Skemë mashtrimi përmes postës me vlerë 4 milionë €, të përfshirë dhe dy shqiptarë; mashtruan qytetarë në shumë shtete

Drejtuesja e Prokurorisë së Tiranës Elizabeta Imeraj ka bërë me dije realizimin e  një operacioni kundër mashtrimeve kompjuterike.  

Operacioni i koduar “PHISHING” ka çuar në arrestimin e katër personave, tetë të tjerë janë shpallur në kërkim dhe një është proceduar penalisht.

Te arrestuarit janë dy shqiptarë dhe dy shtetas të huaj:

 1. Donald Anu, 34 vjeç, shtetas i Kamerunit,  alias Ugochukëu  Emmanuel Emereibenu  39 vjeç, shtetas i Nigerisë;

 2. Marie Goufan, 31 vjeçe, shtetase Kamerune, banuese në Tiranë;

 3.  Fatbardh Danja, 40 vjeç, banues në Tiranë;

 4. Xhentil Kupe, 54 vjeç, banues në Tiranë.

Gjithashtu është proceduar në gjendje të lirë shtetasja H. M., shtetase e Kamerunit, banuese në Tiranë.

Në konferencën për mediat, Imeraj tha se hetimet kanë nisur në vitin 2020 dhe se personat e përfshirë, në bashkëpunim me njëri-tjetrin kanë ngritur një skeme mashtrimi të pagesave nëpërmjet postës elektronike duke krijuar subjekteve tregtare fiktive.

Shqiptarët së bashku me shtetasit e huaj kanë kontrolluar komunikimet e postës elektronike midis klientëve dhe subjekteve tregtare. Pasi kanë ndërhyrë në sistemin kompjuterik ata kanë qëndruar të “fjetur” derisa kanë parë kërkesa specifike në lidhje me fonde ose pagesa të ndryshme.

Në këtë moment, ata kanë reaguar dhe kanë kontaktuar klientin, duke marrë rolin e subjektit pritës të fondeve, duke i informuar ata se detajet bankare të kompanisë kanë ndryshuar dhe duke iu kërkuar që të transferojnë fondet në llogarinë e re. Ata duke qenë në brendësi të komunikimeve kanë qenë në gjendje të prodhojnë një mesazh të postës elektronike me pamje me pamje të njëjtë me të vërtetin.

Që skemë të funksiononte, këta shtetas kishin hapur subjekte tregtare fiktive dhe në shumë raste me dokumente të falsifikuara të krijuara nëpërmjet pajisjeve elektronike, por dhe llogari bankare me dokumente të falsifikuara si administratorë subjektesh. Pasi vlerat monetare transferoheshin në llogaritë që këta shtetas kishin hapur, ato tërhiqeshin dhe dërgoheshin në shtete të tjera.

Me anë të kësaj veprimtarie të paligjshme, ata kanë përfituar rreth 4 milionë euro. Policia ka sekuestruar një automjet, 3 laptpë, 11 telefona celularë, karta sim, karta krediti dhe pajisje të tjera elektronike.

Personat e përshirë në këtë skemë kanë mashtruar qytetarë nga: SHBA, Gjermani, Angli, Turqi, Belgjikë, Zvicër, Finlandë, Lituani dhe Filipine.

Policia ka konstatuar se këta persona kanë pasur llogari bankare në bankat e nivelit të dytë dhe në bashkëpunim të ngushtë me këto banka janë mbajtur në kontroll transaksionet e kryera nëpërmjet kompanive fiktive të krijuara prej tyre.

Subjektet që janë verifikuar deri më tani si subjekte tregtare fiktive dhe të regjistruara në Qendrën Kombëtare të Biznesit dhe që më pas në emër të tyre janë hapur numra llogarish bankare janë: Connecta Intercontinental shpk, Worldëide Go ltd, WorldWide Trading limited dhe 14 të tjera.