Tre policë rrëmbehen nga serbët, Tirana zyrtare ‘mbyll gojën’

Policia e Kosovës konfirmoi mesditën e së mërkurës se tre zyrtarë kufitarë janë rrëmbyer nga forcat serbe gjatë një patrullimi në vendin e quajtur Tresave/Bare, në vijën kufitare në veri të Kosovës.

Sipas një njoftimi të Policisë së Kosovës, njësia policore ka qenë duke kryer një patrullë “thellë brenda territorit të Kosovës” për të parandaluar shfrytëzimin e rrugëve ilegale, që sipas këtij institucioni shfrytëzohen nga grupet kriminale për kalim ilegal dhe kontrabandë.

Bëhet fjalë për efektivët Rifat Zeka, Beqir Sefi dhe Mustafë Shemi.

Në këtë situatë të paprecedentë Kryeministri i Kosovës Albin Kurti, ministri Svelça por edhe faktorë të tjerë politikë në Kosovë kanë kërkuar reagimin e ndërkombëtareve.

Nga ana tjetër duket se karshi këtyre shkeljeve nga ana e Serbisë, ndërkombëtarët po mbyllin sytë pasi deri më tani nuk ka asnjë reagim.

Kur kanë kaluar disa orë nga publikimi i lajmit, deri tani nuk ka patur asnjë reagim nga Tirana zyrtare.

Pas raportimit për rrëmbimin e 3 policëve të Kosovës në veri të vendit nga policia e Serbisë, Qeveria e Kosovës ka marrë vendim për ndalimin e hyrjes së prodhimeve serbe.

Anulimi i mbledhjes 

Kujtojmë se një ditë më parë, kryeministri Edi Rama njoftoi në një dalje për mediat se mbledhja e dy qeverive Shqipëri – Kosovë e parashikuar për sot në Gjakovë nuk mund të mbahet në formatin e përcaktuar.

 Rama theksoi se mbledhja e përbashkët nuk mund të zhvillohet në kushte normale për shkak të zhvillimeve në veri të Kosovës dhe krizës që po ndodh aty me popullsinë serbe.

Në këtë pikë, Kryeministri tha se i ka kërkuar Kurtit që sot të takohen në një format më të ngushtë për të diskutuar për situatën në veri dhe për agravimin e marrëdhënieve të Kosovës me aleatët ndërkombëtarë.

Por sipas Ramës, Kryeministri Kurti nuk e ka pranuar këtë gjë duke kërkuar mbajtjen e mbledhjes siç ishte parashikuar. Kjo nuk është pranuar as nga Rama, i cili theksoi se aleatët ndërkombëtarë janë gati të zbatojnë masat shtrënguese ndaj Kosovës për shkak të situatës në veri.