U hoq si "mbesa e Kryeministrit", rrëfehet Ermes Hoxhalli: Si u mashtruan institucionet përmes një identiteti të rremë?

Rasti i Ermes Hoxhallit ka shkaktuar reagime të forta në opinionin publik, jo vetëm për shkallën e manipulimit të përdorur, ku përfshihej edhe emri i Ambasadës Amerikane për t’i dhënë besueshmëri një projekti bursash në shkollat shqiptare, por edhe për faktin se institucione shtetërore u vunë në lëvizje mbi bazën e një identiteti të rremë, të ndikuara nga bindja se kishin të bënin me një të afërme të kryeministrit.

Në një intervistë ekskluzive për Top Channel, me gazetaren Kristi Gongo, Ermesi rrëfen për herë të parë në mënyrë të detajuar rrugëtimin e tij personal, duke kaluar përmes një procesi të rrallë psikologjik dhe social.

Ti je një personazh i ndryshëm në kohë të ndryshme?

Ermes Hoxhalli: Unë jam në fillimet e mia në Universitetin e Arteve, por duke vëzhguar persona në rrugë apo kudo mundohesh të marrësh pak nga pak nga çfarë të bën përshtypje për ti rikrijuar.

Lënda që ke qenë më shumë i lidhur?

Ermes Hoxhalli: Letërsia. Lexoja jashtëzakonisht shumë. Gjimnazi ka qenë një ‘boom’ i madh për mua.

Gjimnazin po në Devoll e ke kryer?

Ermes Hoxhalli: Po në qytetin e Bilishtit. Jam mbushur shumë nga letërsia, jam inspiruar të shkruaja..

Kjo të izolonte nga bota e vërtetë, jashtë librave?

Ermes Hoxhalli: Vetë librat ishin deri diku për mua vetë bota, ishin realitete të marra dhe të shkëputura të ndërtuara me narrativën e një autori, shkrimtari por që pasqyronin fenomene shoqërore.

A je ti Ermes person që ndjek rrjedhën apo merr vetë vendime?

Ermes Hoxhalli: Marr vetë vendime. Shumica në Shqipëri, i referohem brezit tim, ndjekin turmën dhe janë pjesë e turmës.

Si e vlerëson aftësinë tënde për të marr vendime?

Ermes Hoxhalli: Duhet të kalosh shumë peripeci, që të kesh një gjykim të pastër… kështu që jam ende në procesim.

Kush ka qënë udhëzuesi në jetën tënde?

Ermes Hoxhalli: Shkrimtarët më të mirë. E dashuroj për atë  çka shkruar George Orëell, që sigurisht si ai dua të jem e pa diskutim edhe si Fyodor Dostoevsky.

Çfarë kishe qejf tjetër veçse të lexoje? Si e kaloje kohën? Sa qëndroje në internet?

Ermes Hoxhalli: Në këtë botën virtuale, lundroja herë pas here… por gjithmonë kam qenë i zënë sepse drejtoja disa projekte, edhe me pjesën e shkollës e gjithmonë dua të shkëlqej të jem më i miri.

A mendon se më shumë njerëzit mësojnë nga dështimet apo nga sukseset?

Ermes Hoxhalli: Nga dështimet, sepse kur ti ke sukses je në të vetëndjerin e suksesit, edhe sytë e ty mbyllen aq shumë sa nuk sheh kush të duartroket edhe kush jo. Bëhesh arrogant, egoist.

Si mendon se të shohin të tjerët ty Ermes, edhe sa ndikon kjo në mënyrën sesi ti e sheh veten?

Ermes Hoxhalli: Si më shihnin para diçkaje, apo pas?

Në të dyja fazat e jetës tënde.

Ermes Hoxhalli: Para besoj se nuk më shihnin fare se nuk e dinin kush isha, edhe pas patjetër që ka ndryshim…