TFL publikon raportin: 83% e shqiptarëve e perceptojnë shëndetësinë të korruptuar

Shoqata “Together for Life” publikoi raportin “Vlerësim i perceptimit të publikut shqiptar mbi korrupsionin në sektorin e shëndetësisë”, me mbështetjen financiare të Bashkimit Evropian. Ky është  një studim gjithëpërfshirës që synon të japë një pasqyrë të qartë mbi përmasat e korrupsionit në sistemin shëndetësor, mbështetur në perceptimet dhe në përvojat konkrete të qytetarëve shqiptarë.

Anketimi është realizuar me 1,000 qytetarë nga e gjithë Shqipëria dhe gjetjet që ai prezanton janë shqetësuese. Sipas raportit, 83% e të anketuarve e konsiderojnë sistemin shëndetësor si të korruptuar, ndërsa 84% pranojnë se ata vetë ose dikush që njohin janë përballur me raste konkrete të mitëmarrjes për shërbime që në parim duhet të jenë falas, si ndërhyrjet kirurgjikale (75%), vizitat apo konsultat në spitale 56%), lindjet dhe kujdesi obstetrik-gjinekologjik (52%), etj. Ky nivel i lartë tregon se korrupsioni në shëndetësi nuk është vetëm një perceptim, por një realitet i përhapur dhe i normalizuar.

Qytetarët rendisin disa faktorë kryesorë që nxisin korrupsionin në këtë sektor, ku më të përmendurat janë: kultura e pranuar e ryshfetit (63%), mungesa e kontrollit dhe ndëshkimeve për rastet e konstatuara (56%), keqmenaxhimi dhe mungesa e transparencës (38%) dhe mungesa e vetëdijes dhe guximit të pacientëve për të raportuar (35%). Po ashtu, pagat e ulëta të personelit mjekësor (34%) dhe mungesa e burimeve financiare (21%) konsiderohen faktorë të rëndësishëm që kontribuojnë në përhapjen e korrupsionit.

Raporti evidenton se perceptimi për korrupsion është i lartë në të gjitha nivelet e shërbimit. Spitalet universitare perceptohen si më të korruptuarat (81%), ndërsa qendrat shëndetësore më pak të prekura nga ky fenomen (21%). Këto të dhëna theksojnë nevojën për reforma të thella, forcim të mekanizmave të llogaridhënies dhe rritje të transparencës në të gjitha nivelet e sistemit.

Gjetjet e raportit u prezantuan në një tryezë me përfaqësues të institucioneve publike, organizatave të shoqërisë civile, institucioneve të pavarura, ekspertëve të fushës dhe medias.

Silvana Ramadani, Këshilltare pranë Ministrit të Shtetit për Administratën Publike dhe Antikorrupsionin, theksoi rëndësinë e bashkëpunimit ndërmjet institucioneve dhe shoqërisë civile për të adresuar korrupsionin në shëndetësi.

Ajo bëri të ditur se brenda këtij viti, MSHAP së bashku me Ministrinë e Shëndetësisë, me mbështetjen e Qeverisë Zvicerane, do të nisë një proces të posaçëm për vlerësimin e riskut të korrupsionit në sektorin shëndetësor, vlerësim i cili do të përfshijë të gjitha nivelet e ofrimit të shërbimeve dhe do të synojë identifikimin dhe minimizimin e rreziqeve përmes masave sistemike.

Përfaqësuesja e Ministrisë së Shëndetësisë dhe Mbrojtjes Sociale, Mejvis Kola, vuri në dukje se raportet e prodhura nga shoqata ‘Together for Life’ e kanë ndihmuar institucionin në vite të përmirësojë politikat me qëllim kryesor vendosjen e qytetarit në qendër të sistemit. 

“Edhe pse është evidente që shërbimet që ofrohen në të gjitha nivelet e sistemit publik shëndetësor janë përmirësuar ndjeshëm vitet e fundit, jemi të vetëdijshëm që ka ende shumë për të bërë, veçanërisht në forcimin e mekanizmave të kontrollit dhe për këtë nevojitet një bashkëpunim ndërmjet të gjithëve ne aktorëve që veprojmë në sektorin e shëndetësisë”, theksoi znj. Kola.

Duke iu referuar Raportit të prezantuar nga TFL, z. Alfred Leskaj, auditues në Kontrollin e Lartë të Shtetit deklaroi se ‘ky raport do të shërbejë për KLSH si një burim i vlefshëm për auditimet e ardhshme të performancës dhe përputhshmërisë në këtë sektor”.

“Për shkak të riskut të lartë dhe ndikimit të drejtëpërdrejtë që ka në jetën e qytetarëve, KLSH ka përfshirë shëndetësinë në planet vjetore të auditimit,” nënvizoi z. Leskaj.

Vilfrida Bushati, Drejtore e Hetimit Administrativ pranë Komisionerit për Mbrojtjen nga Diskriminimi, solli raste konkrete pacientësh të trajtuara nga institucioni, të cilat janë referuara nga “Together for Life”, të cilat kanë ndihmuar në identifikimin dhe trajtimin e problematikave që prekin grupet vulnerabël, si fëmijët me leucemi apo pacientët hemofilikë, të cilëve u është mohuar qasja në medikamente të domosdoshme.

Raporti “Vlerësim i perceptimit të publikut shqiptar mbi korrupsionin në sektorin e shëndetësisë”, realizuar nga TFL, përfaqëson një thirrje të qartë për rritjen e transparencës, fuqizimin e mekanizmave të raportimit, mbrojtjen e sinjalizuesve dhe vendosjen e integritetit në qendër të sistemit shëndetësor. Nëpërmjet këtij Raporti “Together for Life” rithekson angazhimin e saj për të kontribuar në një sistem më të ndershëm dhe më të ndjeshëm ndaj nevojave të qytetarëve.

Kliko raportin e plotë