Urdhri i prokurorisë, ish-ministri: Si nuk doli një burrë ligji të arrestonte një patronazhist

Prokuroria ndaloi dje publikimin e të dhënave që rrodhën nga e-mailet e ish-drejtorit të Përgjithshëm të Policisë së Shtetit Gledis Nano, si edhe informacione të tjera të klasifikuara sekret. Në rast se mediat shkelin urdhrin e prokurorisë, do të procedohen penalisht.

Ish-ministri i Drejtësisë Ylli Manjani ka reaguar përmes një postimi në Facebook, teksa rikujton rastin e patronazhistëve të cilët ndërhynë te të dhënat e qytetarëve në zgjedhjet e 25 prillit.

Manjani shkruan se në rastin e publikimit të informacioneve nga posta elektronike e zyrtarëve, prokuroria kërkon ndalimin e publikimit, por kur bëhet fjalë për patronazhistët, asnjë prokuror nuk e ndalon publikimin e të dhënave nga ta.

Manjani shton se përdorimi i të dhënave të qytetarëve për të rrëmbyer pushtetin është krim më i rëndë dhe i organizuar, ndërsa thekson se sekretin duhet ta ruajë shteti, kur se media ka detyrë të informojë.

Postimi i Manjanit:

Si nuk doli një prokuror të ndalojë vjedhjen dhe përdorimin e të dhënave, të mbrojtura me Kushtetutë e ligj, nga patronazhistët?!

Si nuk doli një burrë ligji të arrestonte një patronazhist të vetëm?!

Ku ishte ky prokurori që përpiqet të mbulojë mutin me shurrë, duke ndaluar mediat të bëjnë lajme me të dhënat e hakeruara dhe, tashmë në dispozicion të kujtdo që ka kuriozitet ?!

E pra, përdorimi i të dhënave personale për presion elektoral, pra për të rrëmbyer pushtet politik, është krim madhor. Krim i rëndë dhe organizuar madje.

Hackerat, nuk po na bëjnë presion elektoral, sa ç'bënë patronazhistët. Informacioni që ato nxjerrin i takon arkivave, të shkuarës pra, e cila duhet marrë me rezerva dhe e vendosur në kontekstin e kohës. Ndërsa patronazhistët janë në veprim permanent duke dhunuar cilindo që tenton të jetë politikisht i lirë për të zgjedhur.

Por nuk pati, as nuk ka, një prokuror që ti ndalojë ato që dhunojnë votuesin.

Si nuk u ndalua një, vetëm një nënpunës shteti që kishte dhe ka për detyrë të ruajë të dhënat xhanëm?!!

Si ka mundësi që pa ndaluar përgjegjësit që duhet ti ruajnë të dhënat, tentohetë të ndalohen mediat?!

Nuk e di, të qeshim apo të qajmë me këto idiotësi që nuk mbarojnë!?

****

Sidoqoftë, urdhëri gjenerik që ka lëshuar Ai prokuror nuk ka asnjë llogjikë ligjore.

Sekretin duhet ta ruajë shteti.

Media ka detyrë të informojë.

Prokurorët mund të urdhërojnë censurë, por jo për çdo gjë. Urdhëri duhet të njoftojë specifikisht dokumentat që ndalohen të përhapen dhe, jo të jetë gjenerik, pra të ndalojë çdo gjë...!

Kështu i bie që ata mund të nxjerrin dhe urdhër të ndalojë jeta...