Sot Porti i Durrësit, dikur Teatri/ Çipi tregon skandalin e 99-ës: Si e firmosi Edi Rama zaptimin e TK-së

Projekti i ri i Portit të Durrësit ka shkaktuar debat në opinionin publik dhe jo vetëm. Opozita ka deklaruar e shqetësuar se pas projektit fshihet një megaskandal vjedhjesh.

Regjisori Kastriot Çipi ka sjellë në vëmendje një rast kur ai ka qenë nëndrejtori i Teatrit Kombëtar në vitin 1999. Në një postim në Facebook, Çipi shkruan se në atë pas përfundimit të pushimeve verore dhe rikthimit në detyrë, vuri re se ishte pozicionuar një kantier ndërtimi.

Regjisori shkruan se personalisht si kryetar i komisionit të Prokurimeve, nuk kishte firmosur asnjë tender apo të kishte hapur ndonjë ankand, por ishte Edi Rama, asokohe ministër i Kulturës, i cili kishte hedhur firmën në kontratë.

Në mungesë të tij një kompani me 6 ortakë, kishte marrë me qera për 5 vite hollin e parë të Teatrit Kombëtar. Ai shprehet se pavarësisht denoncimeve, askush asokohe nuk reagoi derisa ai dha dorëheqjen nga posti i nëndrejtorit të Teatrit Kombëtar.

Postimi i Çipit:

Në vitin 1999 isha nëndrejtor i TK. U ktheva nga pushimet verore dhe gjeta një kantier ndërtimi. U habita, sepse isha kryetar i komisionit të prokurimeve dhe nuk kisha bërë asnjë tender apo ankand.

Në mungesën time, kompania Media 6, me ortakë Aleksandër Frangaj, Marsel Skëndo dhe Zhylien Rosh, kishte marrë me qera, për 5 vjet, hollin e parë të TK, duke zaptuar kështu edhe hyrjen kryesore të publikut. Aty do të bëhej Teatri "Rubairat".

Kontratën e kishte firmosur ministri i Kulturës, Edi Rama: 230 m2 për 1$/m2. Dmth nëse gjërat do të shkonin vaj, shteti do të përfitonte në total 13.800$ për 5 vjet qera.

Në fakt shteti doli me humbje që ditën e parë. TK kishte nevojë për një hyrje alternative për publikun, që u ndërtua nga oborri i brendshëm, drejt e në hollin e dytë. Ky ndërtim kushtoi 2 milion lekë ose rreth 15.400$ me kursin e atëhershëm.

Rastësisht, në tenderin për ndërtimin e hyrjes anësore kishin marrë pjesë vetëm 3 firma ndërtimi, të trija me ortakë Marsel Skëndon dhe Zhylien Roshin.

E publikova skandalin në një konferencë shtypi. Asgjë nuk ndodhi. As Auditi i Ministrisë, as KLSH, aq më pak Prokuroria, nuk e prishën qetësinë. Thjesht unë dhashë dorëheqjen.

Për referencë, në krahun tjetër të kompleksit, aty ku më vonë u bë Teatri Eksperimental, kishte një bingo, që paguante 16$/m2 dhe për të cilën nuk ishte dashur asnjë cent shpenzime nga shteti.

Teatri "Rubairat" u bë studio e TV Klanit, pastaj u bë klubi i natës Bretkosa, pastaj në vitin 2002 (pasi kishte paguar vetëm 3 vjet qera) u mbyll fare dhe u dorëzua me 4 kapriata të thyera, që u zëvendësuan me paratë e shtetit.

Kush mund të besojë se nuk ka korrupsion, kur jepet me qera Porti i Durrësit, për 300 milion dollarë, ndërkohë që porti i ri jo vetëm nuk ka nisur të ndërtohet, por as nuk dihet sa do të na kushtojë?