Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

Mes kaosit dhe abuzimit, a është Shqipëria gati të ofrojë turizëm dinjitoz?

B.Z 18 Qershor 2025, 13:01

Mes kaosit dhe abuzimit, a është Shqipëria gati të

Foto ilustruese

Ndërsa qeveria shqiptare deklaron me krenari se pret mbi 10 milionë turistë të huaj këtë vit, realiteti në terren flet ndryshe. Edhe këtë vit sezoni turistik ka nisur me të njëjtat plagë të vjetra që e ndjekin sektorin prej vitesh: mungesë infrastrukture, abuzime të shumta, ndërtime kaotike në bregdet dhe uzurpim sistematik të hapësirave publike.

Në shumë zona të bregdetit shqiptar, sidomos në jug, hapësirat publike thuajse janë zhdukur. Plazhet dikur të lira janë të rrethuara me shezlonë të vendosur nga subjektet private që nuk posedojnë as kontrata të ligjshme përdorimi. Qytetarët vendas dhe turistët e huaj janë të detyruar të paguajnë deri në 3,000 lekë në ditë për një vend nën diell ndërkohë që kontrolli i shtetit vijon të jetë inekzistent.

Sakaq një tjetër shqetësim vijojnë të mbeten edhe ndërtimet pa leje. Nga Velipoja deri në Ksamil, ndërtimet pa leje dhe pa standarde kanë betonizuar bregdetin shqiptar. Në Dhërmi dhe Jalë, hotelet shumëkatëshe janë ngritur pa respektuar as distancat minimale nga deti. Lejet për ndërtimi jepen me shpejtësi nga pushteti vendor, shpesh në bashkëpunim me oligarkë lokalë, pa transparencë dhe pa konsultime publike.

Po ashtu një tjetër problematikë mbeten edhe rrugët e amortizuara. Ndërsa ftojmë turistë të huaj për të zbuluar bukuritë e vendit, shumë prej rrugëve që çojnë në këto destinacione janë në gjendje skandaloze. Disa prej tyre janë të paasfaltuara dhe me mungesë të sinjalistikës duke u bërë kështu burim rreziku për shumë vizitorë të huaj dhe vendas.

Një tjetër shqetësim që vlen të përmendet është dhe abuzimi me çmimet arbitrare, që vendosen në mungesë të kontrollit nga shteti. Një pjatë me fruta deti mund të shitet për 4,000 – 6,000 lekë, ndërsa uji dhe kafeja kanë çmime që rivalizojnë vendet e Europës Perëndimore.

Por pavarësisht të gjitha këtyre shqetësimeve, qeveria vijon të promovojë Shqipërinë me slogane optimiste dhe spote luksoze nëpër rrjetet sociale. Edhe pse Ministria e Turizmit është akuzuar për pasivitet nga përfaqësues politikë dhe aktivistë të ndryshëm në lidhje me abuzimet që bëhen në bregdetet shqiptare, sërish nuk ka një përgjigje apo marrje masash nga kjo e fundit.

Kështu në vend që të shfrytëzojë potencialin e jashtëzakonshëm natyror, Shqipëria rrezikon të kthehet në një “zonë kaosi” për turistët e huaj. Pa masa të menjëhershme për ndalimin e betonizimit, lirimin e hapësirave publike dhe kontrollet mbi abuzimet e çmimeve, sezoni 2025 mund të mbahet mend jo për numrin e turistëve, por për dështimin e qeverisë për një sezon turistik dinjitoz.