"Të paprekshmit", kush janë shqiptarët e botës së krimit që gjetën strehë në Dubai

Emisioni “Në Shënjestër” në News24 trajtoi zhvillimet e fundit lidhur me shqiptarët e botës së krimit që kanë gjetur strehë në Dubai, duke theksuar një kthesë të rëndësishme në ekstradimet drejt Shqipërisë.

Dokumentari ndalet te rasti i Durim Bamit, i cili pas dy vitesh procedura u ekstradua në Shqipëri, ku do të përballet me akuzat për përfshirje në disa ngjarje kriminale. Sipas ekspertëve, Dubai mbetet një qendër financiare e ndërtuar mbi sekretin dhe një pikë strategjike për investimin dhe mbrojtjen e pasurive të krijuara nga aktivitetet e paligjshme.

Të dhënat tregojnë se nga viti 2020 deri në 2026, autoritetet shqiptare kanë dërguar 19 kërkesa për ekstradim drejt Emirateve të Bashkuara Arabe, nga të cilat vetëm 10 janë realizuar. Megjithatë, shumë figura të njohura të krimit vazhdojnë të jetojnë të pashqetësuar në Dubai, duke përfituar nga vështirësitë juridike për ekstradim dhe siguria që ofron ky shtet.

Një prej tyre është Denis Matoshi, i njohur si Eldi Dizdari, i konsideruar drejtues i një prej organizatave më të mëdha shqiptare të trafikut të kokainës. Ai dyshohet se ka drejtuar operacionet nga Dubai, ndërsa në Shqipëri dhe Itali vijon të jetë në kërkim.

Dokumentari thekson gjithashtu se, pavarësisht sekuestrimeve të pasurive në Shqipëri, fuqia ekonomike e këtyre grupeve mbetet e lartë. Ekspertët nënvizojnë se Dubai ka shërbyer si një qendër koordinimi për krimin ndërkombëtar, duke ofruar njëkohësisht mundësi për investim dhe mbrojtje nga ndjekja penale, edhe pse kohët e fundit është vënë re një rritje e bashkëpunimit për ekstradime.

Pjesë nga dokumentari:

Por nëse Franc Çopja iu dorëzua autoriteteve belge në fundin e vitit 2023, duke shënuar kështu me dënimin e tij dhe fundin e një perandorie, duke i dhënë në këtë mënyrë lamtumirë rehatisë së tyre, ndryshe nga i vëllai që vazhdon të gjejë strehë aty, të tjerë shqiptarë të krimit po riatdhesohen nga Dubai për llogari të drejtësisë shqiptare.

I fundit në radhë ishte Durim Bami, i njohur ndryshe si një nga të fortët e Niklës në Fushë-Krujës, i cili pas dy vitesh procedura ligjore nga autoritetet ligjzbatuese në Emiratet e Bashkuara Arabe, në fundin e muajit shkurt të këtij viti u ekstradua në Shqipëri.  Ku do të përgjigjet për shumë ngjarje kriminale ku ka qenë pjesëmarrës, pas përplasjeve që kishte me grupin e Emiljano Shullazit dhe të mbretit të zhdukur të kumarit, Ervis Martinaj.

Fatjona Mejdini: “Dubai në vetvete është një qendër e rëndësishme financiare. Dhe është e bazuar mbi sekretin. Nuk është se aty ka një regjistër të të dhënave. Ka një ide që pasuria e tyre është dhjetra miliona euro. Këto janë të ndara midis pasurive të paluajtshme, makinave apo edhe aksioneve në kompani”.

Fabian Zhilla: “Elementi i dytë pse ata janë zhvendosur në Dubai, ishte edhe sepse Dubai shërbente si pikë koordinimi midis eksponentëve të lartë të krimit të organizuar ndërkombëtar.Së treti është dhe një vend  ku ata kanë filluar të investojnë paratë  e produkteve të parave të paligjshme. Dhe së katërti ofron një farë sigurie. Po të shikoni atje është shumë e vështirë, ku numri i incidenteve ka qenë pothuajse zero dhe kjo i jep atyre edhe një lloj sigurie fizike”.

Por ndërsa Durim Bami dhe disa personazhe të tjerë të krimit shqiptar, janë ekstraduar tashmë nga Dubai, duke shënuar një kthesë të fortë në marrëdhëniet juridike që ndjekin Emiratet e Bashkuara Arabe në të tilla raste me shtetet e tjera, në raport me vlerësimin e kërkesave për ekstradim, tanimë është e ditur se të tjerë shqiptarë të botës së nëndheshme vazhdojnë të shijojnë të qetë rrezet e diellit në gadishullin arabik. Ndërsa në lidhje me kërkesat për ekstradim nga viti 2020 deri më 2026, SPAK ka transmetuar 19 kërkesa për ekstradim në drejtim të Emirateve të Bashkuara Arabe, për shtetas shqiptar me precedentë penalë.

Ku nga totali i këtyre kërkesave, deri më tani nga ana e autoriteteve shqiptare, janë marrë në dorëzim 10 persona.

Fabian Zhilla: “Duke qenë se Dubai ose Emiratet e Bashkuara Arabe nga pikëpamja juridiksionale, kanë ndjekur një politikë, deri diku të vështirë për të lejuar ekstradimet,dhe kjo është shfrytëzuar nga eksponentë të krimit të organizuar dhe jo vetëm shqiptarë.

Krimi shqiptar sigurisht mësoi, qoftë edhe ato të Amerikës Latine, nga bashkëpunimet që ka pasur me organizata kriminale qoftë edhe me ato në Amerikën Latine, shkëmbyen këtë lloj eksperience dhe filluan të zhvendosen atje”.

Një nga këta personazhe që vazhdon të shijojë i pashqetësuar jetën në rrezet e diellit të Dubait, është edhe Denis Matoshi, ose i njohur ndryshe si Eldi Dizdari. Me origjinë nga Tropoja, drejtues i ‘Kompania Bello’, organizatës më të madhe kriminale shqiptare të trafikimit të lëndëve narkotike nga Amerika e Jugut në drejtim të Evropës.E cilësuar ndryshe si një sindikatë transnacionale, që mundi brenda pak vitesh të kryente një xhiro prej 350 milion euro, nëpërmjet trafikimit të kokainësNjë personazh i cili sot jeton në Dubai, aty nga ku në fakt drejtonte edhe të gjithë operacionet e narkotrafikut nga Amerika Latine në Evropë. Por që në Shqipëri janë ende në pritje të ekstradimit të tij, ashtu si edhe në Itali ku për të ka gati një mandat arresti.

Ndërsa në Shqipëri në qershorin e vitit 2024, Gjykata e Posaçme e Apelit la në fuqi vendimin për konfiskimin e pasurive të tij.

Pasuri të sekuestruara në Shqipëri, që duken hiç gjë përpara pasurisë përrallore që ai ka grumbulluar në vite, apo që mund të ketë investuar në Dubai.

Kartela Penale:

“Fillimisht Eldi Dizdari, por që mban edhe gjeneralitetet Denis Matoshi, u ndalua në Dubai pas një urdhër-arresti ndërkombëtar të lëshuar nga autoritetet italiane në kuadër të goditjes së grupit ‘Los Blancos’. Grup që trafikonte kokainë nga Ekuadori në drejtim të Italisë si dhe vendeve të tjera të Bashkimit Europian. Por më pas ai u lirua nga autoritetet ligjzbatuese në Emiratet e Bashkuara Arabe.

Sipas autoriteteve italiane ai është koka e grupit kriminal shqiptar Kompania Bello, që ka transportuar tonelata me kokainë në Evropë. Ndërkohë që në Shqipëri i janë sekuestruar disa pasuri të paluajtshme, si dhe 40 mijë euro dhe 8.2 milionë lekë të përfituara nga shpronësimi i një pasurie”.

Por edhe pse u lirua nga Dubai zyrtar, Eldi Dizdari siç thamë vazhdon të jetë i kërkuar nga shteti Italian, pas një vendimi të një gjykate në Firence, aty ku një pjesë e grupit të tij të kokainës u dënuan pak kohë më parë

Dizdari që në Shqipëri u përfol edhe si i përfshirë në përplasjen me armë në ish-Bllok, në vitin 2018, me grupin e Ervis Martinaj, por pa patur një akuzë zyrtare nga ana e Prokurorisë.

Ndërsa emri i tij doli në skenë edhe pas arrestimit të kushëririt të tij të afërt, Arbër Çekaj.

Tashmë i dënuar me 14 vite burg për trafikimin e 613 kilogramëve kokainë, që në vitin 2018 u sekuestruan në Maminas.

Fabian Zhilla: “Mendoj që janë çështje që po heton prokuroria. Por besoj që një nga parimet  ose politikat kryesore është që në çdo hetim penal ai të shoqërohet me një hetim pasuror.

Dhe sigurisht që ju keni parë dhe shifrat e sekuestrimit  kanë qenë të admirueshme, çka tregon kryesisht që volumi i parave të pista që qarkullon krimi i organizuar shqiptar është i konsiderueshëm”.

Fatjona Mejdini: “Shpesh Dubai është përcaktuar edhe si një burg më i madh i hapur në botë, pavarësisht se brenda është një qytet. Personat të cilët janë aty nuk munden as të shkojnë në shtetet e tjera të Emirateve. Pasi Dubai është vetë një emirat. Pra as në emiratin e Abu Dhabit, Që është një kufizim shumë i madh për njeriun”. News 24