Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

E-TJERA

U shpall “Dëshmor i Atdheut”/ Rama, Meta dhe Basha homazhe në nder të nënkomisarit Saimir Hoxha

Politiko 29 Shtator 2021, 14:04

U shpall “Dëshmor i Atdheut”/ Rama, Meta dhe Basha homazhe

Janë zhvilluar sot homazhet në nder të nënkomisarit Saimir Hoxha i cili u ekzekutua dje në krye të detyrës nga 21-vjeçari Aldi Rama.

Më herët, Saimir Hoxha u shpall “Dëshmor i Atdheut”dhe ministri i Brendshëm Bledi Çuçi njoftoi se fëmijët e të ndjerit Hoxha do të marrin 170% të pagës së tij. Pjesë e homazheve të nënkomisarit, janë bërë edhe presidenti Ilir Meta,kreu i Partisë Demokratike Lulzim Basha dhe kryeministri Edi Rama.

Presidenti Ilir Meta në një pronocim për media, teksa shprehu ngushëllimet për humbjen e nënkomsarit, bëri thirrje për të luftuar krimin dhe trafikun e drogës që po rrezikon më së shumti fëmijët.

“Është një moment i dhimbshëm që t’i japim sot lamtumirën e fundit një oficeri hero të policisë së shtetit, por edhe një prindi dhe një familjari të shkëlqyer si nënkomisar Saimir Hoxha, i cili kurrsesi nuk e meritonte të ndahej nga jeta nga familja, nga shokët, nga komuniteti dhe qytetarët të cilëve i shërbeu me besnikëri, duke sakrifikuar dhe jetën e tij trimërisht dhe sigurisht është një moment reflektimi për një luftë frontale kundër krimit të organizuar, por njëkohësisht edhe për dekurajimin e krimit ordiner, ashtu sikurse është një prioritet lufta çdo sekondë kundër trafikut të drogës, kundër atyre të cilët jo vetëm përfitojnë prej saj, por njëkohësisht edhe për të shpëtuar sa më shumë të rinj, për të shpëtuar sa më shumë fëmijë, të cilët për fat të keq bien në prehrin e këtij fenomeni shkatërrimtar dhe janë përgjegjës për akte të tilla që tronditin një shoqëri të tërë. Kjo është një luftë që duhet bërë çdo sekondë dhe për të cilën nuk duhet të kujtohemi vetëm në momente të tilla tragjike. Sikurse është momenti për të mbështetur më shumë Policinë e Shtetit në këtë luftë të rëndësishme, për të mbrojtur atë, për të mbrojtur të gjithë shoqërinë tonë dhe të ardhmen e fëmijëve dhe të rinjve tanë, të cilët duan të jetojnë në një vend të sigurt, në një vend në paqe”, deklaroi Meta.

Kreu i PD-së Lulzim Basha shprehu solidaritet dhe mbështetje me forcat e policisë që sikurse Saimir Hoxha, përballen çdo ditë me rrezikun që iu kanoset në luftën me krimin. Ai theksoi se sot “nuk është dita për të ngritur gishtin e përgjegjësisë”.

“Jam këtu për ti dhënë lamtumirën e fundit nënkomisar Saimir Hoxhës, bashkë me lutjet e mia dhe të gjithë kolegëve, bashkëpunëtorëve të mi, që shpirti i tij të prehet në paqe dhe që zoti t’ia lehtësojë dhimbjen e padurueshme bashkëshortes, fëmijëve, prindërve, famljarëve të tij. Dhe po kështu për të shprehur solidaritetin tim të plotë dhe mbështetjen time për vëllezërit dhe motrat në uniformë të Saimir Hoxhës, të cilët përballen ditë për ditë me rrezikun vdekjeprurës të luftës kundër krimit dhe mbrojtjes së ligjit, jetës, sigurisë së çdo qytetari, së çdo qytetareje dhe të gjithë fëmijëve të këtij vendi.
Sot nuk është dita për të ngritur gishtin e përgjegjësisë, por si drejtues i dikurshëm i tyre ju them se dhimbjen e tyre të përditshme për braktisjen dhe poshtërimin që ndjejnë, e ndjej përditë dhe se unë dhe Partia Demokratike do të bëjmë gjithçka që sakrificën e tyre, uniformën e tyre dinjitetin e tyre ta vëmë në vend një orë e më parë dhe hapi i parë për këtë do të jetë një shtet dhe një qeveri në krah të vëllezërve dhe motrave në uniformë të Saimir Hoxhës, në krah të policisë në krah të ligjit dhe kundër krimit. I paharruar qoftë kujtimi i tij,” u shpreh Basha.

Nga ana tjetër, kryeministri Edi Rama rikonfirmoi edhe njëherë mbështetjen financiare që do t’i ofrohet fëmnijëve të nënkomisarit të ndjerë, të cilët do të pëfitojnë 170% të pagës së tij.

“Padyshim që është një çast i rëndë për të gjitha forcat tona të policisë së Shtetit. Patjetër edhe për shoqërinë dhe për shtetin, por mbi të gjitha për familjen dhe duke i shprehur ngushëllimet vëllazërore familjes, duke i shprehur ngushëllimet më të ndjera gjithë kolegëve që e kanë njohur nga afër këtë dëshmor të ri të atdheut, por edhe të gjithë punonjësve të policisë, e shoh të udhët të bëj me dije se qeveria ka vendosur sot mbështetje financiare të konsiderueshme për familjen, por njëkohësisht me të hyrë në fuqi ligji i përcjellë në parlament pas mbledhjes së parë të qeverisë për fëmijët, fëmijët e të ndjerit do të marrin 170% të pagës së tij deri kur të arrijnë moshën e pjekurisë. Natyrisht nuk ka fonde dhe nuk ka mbështetje materiale që kompenson boshllëkun për familjen, por detyra e shtetit është që fëmijët e dëshmorëve që japin jetën në krye të detyrës të mos mbeten vetëm, por të ndihen deri në fund të mbështetur, të përkrahur dhe të inkurajuar për të hyrë në rrugën e jetës së tyre duke qenë krenarë jo vetëm për prindin, por edhe për shtetin, të cilit babai i shërbeu deri në momentin e fundit”, tha Rama.