SPAK lëshon 23 urdhër-arreste për kultivim droge, të përfshirë punonjës policie dhe zyrtarë të lartë

Foto Ilustruese

Prokuroria e Posaçme Kundër Korrupsionit dhe Krimit të Organizuar ka lëshuar 23 urdhër arreste për kultivim droge në Skrapar, mes tyre janë të përfshirë edhe zyrtarë të lartë të policisë.

Në njoftimin zyrtar, SPAK thotë se janë dokumentuar veprime të kundraligjshme të kryera nga disa punonjës të Komisariatit të Policisë Skrapar dhe konkretisht, Neritan Naska (Shef i Stacionit të Policisë Poliçan), Klement Zeqo, Bardhyl Çela, Astrit  Duro me detyrë punonjës policie, si dhe funksionarët publik, shtetasi  Edmon Zotko me detyrë Administrator i Njësisë Administrative Tërpan, Fatos Lamaj, me funksion Kryeplak i fshatit Çorrogjaf, të cilët në bashkëpunim kanë lejuar kultivimin e bimëve narkotike në territorin ku ushtrojnë detyrat funksionale dhe kompetencat.

Personat akuzohen për veprat penale të “Kultivimi i bimëve narkotike”, “Prodhimi dhe shitja e narkotikeve”, kryer në formën e posaçme, atë të “Grupi i strukturuar kriminal”, si dhe veprën penale “Pastrimi i produkteve të veprës penale apo veprimtarisë kriminale”,

Sipas SPAK-ut, gjatë hetimit janë sekuestruar gjithsej 5045 bimë narkotike të llojit “cannabis sativa”, si dhe janë sekuestruar 176 kg lëndë narkotike e gatshme për t’u trafikuar. Gjithashtu janë evidentuar dhe disa magazina të përshtatura për tharjen dhe ruajtjen e lëndës narkotike.

Në njoftimin e publikuar nga SPAK, renditen të gjithë personat për të cilët është lëshuar urdhër arresti dhe akuzat që rëndojnë mbi ta.

Hetimet lidhur me këtë procedimin penal vazhdojnë.

Për këtë ka reaguar edhe ministri i Brendshëm Bledi Çuçi. Përmes një postimi në Facebook, ai thotë se është përmbyllur një operacion i rëndësishëm, ndërsa përgëzon për punën e bërë të gjitha strukturat e angazhuara.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm