"Unë nuk jam për t'u kontrolluar", policia zbardh kronologjinë e ngjarjes ku mbeti i vrarë nënkomisari Saimir Hoxha

Policia ka dalë me një njoftim zyrtar, ku sqaron rrethanat e ngjarjes, ku mbeti i vrarë në krye të detyrës nënkomisari Saimir Hoxha. Autori i dyshuar Aldi Rama qëlloi pas disa orësh veten dhe ndërroi jetën mëngjesin e sotëm në spitalin e Traumës.

Policia bën me dije se Komisariati i Lezhës kishte informacion për ekzistencën e një miniparcele të kultivuar me bimë narkotike dhe tre efektivë me veshje civile dhe njëri prej tyre ishte me jelek fosforeshent me mbishkrimin policia shkuan për kontroll në zonën Kune Vain.

Efektivët konstatuan një miniparcelë, ku gjetën dhe asgjësuan me anë të djegies, 62 bimë narkotike. Sipas policisë, gjatë kthimit, në një distancë rreth 500 metra nga miniparcela ku u asgjësuan bimët narkotike, grupi i kontrollit është shkëmbyer me automjetin tip “Volksëagen” me targa AA984TL, në vendin e quajtur Vain, Ishull Lezhë.

“Volksëageni” pasi është shkëmbyer me automjetin e policisë është kthyer dhe ka lëzizur në drejtim të qytetit të Lezhës, mbrapa makinës së tyre. Grupi i kontrollit vendosi që ta ndalonte automjetin dhe të ushtronte kontroll, në vendin e quajtur “Postblloku i Zonës së Mbrojtur Kune Vain”.

Sipas bluve, pasi iu është dhënë shenjë ndalimi, me qëllim verifikimin e tyre, automjeti është ndaluar dhe efektivët u kanë kërkuar personave që ndodhshin në automjet dokumentet e identifikimit dhe kanë ushtruar kontroll fizik tek Armando Marku dhe Kristjan Sherri, të cilët kanë paraqitur dokumentet e identifikimit dhe i janë bindur kontrollit fizik.

Ndërsa në momentin që nënkomisari Saimir Hoxha i ka kërkuar dokumentin e identifikimit Aldi Ramës, që ndodhej në sediljen e pasme të automjet, ai është shprehur se "Unë nuk jam për tu kontrolluar...", dhe ka nxjerrë armën e zjarrit pistoletë tip TT dhe e ka qëlluar me dy plumba efektivin, duke e plagosur rëndë atë.

Gjatë transportit për në spital, Hoxha ka gjetur vdekjen. 21-vjeçari ka mundur të kalojë në vendin e shoferit dhe është larguar me "Volksëagen-in". Sipas policisë, oficerët e grupit të kontrollit kanë reaguar me armë për neutralizimin e Aldi Ramës.

Në vendngjarje janë sekuestruar 9 gëzhoja të kalibrit 9 milimetra, që përkojnë me armët e punonjësve të Policisë, ndërsa në automjetin e autorit të dyshuar janë konstatuar 4 dëmtime nga predhat me armë zjarri, me drejtim nga jashtë brenda.

Më pas, Aldi Rama ka braktisur automjetin dhe është larguar me vrap, duke iu fshehur forcave të policisë. Pas marrjes së njoftimit, Drejtorisë Vendore të Policisë së Lezhës, Kurbinit dhe Mirditës kanë marrë masa për kufizimin e zonës dhe ngritjen e pikave të kontrollit.

Pas disa orë ndjekjeje të autorit, duke përdorur dronë, qentë e kërkimit, si dhe helikopterin, është bërë i mundur lokalizmi i vendit ku fshihej autori i dyshuar i ngjarjes dhe konkretisht në afërsi të argjinaturës në Lagunën e Vainit.

Policia bën me dije se Renea dhe FNSH kanë bërë rrethimin në një perimetër të gjerë të vendit, ku fshihej Rama dhe i kanë bërë thirrje në mënyrë të përsëritur për rreth 45 minuta që autori të vetëdorëzohej.

Ai nuk iu përgjigj thirrjes, por është vetëplagosur në kokë me armën tip TT. Përveç armës, kështu, në afërsi të vendit ku u gjet Rama u sekuestrua një gëzhojë.

21-vjeçari u transportua me barelë deri në vendin e quajtur “Postblloku i Zonës së Mbrojtur Kune Vain”, pasi ishte e pamundur futja e autoambulancës në vendngjarje, për shkak të terrenit. Më pas është dërguar në Spitalin Rajonal Lezhë dhe më vonë nga autoritetet spitalore është dërguar për ndihmë mjekësore më të specializuar mjekësore në Spitalin e Traumës.

Policia bën me dije se janë marrë në pyetje punonjësit e policisë, dëshmitarë okularë dhe janë sekuestruar pamjet filmike nga kamerat e sigurisë në të gjithë aksin rrugor dhe në zonën përreth vendit të ngjarjes.

Ndërkohë shokët e Aldi Ramës të cilët u arrestuan në flagrancë janë:

-Armando Marku , 26 vjeç, i arrestuar për veprat penale “Moskallëzim krimi” dhe “Përkrahje e autorit të krimit”. Marku ka qene i dënuar më parë për veprë ne penale “Vedhja”.

-Kristjan Sherri, 25 vjeç, i arrestuar për veprat penale “Moskallëzim krimi” dhe “Përkrahje e autorit të krimit”.

Grupi hetimor nën drejtimin e prokurorit vazhdon hetimin për të verifikuar lidhjen e autorëve të arrestuar me miniparcelën e asgjësuar nga ana e policisë.