“Të degjeneruar”/ Ofendoi dhe sulmoi gazetarët, pezullohet nga detyra policja e Elbasanit

Drejtoria e Përgjithshme e Policisë ka pezulluar nga detyra nënkomisaren e Policisë së Elbasanit, Anisa Kostani, pas fjalorit dhe gjuhës së papërshtatshme me të cilën ju drejtua dje gazetarëve.

Agjencia e Mbikëqyrjes Policore (AMP) nisi një hetim administrativ për shkelje etike ndaj nënkomisares së Elbasanit. Urdhri i pezullimit është firmosur nga Drejtori i Përgjithshëm i Policisë së Shtetit, Gledis Nano.

Anisa Kostani, përmes një postimi në rrjetet sociale, iu kthye gazetarëve me një gjuhë të ashpër pas raportimit që mediat bënë për vrasjen e Madrit Ulqinakut, nga 18-vjeçari Horgito Peqini.

Kostani i cilësoi gazetarët “të degjeneruar” që përbaltin punën e Policisë së Elbasanit me justifikimin se “zero vrasje, zero plagosje, zero çdo lloj krimi tjetër vetëm në Parajsë ka”.

Ndërkaq Kostani hedh edhe akuza se gazetarët i kanë marrë diplomat e fakultetit për shkak profesorët e tyre kanë qenë “Don Zhuanë”, pasi sipas saj nëse do ta kishin marrë me meritë nuk do të paragjykonin “punën e shkëlqyer” të Policisë së Elbasanit.

Kostani është bërë e famshme në media pas daljes me gjarprin e saj me të cilin Kostani bashkëjeton prej vitesh duke e mbajtur si një kafshë shtëpiake.

NJOFTIMI
Me keqardhje ndoqëm reagimin aspak etik dhe profesional të një oficereje të Policisë së Drejtorisë Vendore të Policisë Elbasan, e cila nëpërmjet një postimi në rrjetet sociale ka fyer gazetarët, me pretendimin se gazetarët po përbaltin punën e Drejtorisë Vendore të Policisë Elbasan.

Përsa më sipër, Drejtori i Përgjithshëm i Policisë së Shtetit Gledis Nano ka pezulluar menjëherë nga detyra oficeren e Policisë, Nënkomisare Anisa Kostani dhe ka urdhëruar Drejtorinë e Standardeve Profesionale në Drejtorinë e Përgjithshme të Policisë së Shtetit për të nisur hetimin disiplinor ndaj kësaj oficereje, për shkelje të rëndë të Rregullores së Policisë së Shtetit, miratuar me VKM nr. 750 datë 16.09.2015, konkretisht të nenit 209, pika 1 “Shkelja e rëndë e atributeve/kompetencave të policisë pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja të rënda në kryerjen e detyrave”.

Sqarojmë opinionin publik se mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, e cila ka një sektor të posaçëm, përmes të cilit komunikon zyrtarisht me median dhe publikun.

Policia e Shtetit është e bindur dhe e vendosur për të krijuar një marrëdhënie partneriteti dhe oponence me median, bazuar në respektin reciprok dhe në të vërtetën.

Policia e Shtetit falënderon gazetarët për punën e tyre në drejtim të informimit të publikut në lidhje me veprimtarinë e organizatës së Policisë së Shtetit dhe kërkon mirëkuptimin e tyre që raste sporadike të mos cënojnë marrëdhëniet korrekte mes gazetarëve dhe Policisë së Shtetit.