Teoria e zymtë për zhdukjen e alpinistit australian në Shqipëri

Nga Chantelle Francis, News Australia

Misteri e rrethon zhdukjen e alpinistit australian Cameron Twiss në Shqipëri; tani, disa spekulojnë se një ari mund ta ketë sulmuar atë.

28-vjeçari u pa për herë të fundit rreth orës 8 të mëngjesit të datës 13 tetor, duke ecur në shtegun Valbonë-Theth në veri të Shqipërisë.

Autoritetet i gjetën pasaportën dhe rrobat në një bujtinë në qytetin e afërt të Shkodrës pasi ai u raportua i zhdukur.

Mësohet se z. Twiss filloi shtegun 17 km nga Valbona me një grup njerëzish dhe më pas u ndanë. Ai vazhdoi rrugën piktoreske për në Theth.

Rruga është e popullarizuar në mesin e turistëve, me udhëtarët në internet që madje e përshkruajnë atë si "të mbushur me njerëz".

Çuditërisht, asnjë gjurmë e z. Twiss nuk u zbulua dhe operacioni i kërkimit u pezullua në fillim të nëntorit.

Të shtunën, një vullnetar i Shërbimit Shqiptar të Kërkimit dhe Shpëtimit tha se ishte e mundur që australiani i zhdukur mund të ishte viktimë e një sulmi jashtëzakonisht të rrallë ariu, sipas The Advertiser, i cili ka një reporter në terren.

Vlerësohet të jenë rreth 200 arinj të murrmë në zone.

Udhërrëfyesi turistik Arben Kola i tha gazetares australiane Emily Olle se ekuipazhet e shpëtimit mendonin se rasti ishte "aq i çuditshëm".

“Edhe nëse ai do të kishte shkuar në rrugën e gabuar dhe do të kishte rënë ose do të ishte sulmuar nga një ari, ekipi i shpëtimit do të kishte parë një shenjë – një çantë ose ndonjë veshje”, tha ai.

Ekipet e shpëtimit fillimisht i përqendruan përpjekjet e tyre të kërkimit në një 'pikë selfie' famëkeqe ku dy turistë vdiqën në maj të vitit të kaluar pasi rrëshqitën në dëborë dhe ranë nga një shkëmb.

Megjithatë, z. Kola i tha The Advertiser nëse do të kishte një trup të pajetë, do të ishte gjetur.

“Edhe nëse nuk mund ta shihnin, korbat mblidhen dhe, me dronët dhe helikopterët e policisë, ata do të kishin tërhequr vëmendjen për këtë,” tha ai.

"Është pothuajse e pamundur të humbasësh në atë rrugë nëse nuk dëshiron të humbasësh."

Duke qenë se autoritetet nuk kanë qenë në gjendje të gjejnë një trup, ekziston frika se z. Twiss mund te jete vrare.

Departamenti i Punëve të Jashtme dhe Tregtisë ka konfirmuar se po ofron ndihmë konsullore për familjen e australianit të raportuar të zhdukur në Shqipëri.