Sot 30-vjetori i Lëvizjes Studentore; Politika uron në Ditën Kombëtare e Rinisë: Koha të bëjmë Shqipërinë si gjithë Europa

8 dhjetori, shënon sot Ditën e Rinisë në Shqipëri, ku 30 vjet më parë protestat studentore përmbysën regjimin komunist.

Prej vitit 2009, kjo datë përkujtohet si festë kombëtare në nder të të gjithë studentëve të dhjetorit, por edhe akademikëve të Universiteteve të Tiranës e gjithë rinisë shqiptare, që më 8 dhjetor 1990 u bënë iniciatorë e protagonistë të kthesës së madhe historike: protestave paqësore që sollën pluralizimin, rënien e komunizmit dhe lindjen e demokracisë.

Me shprehjen “E duam Shqipërinë si gjithë Europa”, ata kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.

Akti i tyre i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.

Politika shqiptare uron Ditën e Rinisë

Presidenti i Republikës, Ilir Meta, në një mesazh në kuadër të 30-vjetorit të Ditës Kombëtare të Rinisë, ka shprehur mirënjohje të veçantë ndaj Azem Hajdarit dhe atyre djemve e vajzave, të cilët u përplasën të parët me Dhunën e regjimit, duke frymëzuar një popull të tërë për kryengritje paqësore.

“Gëzuar 8 Dhjetorin 1990!

Të bekuarën Ditën Kombëtare të Rinisë, Ditën e Studentëve, Ditën e Misionarëve që vranë frikën për të ndezur Pishtarin e Lirisë dhe Demokracisë në vendin e shqiponjave!

Sot përulemi me mirënjohje të veçantë ndaj Lidershipit Heroik të Azem Hajdarit dhe atyre djemve e vajzave, të cilët u përplasën të parët me Dhunën e regjimit, duke frymëzuar një popull të tërë për kryengritje paqësore.

Nderojmë shpërthimin e vullkanit të guximit marramendës rinor për të përmbysur regjimin më të ashpër izolues dhe shtypës në kontinent, por ndihemi dhe po aq borxhlinj që në tre dekada nuk kemi bërë aq sa duhet për të qenë aty ku e meritonin sakrificat e tyre.

KOHA PËR RESTART!
Për rivendosjen e Demokracisë dhe Llogaridhënies!
Për ta bërë Shqipërinë, si gjithë Europa!
Unë besoj shumë në shpirtin energjik të të rinjve të Shqipërisë dhe në fuqinë e aftësive të tyre për ta transformuar dhe përmirësuar cilësisht të ardhmen e popullit tonë.
KOHA PËR RESTART!
Për të guxuar! Për t’u bashkuar! Që Rinia të marrë në dorë fatet e saj dhe të mbarë vendit!
Nëse jo Rinia, kush tjetër? Nëse jo sot, kur?
DO T’IA DALIM ME SUKSES SEPSE NUK KEMI RRUGË TJETËR!”, shkruan Meta.

Ndërkaq, kryeministri Rama me një foto të tij nga Lëvizja e Dhjetorit, duke thënë se ato ishin kohë të jashtëzakonshme në jetën e shoqërisë shqiptare.

“30 VJET janë shumë në rrugën e një njeriu, por jo edhe aq në rrugën e historisë së një vendi e sidomos kur kjo është koha e kalimit nga një diktaturë ekstreme, në një demokraci funksionale.

Bëhen plot 30 VJET sot nga dita, apo më saktë mbrëmja e daljes së studentëve në rrugën pa kthim të daljes prej diktaturës.

Vite të jashtëzakonshme në jetën e shoqërisë sonë dhe një privilegj i jashtëzakonshëm të qenurit pjesë aktive e përpjekjeve përgjatë kësaj rruge, së bashku me nderin e madh të udhëheqjes së vendit në 7 vitet e fundit, pavarësisht thinjave të shtuara me një shpejtësi marramendëse në këto vite”, shkruan Rama.

Mesazhi në Ditën Kombëtare të Rinisë nuk ka munguar as prej kryedemokratit Lulzim Basha. Teksa sjell në kujtesë shprehjen “E duam Shqipërinë si gjithë Europa!”, Basha shprehet se “në këtë 30 vjetor të lëvizjes së dhjetorit, i nderojmë ata me zotimin për të bërë realitet Shqipërinë si gjithë Europa!”.

“E duam Shqipërinë si gjithë Europa!

Kjo ishte thirrja e tyre, teksa kapërcenin barrierat policore dhe dhunën e regjimit.

E duam Shqipërinë si gjithë Europa!

30 vjet më parë, heronjtë e rinisë shqiptare ndryshuan përgjithmonë fatin e Shqipërisë. Ata luftuan për liri, për demokraci, për të drejtat e njeriut – dhe fituan.

Në 30 vjetorin e lëvizjes së dhjetorit le t’i nderojmë ata me zotimin për të bërë realitet Shqipërinë si gjithë Europa!”, shkruan Basha.

Po ashtu, edhe mesazhe kuraje në  rrugën tonë drejtë Evropës ka dhënë edhe kryetarja e LSI-së, Monika Kryemadhi. “Shqipëria duhet të flasë më shumë me zërin e të rinjve të mrekullueshëm që kemi!Është koha e tyre!”, ka thënë më mesazhin e saj Kryemadhi.

“30 vjet më parë, rinia e Shqipërisë ndezi një shpresë të re duke i dhënë vendit tonë një drejtim të ri. Kurajoja dhe vizioni i tyre çeli rrugën e afrimit të vendit tonë me familjen Europiane.

Ashtu si të rinjtë e 30 viteve më parë, është rinia e sotme që mund t’i japi Shqipërisë drejtimin e ri për të cilin kemi nevojë. Një Shqipëri ku kushdo gjen shpresë, ku të gjithë kanë mundësi për punësim të mirëpaguar, ku çdo shqiptar ëndërron ta bëjë Shqipërinë shtëpinë e tij.

Unë do të vazhdoj të mbështes të rinjtë, jo vetëm me fjalë por me veprime, sepse është rinia e sotme që do të krijojë një të nesërme më të mirë në Shqipëri. Ne duhet të punojmë për të mbështetur fort brezin e ri dhe t’i japim atyre të gjitha mundësitë që kanë nevojë për të qëndruar në Shqipëri.

Kemi nevojë për ndihmën e brezit të ri, që ta ndihmojë Shqipërinë të distancohet nga dështimet dhe që misioni kombëtar ‘Ta bëjmë Shqipërinë si gjithë Europa’, i cili ka 30 vjet që kumbon si thirrje, të mos përplaset më në murin e një politike që nuk dëgjon, por vetë ata të ndërtojnë Shqipërinë shtëpi të tyre.

Shqipëria duhet të flasë më shumë me zërin e të rinjve të mrekullueshëm që kemi!Është koha e tyre!Le t’i dëgjojmë!”, shkruan Kryemadhi.