Tjetër skandal në Onkologjik!/ Gazetari: Pacientët me kancer njoftohen të mos shkojnë në spital për shkak të mungesës së ilaçeve

Gazetari Osman Stafa ka zbuluar një skandal tronditës në spitalin Onkologjik, ku mjekët telefonojnë pacientët për t’u thënë të mos paraqiten për trajtim për shkak të mungesës së medikamenteve jetësore.

Nëpërmjet mesazheve të publikuara nga vetë gazetari, një pacient i diagnostikuar me kancer ka shkruar:
"Mirëmëngjes, Osman! Më morën në telefon dhe më njoftuan që mjekim nuk ka. Nuk po shkoj fare në spital, faleminderit."

Sipas denoncimit, mungesa e medikamenteve ka krijuar një situatë kritike, ku pacientët që vuajnë nga sëmundje të rënda mbeten pa trajtim. Mjekët janë kthyer në një lloj “call center-i”, duke njoftuar të sëmurët me kancer që të mos paraqiten në spital nëse nuk ka barna për ta.

Një rast i rëndë është ai i një pacienti me kancer të gjakut, i cili nuk ka marrë trajtimin e nevojshëm prej dy muajsh për shkak të mungesës së ilaçit Daratumumab. Situata përkeqësohet edhe për pacientet me kancer të gjirit, të cilave u është ndërprerë trajtimi me ilaçin Phesgo. Ky ilaç është i domosdoshëm për trajtimin e sëmundjes, por në mungesë të tij, pacientet po marrin Herceptin, një alternativë joefektive.

Denoncmi i plotë i gazetarit:

Zyrtarisht, ne shikojmë që në profilin e saj, zonja Koçiu është në fushatë, domethënë kërkon votat e shqiptarëve. Është ministrja e shëndetësisë dhe, në fakt, po e shikoja këto ditë teksa qytetarët—unë i kam publikuar vetë mesazhet e tyre, të cilat janë të konfirmuara sepse flitet edhe për medikamentet.

Thotë një qytetar: “Mirëmëngjes, Osman! Më morën në telefon dhe më njoftuan që mjekim nuk ka. Nuk po shkoj fare në spital, faleminderit.”

Çfarë kanë bërë? Pra, kanë krijuar një sistem të tillë që i lajmërojnë qytetarët të cilët vuajnë nga kanceri, që në momentin që ka mungesa të medikamenteve, u thonë: “Mos hajde.”

Pra, mjekët të kthyer në call center! Mjekët lajmërojnë pacientët: “Mos hajdeni në spital sepse s’ka medikament.”

Dhe e pyes qytetarin: “Çfarë medikamenti ke nevojë ti që nuk ka dhe sa kohë ke pa bërë kimioterapi?”

Më thotë: “Afro 2 muaj.” Është një pacient i cili vuan nga kanceri, kanceri i gjakut. Medikamentet: Daratumumab.

Pra, ky është një nga rastet. Pastaj, e fundit në onkologjik, e cila ka për të qenë dhe një skandal i madh sepse nuk mundën dot të sigurojnë një medikament për gratë të cilat vuajnë nga kanceri i gjirit.

Është një medikament i cili është mjaft i rëndësishëm dhe është vërtetuar klinikisht që përgjigjja e këtij medikamenti për gratë që vuajnë nga kanceri i gjirit është shumë e mirë.

Quhet Phesgo, dhe sipas raportimeve që më vijnë, në mungesë të këtij medikamenti u japin pacienteve—pra, grave dhe vajzave—Herceptin.

E di fare çfarë krijon dhe rrezikon me këtë? Sepse ma ka shkruar një mjek nga brenda onkologjikut, i cili më ka deklaruar sa vijon:

“Osman, situata në onkologjik është duke u përsëritur. Janë gra dhe vajza të cilat kanë nisur trajtimin në linjë të parë me Phesgo. Ndërprerja e Phesgo krijon tek pacientet që vuajnë nga kanceri i gjirit rezistencë qelizore. Qeliza bëhet e pandjeshme kur ti e fut barin kur të teket Albanës Koçiu.

Kur ndërpritet ky medikament, rritet rreziku i progresit të sëmundjes sepse ai bar e mban qelizën të mos shumëzohet.

Herceptina s’e bën punën e Phesgos. Nuk është zëvendësues. Është më mirë sesa hiç, por rezultatet që arrin Phesgo s’i arrin Herceptina. Ndaj, zëvendësimi i Phesgos me Herceptin është kriminal. Është për të fshehur mungesën e kimiove.”