontratën që kishte lidhur me vetë Ministrinë për dhënien e shërbimit për mbikëqyrjen elektronike të personave të dënuar, apo të paraburgosurve.

Pas verifikimeve të mëvonëshme rezultoi se “Bashkimi i Operatorëve Ekonomik” nuk kishte dorëzuar sipas kontratës me MD 300 byrzylykët elektronik, por ato i kishte dërguar tek shërbimi i provës. Skandali u thellua edhe më tej, pasi u zbulua se një pjesë e byrzylykëve elektronik nuk funksiononin fare dhe e gjithë çështja asokohe u finalizua me shkarkimin e zyrtarëve të lartë të Ministrisë së Drejtësisë.

Më pas Ministria e Drejtësisë hapi një proces gjyqësor në të cilin tashmë ka rezultuar fituese.

Kërkesa për hapjen e një tenderi të ri

Gjykatat shpesh kanë hasur problematikë për zgjidhjen e situatës së byrzylykëve elektronik, duke komunikuar shpesh për këtë rast si me Ministrinë e Drejtësisë edhe me Shërbimin e Provës.

Kjo sepse nga kjo përplasje, për mungesën e byrzylykëve elektronik, mbeteshin të dëmtuar personat të cilët ishin të dënuar por që për arsye të ndryshme, të parashikuara nga ligji, nuk mund të mbaheshin në burg.

Në momentin që ky konflikt gjyqësor do të marrë fund, Ministria e Drejtësisë është e detyruar të hap një tjetër garë, pra një tjetër tender, për përgjedhjen e një tjetër kompanie apo “Bashkimi të Operatorëve Ekonomik” që të ofrojë këtë shërbim, që në fakt është jetik për shumë të paraburgosur apo të dënuar.

Kjo sepse Gjykata lejon në qëndrim në shtëpi me mbikëqyrje elektronike të dënuar që kanë probleme të theksuara shëndetësore, apo të dënuar që kanë nën ngarkim për të mbajtur fëmijë të mitur, apo kanë prindër të moshuar për t’u kujdesur për ta brenda ambienteve të shtëpisë.