Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Tenderat e ARRSH-së, fillon gjykimi në themel për dosjen ndaj Berberit dhe 21 të tjerëve

Politiko 1 Prill 2026, 19:08

Tenderat e ARRSH-së, fillon gjykimi në themel për dosjen ndaj

Pas shtyrjes së shtatë seancave, Gjykata e Posaçme e Shkallës së Parë vendosi të mërkurën më 1 prill, çeljen e shqyrtimit gjyqësor për themelin e çështjes penale në ngarkim të Evis Berberit dhe 21 të pandehurve të tjerë, të akuzuar për korrupsion, shkelje të barazisë në tendera e pastrim parash. Të mërkurën ishin të pranishme të gjitha palët. Të pandehurit që mungonin u përfaqësuan prej avokatëve të zgjedhur prej tyre. Për rreth një orë e gjysmë, prokurori i çështjes, Dritan Prençi lexoi në mënyrë të përmbledhur rrethanat e faktit, akuzat e ngritura ndaj të pandehurve, si dhe argumentoi lidhjen mes tyre. Ai vërejti se u qëndron gjithë konstatimeve, vlerësimeve dhe parashtrimeve të kërkesës voluminoze për gjykim.

Sipas Prençit, nga hetimi janë evidentuar fakte penale në shtatë procedura prokurimi, të zhvilluara në vitet 2020-2022, në Agjencinë për Efiçencën e Energjisë dhe Autoritetin Rrugor Shqiptar, gjatë kohës kur titullar i autoritetit kontraktor ka qenë i pandehuri Evis Berberi. Ndërsa në një procedurë prokurimi, i pandehuri Evis Berberi ka qenë kryetar i komisionit të vlerësimit të ofertave. Tetë procedura prokurimi që janë hetuar nga SPAK rezulton që së bashku, të kenë pasur fonde me vlerë totale prej rreth 526 milionë lekësh.

Nga hetimi ka rezultuar se tenderat janë fituar nga kompania Net – Group sh.p.k., në zotërim të të pandehurit Valter Begaj dhe përfitimet monetare janë përfituar nga Berberi në mënyrë të tërthortë përmes shoqërisë DAAM sh.p.k., që sipas Prençit, posedohet de facto prej tij. Po ashtu, u konstatuan edhe transaksionet e kryera me qëllim që Berberi të fshihte gjurmët e pronësisë së kësaj shoqërie; në vitin 2019 e ka kaluar fiktivisht pronësinë tek të pandehurit Brunilda Buli, Valter Begaj dhe Ervis Lami.

Po ashtu, prokurori evidentoi se në procedurat e tenderimit janë evidentuar fakte që vërtetojnë kryerjen e veprës penale të shkeljes së barazisë së pjesëmarrësve në tendera apo ankande publike. Për këtë vepër penale akuzohen anëtarët e komisionit të përllogaritjes së fondit limit, njësisë së prokurimit dhe komisionit të vlerësimit të ofertave.

Sipas SPAK, këto veprime të paligjshme janë kryer në lidhje me përllogaritjen e fondit limit, hartimin e dokumenteve standarde të tenderit, si dhe për vlerësimin dhe shpalljen fitues të shoqërisë Net Group sh.p.k, në kundërshtim me kriteret e përcaktuara në dokumentet standarde të tenderit, duke e favorizuar atë në shtatë raste.

Në këto procedura prokurimi, Berberi akuzohet se ka vepruar në bashkëpunim me zyrtarët e tjerë, të pandehurit Gentjan Gjyli, Erald Elezi, Artan Leskoviku, Altin Marko, Bledar Aliaj, Blerta Musabelli, Kamelia Tafaj, Ela Goxhaj, Jetmira Dervishi, Orjon Islamaj, Adrian Kroi, Genti Raça, Adela Kica, Denis Xhoxhi, Gëzim Noni, Adja Strazimiri, Shkëlqim Lusha dhe Valbona Pepa.

Pasi Prençi lexoi parashtrimet, gjykata konstatoi se një prej të pandehurve, Valter Begaj, nuk ka kërkuar gjykim të shkurtuar e për rrjedhojë pyeti palët për mendimin e tyre lidhur me ndarjen e çështjes.

Prokurori Prençi u shpreh se nuk ka pengesë për ndarjen e çështjes për shumicën e të pandehurve, as për kërkesën e një të pandehuri për ndarjen e çështjes. Për të pandehurit Evis Berberi, Brunilda Buli dhe Ervis Lami, Prençi e la në çmim të gjykatës.

Shumica e avokatëve u shprehën se nuk janë kundër ndarjes, ndërsa vërejtën se u qëndrojnë kërkimeve të tyre për gjykimin e shkurtuar, në bazë të gjendjes aktuale të akteve. Gjykata vendosi ta shtyjë seancën e radhës për më datë 8 prill, në orën 14:30. Reporter.al